Ich sin in São Domingos, Tominikaanix Repuuplik, kepoer. Ich sin te yingste fon fier khiner. Mayn eltere waare kelërntne layt un wolte tas mer solte aach kuut in kelërnt wëre. Fier yoore eep ich kepoer sin, hon mayn eltere misyoneere Mormon khëne kelërnt. Tii hon sich ferwunert wii se sich soo kuut aan ketsoo hon un soo ferninftich aan kextelt. Soo, hon se klaych ëntxlist tas unser familye weyer ti eyerst fom lant woo teet tsu ti khërich fom Yeesus Kristus fon te Hayliche fon te Letste Taache, orer ti Mormon Khërich, keheere.

Ich hon imer kërn teel kemacht in te sotsyaale aktiwiteete fon te khërich, awer was mich mee kefalt hot waar ti weyert woo se kep hon tsu ti familye un tsu ti moraalixe muste. Tas hot mich aarich kefrayt een Mormon sin un ich wolt een misyoneere wëre.

Wii ich 18 yoer alt waar, is mayn familye kewanert tsu Nort Amërika, woo ich khont foran in ti Uniwersiteet xtutiire. Unkefeer een yoer tëm noo, mayne unkel un thante, woo Yeehoowa sayn Tsayer sin, sin uns pesuuche khom un hon uns in kelaat fer mit tëne ufm piiplix konkrës keen. Tas hot mich ferwunert siin tas se al in iire Piipel keleest hon ti tekste woo kenënt sin woer un hon sich tas uf kexrip. Tan, hon ich papiir kehoolt un aach aan kefang se uf xraype.

Noo tëm konkrës, hon mayn unkel un thante kesaat, tas wën ich een misyoneer wolt wëre, khente se mich helfe mee iwich ti Piipel lërne. Tas hot mich aan kextan, wayl in tiise tsayt wust ich mee fon tas puuch Mormon wii iwich ti Piipel.

In unser fiile kexpreeche torich telefoon, hon mayn unkel un thante mich imer uf kemuut fer ferklayche mayne klaape aan was ti Piipel in lërnt. Tii wolte tas ich fer mich selepst ti woerheet pewayse solt.

Ich hat fiil fon te mormons inlërnunge aan kenom, awer ich wust net kenau ep tas wërklich sich xteen teet mit was ti Piipel saat. Mayn thante hot mich kexikt tas piichelche Despertai! 8^te Nofemper 1995 (aus keteelt fon Yeehoowa sayn Tsayer), woo hat artikele iwich ti mormon khërich. Tas hot mich ferwunert mërke tas ich fiil fon tiise inlërnunge net kekhënt hon. Tan hon ich aan kefang tsu suuche im site fon te mormon fer fine ep tiise piichelche Despertai! wërklich ti woerheet saan teet. Ich hon raus kriit tas tas wërklich soo waar, net ploos torich te site, awer ich hon aach te mormons museum pesuucht in Utah, Nort Amërika.

Ich hon imer ketacht tas tas Mormon Puuch un ti Piipel teete sich xteen, tas eens teet tas anere aus leye. Awer ich hon kenau aan kefang ti Piipel leese, tan hon ich kemërekt tas ti Mormon inlërnunge sich net xteen mit was ti Piipel in lërnt. Tsum payxpiil, in Esekyël 18:4, saat ti Piipel tas ti seel xtërpt. Awer tas Mormons Puuch in Seel 42:9, saat: “Ti seel tuut nii xtërpe.”

Tas waar net ploos ti unerxiit unich ti inlërnunge woo mich net ketiint hot, awer aach ti natsyonaalixe itee woo ti mormons in lërne. Tsum payxpiil, tii lërne in tas te Eetem kaate waar im Condado de Jackson, Missouri, Nort Amërika. Ti profeete fon te khërich saan tas wën “Kot sayn Raych aan fangt tsu rechiire, wërt ti faan fon te Nort Amërika hoochmuutich un oone fleke flatre am faan phool fon te frayheet un ekaale rechte”.

Ich hon mich imer kefroot was teet pasiire mit mayn lant — un mit anere lënter uf te eyert — wën te raych aan fange teet. Eene oomt, hot eene yunge woo am xtutiire waar fer misyoneer wëre mich telefoniirt, un mer hon iwich tiise sache kexproch. Ich hon tëm uf richtich kefroot: ‘Teest tuu khëmpfe keeche mormons fon anere lënter wëns kriich kepe teet?’ Ich hon mich ferxrekt wii tee saat yaa! Tan hon ich peser uner suucht ti mormons inlërnunge, un aach fertseelt mit te fiirer fon te Mormons Khërich. Tii hon kesaat tas ti antworte woo ich suuche teet weyere een kehaymnis woo noch net ferxtan sin woer.

Tëne iire ausleyung hon mich net ketiint, tan hon ich mich peser iwerleet warom ich wolt een mormon misyoneer sin. Ich hon kemërekt tas ich wolt misyoneer sin fer ti layt helfe, awer ich khent tas aach mache in anere umaniteer hilef. Ich hon kemërkt tas was ich wërklich wolt waar te aan siin woo ti misyoneer unich ti mormons hon. Awer in woerheet, iwich Kot wust ich kans weenich. Ale tëm, woo ich ti Piipel xon kans oft keleest hat, hat ich khee kroos weyert kep fer ti woerheet. Ich hat khee aanung was Kot fer ti Eyert un fer ti mënxe wolt.

Wii ich ti Piipel xtutiirt hat mit Yeehoowa sayn Tsayer, hon ich kelërnt Kot sayne naame, was noom toot pasiirt, Yeesus sayn xtel fer erfiile Kot sayne wile un fiil anere tinge. Ëntlich hon ich mee kelërnt iwich tiise wunerxeen puuch un mich kefrayt fer iwich tiise woerheete mit anere fertseele. Ich wust xon imer tas Kot eksistiirt. Yets, im kepeet, khan ich mit iim fertseele wii mit mayne peste Fraaynt. Ich sin ketaaft woer wii Yeehoowa sayn Tsayer in 12^te Yuuli 2004, un seks moonate tëm noo, sin ich fol tsayt tiiner kewoer.

Ich hon finef yoore ketiint in ti Haupst Sets fon Yeehoowa sayn Tsayer in Brooklyn, Nay York, Nort Amërika. Tas hot mich aarich kefrayt helfe in ti Piipel un piiplixe puplikatsyoone protutsyoon, woo helfe milyoone layt in ti kans welt, un ich tuun mich foran fraye in anere helfe iwich Kot lërne.