Ti Piipel saat tas ale mënxe sinter sin. Meyer hon tas keërpt fom eyerste man, Aatam. Wayl mer ti muut hon fer mache was ferkheert is, als mool mache mer sinte woo mer uns xpeeter peroye. Awer Kot sayn soon, Yeesus Kristus, is uf unser plats kextorep fer uns fray mache fom sint. Soo, khene mer fertsayert wëre. Tas is een kexenk woo Kot uns kept. (Lees Romaaner 3:23, 24)

Etliche woo xlime sinte kemacht hon, frooe sich ep Kot se fertsayert wërt. Ti Piipel saat etwas kuutes too triwer: “Tas pluut fon Yeesus, tëm sayn Soon, tuut uns rayn fon yeete sint lose.” (1 Yoohan 1:7) Yeehoowa is fërtich fer fertsaye soo kaar xlime sinte wën mer tsayche tas mer uns peroyt hon. (Lees Isaiias 1:18)

Wën mer wole tas Yeehoowa Kot uns fertsayert, mise mer lërne iwich iim — was tee tenkt, sayn aanreete un was tee fon uns waart. (Yoohan 17:3) Yeehoowa fertsayt krooshërtslich tii woo sich peroye fon sayn sinte un xtrenge sich aan fer sayn leepe ënere. (Lees Aphostele sayn Kexicht 3:19)

Kot kefale is net soo xweyer wii etliche tenke. Yeehoowa ferxteet unser xwacheete. Tee is parmhërtslich un seer kuut. Tuut tich tas net uf muute fer mee wise iwich wii tëm kefale? (Lees Psalm 103:13, 14)