Ich sin kroos kewakst in Warialda, een kleen xtat in Nova Gales do Sul. Warialda is een kleen kolonii xtat, woo fiil xeef un rints fii ketsoo wërt, un plantsung fon khërne un kemiise. Ti xtat is sauwer un is weenich kriminaliteet.

Ich waar te elste fon tseen khiner. Wii ich 13 yoer alt waar, hon ich aan kefang tsu xafe fer ti familye helfe. Wayl ich weenich xuul hat, sin ich xafe kang ufm khamp un wii ich 15 yoer alt waar, waar mayn aarwayt wilte kayl tsaam mache.

Xafe ufm khamp pringt kuutes un aach xlechtes. Ich hat aarich kërn mayn aarwayt un ti umtre. Oomst hon ich mich oft mools neewer tas fayer kesetst un hon mich te moont un ti xtërne pekukt, un kexpiirt te kuute keroch woo te wint kepracht hot fon te australyen sawana. Tas hot mich tenke kemacht tas yemant hët sicher al tiise xeene tinge kemacht. Awer ufm khamp hat ich xlecht keselxaft. Oft mools hon ich trekiche wërter keheert un too waare imer tsikere fray kewees. Soo hon ich aan kefang se rauche un trekiche wërter saan.

Wii ich 18 yoer alt waar, sin ich noo Sydney kewanert. Ich wolt tas militeer tiine, awer ich sin net aan kenom woer wayl ich weenich xuul hat. Tan hon ich een aarwayt kefun un sin woone keplip in Sydney fer een yoer. In tiise tsayt hon ich Yeehoowa sayn Tsayer khëne kelërnt. Ich hon een inlaatung aan kenom fer uf een fersamlung keen. Tat hon ich klaych kemërkt tas tii ti woerheet in lërne teete.

Awer khorts tëm noo sin ich tsurik kewanert uf te khamp. Ich sin woone kang in Goondiiwindi, een xtat in Queensland. Tat hon ich een aarwayt kefun un hon mich ferhayrat. Awer ich hon aan kefang tsu saufe.

Ich un mayn fraa hon tswaay khiner. Noo tëm woo mayn khiner uf ti welt khom sin, hon ich aan kefang tsu tenke aan was ich mit mayn leepe mache teet. Ich hon mich erinert aan was ich uf ti fersamlung fon Yeehoowa sayn Tsayer in Sydney keheert hat, un ich hon ëntxlist etwas mache.

Ich hon kefun in een alt piichelche A Sentinela te atrës fon te filyaal fon Yeehoowa sayn Tsayer in Austraalya. Ich hon eene priif kexrip un hilef ferlangt. Tan is eene kuute man mich pesuuche khom. In een khorts tsayt hot tee aan kefang ti Piipel mit mich xtutiire.

Pay ti Piipel xtutiire, hon ich kesiin tas ich mist kroose ënerunge mache. Tas hot mich kewunert was in 2 Korinter 7:1 xteet. Tiise wërs muut uns uf fer “uns fon ale sorte trek fom flayx sauwer mache”.

Ich hon ëntxlist noo lose tsu rauche un tsu fiil trinke. Tas waar net laycht tas mache wayl tas waar een aankewoonung woo ich xon hat fer een lang tsayt. Awer ich wolt leepe uf een aat woo Kot kefale teet. Was mich te meyerst keholef hot waar aan wëne te oryentiirung woo xteet in Romaaner 12:2: “Un lost net tiise welt aych wayter mustere; xtats tas, ferënert aych un macht ayre ferxtant nay.” Ich hon kesiin ich mist ënere ti aat wii ich tenke teet un mist mayn kewoonheet aan siin soo wii Yeehoowa tas aan siit — wii etwas woo xaate macht. Mit tëm sayn hilef hon ich kephakt noo lose tsu rauche un tsu fiil trinke.

Awer tas xlimste waar noo lose trekiche wërter saan. Ich wust tas ti Piipel teet in Ëfeser 4:29 aan reete: “Khee xlecht wort sol aus ayre munt khome.” Awer toch hon ich tas net klaych hin kriit. Was mich keholef hot waar tenke aan ti wërter woo xteen in Isayas 40:26. Too xprecht iwich ti xtërne im himel, te wërs saat: “Heept ti aue tsum himel un kukt. Weer hot tas ales kemacht? Es waar Tee woo tii wii een militeer raus pringt un se tseelt. Tee tuut se al noom naame ruufe. Weeche sayn aarich kroos kraft un sayn wunerlich macht, khee eensiche fon tëne feelt.” Ich tacht wën Kot ti macht hot fer soo een kroose Uniwërs mache, woo ich mich soo kërn pekuke, kans sicher khan tee mich kraft kepe fer ti ënerunge mache tas ich khan iim kefale. Mit fiil kepeet un aanxtrengung hon ich lamsam aan kefang mayn tsung kontroliire.

Ufm khamp woo ich kexaft hat, waare net fiil layt, tes weeche hat ich net fiil keleechenheete fer fertseele. Awer ti iipung woo ma kriit in fersamlunge fon Yeehoowa sayn Tsayer hon mich kelërnt peser xpreche khene. Tiise iipung hot mich fiil keholef hauptseechlich xpreche mit anere iwich ti kuute oter fom Kotes Raych. (Matheus 6:9, 10; 24:14)

Tas sin xon yoore woo ich ti frayt hon fer tiine wii elteste in te kemaynt. Tas is fer mich een priwilëj ales mache was ich khan fer mayn priiter un xwestere im klaape helfe. Awer mayn kreest frayt is Yeehoowa tiine mit mayn liiplich un troy fraa un unser liipe khiner.

Ich tanke Yeehoowa tas tee soo een persoon wii ich, mit soo weenich xuul, ti keleechenheet kep hot fer lërne iwich iim. (Isayas 54:13) Ich khan hërtslich tsuxtime ti wërter woo xteen in Xpriiche 10:22, woo saat: “Yeehoowa sayn seechen macht raych.” Ich un mayn familye wole imer mee iwich Yeehoowa lërne un iim tiine fer imer.