HAUPSTE SACHE
Liieray woo fon Kot een kehaymnis kemacht hot
WAS ETLICHE SAAN
“Ti tray tratisyonaale krupe fom kristenthum katolisismus, ortotoksii un protestantismus, saat tas Kot sich in tray persoone macht: te Kot Fater, te Kot Soon un te Kot Hayliche Kayst. Tëm noo ti kristlich teoloxii, tas sin net tray kote, awer tray persoone in een eensich persoon”. — The New Encyclopædia Britannica (Nova Enciclopédia Britânica).
WAS TI PIIPEL SAAT
Yeesus, Kot sayne Soon, hot nii kesaat tas eyer kraat soo weyer wii sayne Fater. Xats tas, saat tee: “Ich keen tsum Fater, wayl te Fater is kreeser wii ich.” (Yoohan 14:28) Tee hot aach fer een fon sayn tisipele kesaat: “Ich keen ruf tsu mayne Fater un ayre Fater, un tsu mayne Kot un ayre Kot.” — Yoohan 20:17.
Te hayliche kayst is khee persoon. Ti eyerste kriste “sin al fol mit hayliche kayst kewoer”, un Yeehoowa saat: “Ich tuun fon mayn kayst iwer ale sort mënxe aus xite.” (Aphostele sayn Kexicht 2:1-4, 17) Te hayliche kayst is khee teel fon een triniteet, awer is Kot sayn kraft.
WAROM TAS WICHTICH IS
Ti katoolixe relichyeese xëfe Karl Rahner un Herbert Vorgrimler, leye aus tas mer khene ti triniteet “net ferxteen oone een rewelatsyoon, un aach, tas noo ti rewelatsyoon mer khan se net taytlich ferxteen.” Tan, khanst tuu yemant liipe woos tuu net khënst un net ferxteest? Soo, xteert ti inlërnung fon ti triniteet ti layt fer Kot khëne lërne un liipe.
Fer Marco, woo xon kenënt is woer, waar ti triniteet wii een mauer tswixich iim un Kot. Tee saat: “Ich tacht tas Kot wolt sayn itentiteet ferxtekele tas ich iim net khëne solt, un tes weeche hots mich aus kesiin tas tee weyer een kroos kehaymnis un yemant woo mer khent net ticht khome. Awer “Kot is net een Kot fon unortnung.” (1 Korinter 14:33, Centro Bíblico Católico) Tee ferxtekelt net sayn itentiteet fon uns. Tee wil tas mer iim khëne sole. Yeesus saat: “Meyer peete aan was mer khëne.” — Yoohan 4:22.
Marco saat noch: “Wii ich kelërnt hon tas Kot khee teel fon een triniteet is, khont ich ëntlich een fraayntxaft mit iim hon”. Wën mer Yeehoowa aan siin wii een eensich persoon, un net wii een kehaymnis, is es fiil laychte iim liipe. “Weer net liipt, tuut Kot net khëne, wayl Kot is liip”, saat ti Piipel. — 1 Yoohan 4:8.
