Ich sin uf ti kolonii in Galicia, noroëst fon Xpaanya kroos kewakst, woo mayn eltere een kleen xtik lant hate. Ich waar tas fierte fon acht khiner. Unser familye waar kuut un liiplich. In tiise tsayt in Xpaanya, waar tas normaal tas weenst een fon te khiner im phaater seminaar orer xwestere konwent kengt. Tray fon uns hon tas kemacht.

Mit 13 yoer sin ich aach in te konwent kang in Matri, woo mayn xwester xon waar. Tas waar khee liiplich un waarm plats. Too waar khee froyntxaft — nuer reekle, kepeete un formaliteet. Moynts frii, hon mer uns kesamelt fer kans ruych iwich Kot tenke. Awer, ti meyerst tsayt hon ich aan kaar niks ketacht, mayne khop waar leye. Xpeeter hon mer relichyeese liite kesung un ti mës kehalt in latin. Ich hon neekst niks ferxtan un fer mich waar Kot wayt wech. Ich must te taach rom pringe oone een wort, kans ruych. Soo kaar wën ich mayn xwester aan ketrof hon, torft mer ploos ti tsayt pite mit inkeiipne wërter. Ti xwestere hon uns fertseele kelos nuer een halp xtun noo tas ese. Tas waar soo anerste wii tas frooer leepe woo ich hat mit mayn familye! Ich hon mich soo aleen kexpiirt un hon oft keprilt.

Opwool ich mich net ticht pay Kot kexpiirt hon, wii ich 17 yoer waar sin ich een katoolix xwester kewoer. In woerheet, ich hon nuer kemacht was se fon mich kewaart hon, awer klaych hon ich aan kefang tsu tswayfele op tas wërklich fer mich weyer. Ti xwestere hon kesaat tas weer soo tswayfele hët, teet sicher pay te taywel khome. Toch hon ich foran tswayfele kehat. Ich wust tas Yeesus net sich fon te layt ap kelënkt hot un aleen keleept; xtats tas, hot tee sich traan kehal fer anere helfe un in lërne. (Matheus 4:23-25) Mit 20 yoer, hon ich kesiin tas ich khee motiiw hët fer tat plaype. Hot mich kewunert wii ti haupst xwester mich kesaat hot, tas wën ich net sicher weyer tas ich wolt een xwester sin, weyer es peser tas ich soo xnel wii meechlich fat kengt. Ich klaape tii hat angst kehat tas ich khent een xlecht payxpiil sin fer ti anere xwestere. Tan sin ich fat kang.

Wii ich hëm khom sin, hon mayn eltere mich kuut aan kenom. Awer, tat rom waar khee aarwayt, tan sin ich pay mayne pruuter in Taytxlant woone kang. Tee hot keheert tsu een komunistixe aktiwiste krup woo waare fon Xpaanya wech kexikt. Ich hon mich kuut kefun uner tiise layt. Tii hon kekhëmpft fer ti aarwayte sayn rechte un tas ti fraae aach ti selwiche rechte solte hon. Soo sin ich komunist kewoer un xpeeter hon ich kehayrat mit yemant fon tiise krup. Ich hon kemënt tas ich teet etwas kuutes mache wii ich keholef hon aus teele komunistixe puplikatsyoone un teel kemacht in protëstos.

Awer mit te tsayt hot mich tas aach net mee kefal, wayl ich hon kemërkt tas ti komunister aach net mache was se preetiche. Was mich sicherheet kep hot waar wii in 1971, etliche yunge fon unser krup te xpaanyxe konsulaat in Frankfurt ap keprënt hon. Tii hon protestiirt keeche ti unkerechtichkheet fon te xpaanyx rechiirung. Awer fer mich waar tas net ti richtich aat fer tsayche tas se too keeche weere.

Wii mayn eyerste khint kepoer is, saat ich fer mayne man ich teet net mee uf te komunistixe fersamlunge keen. Ich hon mich aarich aleen kefun wayl nimant fon mayn friirixe froynte is mich un mayne nëne pesuuche khom. Ich hon mich kefroot: ‘Was is te opjetiiw fom leepe? Meecht tas te weyert sin sich aan xtrenge fer fersuuche ti welt ënere?’

In 1976, hot een xpaanyx pheyerche fon Yeehoowa sayn Tsayer aan mayn tiir keklopt, mich piiplixe puplikatsyoone aan kepoot un ich hon se aan kenom. Wii tii mich tas tswaayte mool pesuucht hon, hon ich frooche kemacht iwich ti eelent un unkerechtichkheet. Ich hon mich ferwunert wii se ti Piipel penuts hon fer ti frooche antworte. In te selwich xtun hon ich een Piipel xtuutyum aan kenom.

Am aanfang, wolt ich ploos etwas nayes lërne. Awer tas hot sich ferënert wii ich un mayne man aan kefang hon uf ti fersamlunge fon Yeehoowa sayn Tsayer keen. In tiise tsayt hate mer tswaay khiner. Yeehoowa sayn Tsayer waare liiplich mit uns, tii hon uns uf ti fersamlunge kenom un keholef unser khiner uf phase. Tas hot mayn hërts aan kekrif.

Awer ich hat imer noch tswayfele. Tan sin ich mayn familye in Xpaanya pesuuche kang. Mayne unkel waar een phaater, un tee wolt hon tas ich solt noo lose ti Piipel xtutiire. Awer Yeehoowa sayn Tsayer hon mich soo fiil keholef. Tii hon mayn frooche keantwort mit te Piipel, soo wii tii in Taytxlant. Ich hon ëntxlus kemacht wayter ti Piipel xtutiire wën ich hëm kengt. Mayne man wolt net mee xtutiire, awer ich hon net uf kep. In 1978, sin ich ketaaft woer wii Yeehoowa sayn Tsayer.

Kenau khëntnis fon te piiplixe woerheete hon mich opjetiiw im leepe kep. Tsum payxpiil, 1 Pheeter 3:1-4 saat tas ti fraa solt “tiife respëkt” iwich iire man hon un sich aan xtrenge fer ‘een ketultich un tsaam kayst hon, woo fiil weyert foer Kot sayn aue hot.’ Tas hot mich keholef een kuut fraa un mama sin.

Ich sin xon Yeehoowa sayn Tsayer 35 yoer. Tas frayt mich Kot tiine mit fier fon mayn finef khiner un keheere tsu een kaystlich welts familye fon priiter un xwestere.