Michele: Kuu’moynt, Sofia!

Sofia: Kuu’moynt, Michele!

Michele: Wii kuut tich wiiter aan trefe. Letst mool woo ich hiir waar, hon mer kexproch iwer wii Kot sich xpiirt wën mer layte. Tuu saast tas tuu xon lang too triwer tenkst, hauptseechlich noo tëm woo tayn mama ferletst is woer in een unfal mit een auto. Wii keets iir yets?

Sofia: Sin taache woos iir kuut aan is; anere taache, net. Awer hayt, is es iir kuut aan.

Michele: Tas frayt mich wise tas se peser is. Es is sicher xlim mit soo was um keen.

Sofia: Yaa… Als mool, frooe ich mich: ‘Wii lang meecht se tas mise noch aus hale?’

Michele: Es is normaal sich soo xpiire. Ich erinere mich tas, tas letste mool woo mer fertseelt hon, hon ich kesaat ich teet wiiter khome fer tich tsayche, in ti Piipel, warom Kot lost ti layt layte wën eyer ti macht hat fer mit tas ales am ën mache.

Sofia: Ah yaa, ich hon es net ferkes.

Michele: Fer aan fange, wole mer uns een pisye noo tenke iwich was mer tas letste mool kexproch hon.

Sofia: Kuut.

Michele: Eyerst: meyer hon in ti Piipel kesiin tas soo kaar eene troye man sich kefroot hot warom Kot lost ti layt layte. Awer Kot hot sich net keayert mit tiise frooch un hot aach net kesaat tas te man mist een xtërker klaape hon.

Sofia: Yaa, tas waar was nayes fer mich.

Michele: Meyer hon aach kesiin tas Yeehoowa Kot net wil tas mer layte sole. Tsum payxpiil: ti Piipel saat tas es waar “petriklich” fer iim wii sayn folek friier mit xwiirichkheete um must keen. * Treest tas uns net wise tas Kot wërklich sich khimert wën mer layte?

Sofia: Yaa, is woer.

Michele: Tan, tsum xlus, hon mer kesiin tas Kot kroos macht hot un tas eyer khent in krayfe un am ën mache mit ales was uns layte macht — kraat wën Tee wolt.

Sofia: Tas is was ich net ferxteen: Warom lost Kot xlechte tinge uns pasiire wën tee hot ti macht fer tas net pasiire lose?

Michele: Fer tas ferxteen, khene mer leese tas eyerste puuch fon ti Piipel, Xeenesis. Khënst tuu tas kexicht iwer Aatam, Ewa un tas ferpootne oopst?

Sofia: Yaa, ich khëne tas. Ich hon tas kexicht kelërnt in ti khërich. Kot saat tii solte net fon een sort oopst ese, awer tii hon tas toch kes.

Michele: Kenau. Yets, wole mer siin warom Aatam un Ewa kesint hon. Tas heleft uns fiil ferxteen iwich warom mer layte. Khanst tuu leese, hiir, Xeenesis kapitel 3, wersikele 1 pis 5?

Sofia: Sicher. “Ti xlang waar tas foersichtichster fon tëm kanse tiere woo Yeehoowa Kot kemacht hot. Soo, hot se fer ti fraa kesaat: ‘Hot Kot wërklich kesaat tas teyer net fon ale oopst peem fom kaate ese thërft?’ Too hot ti fraa fer ti xlang kesaat: “Meyer khene fon te oopst peem woo im kaate sin, ese. Awer, iwer tas oopst fom paam woo in te mite fom kaate is, too hot Kot kesaat: “Tuut net fon tëne ese, nee, un tuut aach net aan tëm traan krayfe, tas teyer net xtërpe tuut.”’ Too, hot ti xlang fer ti fraa kesaat: ‘Es is sicher tas teyer net xtërpe tuut. Wayl Kot wees tas am selwiche taach woo teyer fon tëne est, tuun ayre aue uf keen un teyer wërt wii Kot, un teyer tuut tan wise was kuut un was xlecht is.’”

Michele: Tanke xeen. Yets, wole mer een pisye tenke iwich was mer kelees hon. Eyerst: meyer hon kesiin tas ti xlang mit Ewa fertseelt hot. Anere piiplixe tekste tsayche tas es waar Satanaas, te Taywel, woo torich ti xlang kexproch hot. * Satanaas hot Ewa aus kefroot iwich tas kesets woo Kot kep hat iwich eene paam. Host tuu kesiin was Kot saat was pasiire teet wën se fon tiise paam ese teete?

Sofia: Tii teete xtërpe.

Michele: Yaa, is woer. Noo tas, hot Satanaas was xlimes keeche Kot kesaat. Kuk mool was tee saat: “Es is sicher tas teyer net xtërpe tuut.” Satanaas hot kesaat Kot weyer een liichner.

Sofia: Ich hon noch nii tas teel fon tas kexicht keheert.

Michele: Tas is wunerlich, kël? Un wii Satanaas tas saat, hot tee een frooch kextelt woo teet een tsayt nëme fer resolwiirt wëre. Host tuu ferxtan warom?

Sofia: Ah… ich tenke net.

Michele: Tan, fer tich helfe peser ferxteen, tenk mool: wën ich teet saan tas ich xtërker weyer wiis tuu, wii khenst tuu tsayche tas ich ferkheert weyer?

Sofia: Ich wees net. Im xtant, een proop mache?

Michele: Yaa! Meyer khene etwas xweyeres raus suuche un siin weer fon uns tswaay khent tas aan heepe. Es is woer: es weyer kans laycht proope weer xtërker weyer.

Sofia: Yets hon ich es ferxtan.

Michele: Awer xtats saan tas ich xtërker sin, wën ich saan teet tas tuu net eerlich weyerst, tan weyer tas anerste, kël?

Sofia: Yaa, ich tenke aach.

Michele: Wayl ti eerlichkheet is net soo wii ti kraft, woo ma khan laycht pewayse.

Sofia: Tas is woer.

Michele: Ti eensich aat fer wise, weyer tsayt kenuuch kepe tas anere khente siin ops tuu eerlich weyerst orer net.

Sofia: Tas hot tswek.

Michele: Yets kuk noch mool was hiir in Xeenesis saat. Saat Satanaas tas eyer xtërker weyer wii Kot?

Sofia: Nee.

Michele: Kot khent laycht pewayse, in te selwich xtun, tas te Taywel ferkheert weyer. Xtats tas, hot Satanaas kesaat tas Kot net eerlich weyer. In anere wërter, tee saat tsu Ewa: ‘Kot tuut liie! Awer ich saan tich ti woerheet.’

Sofia: Mmm… tas is interesant.

Michele: Tes weeche, Kot, mit sayn kroos kluucheet, hot kesiin tas es weyer peser ti tsayt rom keen lose. Ti tsayt teet tsayche weer ti woerheet saan teet un weer liie teet.

Sofia: Awer, hot Ewa sayn toot net ketsaycht tas Kot ti woerheet saan teet?

Michele: Uf een aat, yaa. Awer too waar noch mee too hiner. Kuk noch mool te wersikel 5. Host tuu kemërkt hiir was Satanaas saat tsu Ewa?

Sofia: Tee saat tas, wën se fom oopst ese teet, teete iire aue uf keen.

Michele: Yaa. Un tas se teet wëre “wii Kot” un tas se wist “was kuut un was xlecht” weyer. Soo, hot Satanaas kesaat tas Kot teet etwas kuutes fon te mënxe ferxtekele.

Sofia: Ich hon ferxtan.

Michele: Un tas waar aach net soo laycht un soo xnel fer se antworte.

Sofia: Wii soo?

Michele: Wii Satanaas tas kesaat hot, hot eyer tsu Ewa ferxteen kep un aach tsu ti kans mënxheet tas se weyere peser traan oone Kot sayn oryentiirung. Awer Yeehoowa wust aach wii mit tas um keen: tee hot kelos Satanaas fer een tsayt rechiire tas eyer tsayche khont eps woer is was tee saat. Tes weeche, is soo fiil eelent. Tas is Satanaas woo ti welt rechiirt, net Kot. * Awer ich hon een kuut notisye fer tich.

Sofia: Was?

Michele: Ti Piipel lërnt uns 2 xeene woerheete iwich Kot. Tas eyerste is tas Yeehoowa uns heleft wën mer layte. Kuk was te kheenich Tawi saat im Psalm 31:7. Tawi hot fiil xlimes mit kemacht im leepe; awer kuk was tee saat in een kepeet tsu Kot. Khanst tuu tiise wersikel leese?

Sofia: Sicher. Hiir saat: “Ich tuun mich mit tayn leaale liip fiil fraye, wayl tuu siist mayn xwiirichkheet; tuu khënst mayn tiif ëngstlichkheet.”

Michele: Tan, was Tawi ketreest hot, waar wise tas Yeehoowa kesiin hot ales was mit iim pasiirt is. Is es net kuut wise tas Yeehoowa siit un ferxteet was mer aus hale, wën aach anere layt tas net siin?

Sofia: Is woer.

Michele: Ti tsweet woerheet is tas Kot wërt net lose tas mer fer imer layte mise. Ti Piipel saat tas hatich wërt Kot am ën mache mit Satanaas sayn rechiirung. Tee wërt aach tsurik mache ales xlechtes was xon pasiirt is — soo kaar was mit tich un tayn mama pasiirt is. Was mënst tuu wën ich teet wiiter khome neekst woch fer tich tsayche wii mer wise khene tas hatich wërt Kot wërklich mit ale layte am ën mache?

Sofia: Tas tiint mich.