“Ti seele fon tëne woo kextorep sin in sinte khome klaych in te hel noo iire toot, fer kextrooft wëre in ‘een fayer woo fer imer prënt’.” (Catecismo da Igreja Católica) Etliche relichyeese xëfe saan tas ti hel petayt kans ap keteelt sin fon Kot.

“Ti seel woo sinte macht tuut xtërpe.” (Esekyël 18:4) “Ti toote wise kaar niks mee.” (Eklesyastes 9:5) Wën een seel toot is un wees kaar niks mee, wii khan se tan layte in te fayer hel orer layte wayl se ap keteelt is fon Kot fer imer?

In te Piipel, tas wort “hel” in hepreeyx un in kreekix petayt “tas kraap”. Tsum payxpiil, een piiplix profetsii iwich Yeesus saat: “Tuu lost mich net im kraap [“in te hel”, wersyoon Antônio Pereira de Figueiredo].” (Aphostele sayn Kexicht 2:27) Sicher, waar Yeesus net uf een plats woo eyer ferkweelt is woer orer ap keteelt fon Kot. Tee waar im kraap.

Tenke tas Kot xlecht is halt uns wech fon iim. Rocío, woo in Mëksiko woont, saat: “Wii ich kleen waar, hon ich ti inlërnung fon te fayer hel kelërnt. Tes weeche, hat ich soo een kroos angst fon Kot, un khont net klaape tas tee kuut weyer. Ich tacht tee weyer pees un xtreng.”

Ti taytliche inlërnunge fon te Piipel iwich Kot un iwich ti toote hon keënert ti aat wii Rocío Kot aan kesiin hot. Tii saat: “Ich hon mich fray kexpiirt. Tas waar mich aan als wën se een xweer kewicht fon mich runer kehool hëte. Hayt sin ich mich sicher tas Kot uns liipt un tas tee tas peste wil fer uns un ich khan tee liipe. Tee is wii een Fater woo sayn khint sayn hant fest halt un wil tas peste fer tëm. — Isaiias 41:13.

Fiil layt tuun Kot aan peete wayl se angst hon fon te fayer hel. Awer Kot wil net tas tuu tee tiinst wayls tuu angst host. Yeesus saat: “Liip Yeehoowa, tayn Kot.” (Markus 12:29, 30) Un wën mer ferxteen tas Kot hayt kerecht is, khene mer traue tas tee aach kerecht wërt sin im tsukhunft. Un soo wii Eliuu, Yoop sayn fraaynt, khene mer aach mit sicherheet saan: “Te woere Kot teet nii was xlechtes mache, Te Ale Mechtiche teet nii was ferkheertes mache!” — Yoop 34:10.