Etliche layt fine tas xweer Kot liipe. Fer tëne, Kot ferxteen is unmeechlich. Tii tenke tas tee sich net khimert un is soo kaar xlecht. Kuk was etliche saan:

• “Ich hon tsu Kot kepeet fer hilef ferlange, awer ich hon ketacht tas tee weyer tsu wayt wech. Fer mich, tee waar ploos een kraft woo ma net siit un woo niks xpiirt.” — Marco, Itaalya. *

• “Ich wolt Kot tiine, awer tas hot mich aus kesiin tas tee tsu wayt wech weyer fon mich. Ich tacht tas tee weyer een xtrenge Kot, woo teet kërn ti layt xtroofe un teet se net tauere.” — Rosa, Kwatemala.

• “Wii ich kleen waar, hon ich ketacht tas Kot teet ti layt sayn feele suuche fer se xtroofe. Xpeeter, hon ich aan kefang se tenke tas tee teet sich net khimere. Ich tacht tee weyer wii em kowernant woo entxlise mache teet iwich ti layt sayn leepe, awer oone sich wërklich khimere mit tëne.” — Roberta, Kanaata.

Was mënst tuu? Meecht Kot liip fertiine? Ti kriste frooe sich tas xon fer hunerte yoore. In ti Mite Yoerheet, hon ti meyerste layt fon te kristenthum kaar net tsu te Ale Mechtiche Kot kepeet. Warom net? Tii hon ausferxeemt angst kehat fon tëm. Will Durant, eene kexichte unersuucher, saat: “Wii khent eene keweenliche sinter te koraaj hon fer sayn kepeet hin richte tsu soo eene xrekliche un wayte troon?”

Warom tenke etliche tas Kot “xreklich un wayt wech” is? Was lërnt ti Piipel wërklich iwich Kot? Meecht ti woerheet lërne iwich Kot tich helfe khene iim liipe?