Ich sin uf ti welt khom un kroos kewakst neewer rom ti xtat fon Roma, een aarm plats. Tas leepe waar net laycht. Ich hon mayn mama net khëne kelërnt un hon mich net kuut kep mit mayne papa. Ich hon fon khint aan ti reekle fon ti xtroos kelërnt.

Wii ich 10 yoer alt waar hon ich xon kextool. Wii ich 12 yoer waar, sin ich tas eyerste mool fon tehëm aus keris. Oft mools, must mayne papa mich hoole keen pay ti polise. Ich hon mich imer fermault mit ti layt — ich waar kewaltich un sin wuutich kewoer mit ale kaar. Wii ich 14 yoer waar, sin ich fon tehëm fat kang. Ich hon aan kefang trooke penutse un ufm weech leepe. Wayl ich khee plats hat fer se xloofe, hon ich autos uf keproch un triin kexloof. Un fer mich wexe hon ich mich een kraane kesuucht.

Ich sin aarich kuut kewoer im xteele — ich hon thaxe kextool un aach apartamente un hayse. Tes weeche sin ich famoos kewoer un klaych hot een pekhant kanke mich in kelaat fer teel mache, tan hon ich een “peser xtel kriit” — pank xpits puup. Wayl ich soo krop waar hon ti anere fon ti kanke mich respektiirt. Ich sin nii fat kang oone mayne wafe, ich hon soo kaar kexloof mit tëne uner mayn khiser. Kewaltichkheet, trooke, xteeleray, trekiche wërter un imoraaliteet hon teel kemacht in mayn leepe. Ti polise waare imer hiner mich. Ich sin oft mools in ti katee khom, yoore lang sin ich rin un raus fon te katee khom.

Een mool, wii ich aus ti katee waar, sin ich mayn thante pesuuche kang. Ich wust net tas tii un mayn tswaay prime yets Yeehoowa sayn Tsayer weere. Tii hon mich in kelaat fer mit tëne uf een fersamlung keen. Ich waar naykerich, tan sin ich mit kang. Wii mer am Raych Saal hin khom sin, hon ich mich ticht aan ti tiir kesets, fer uf phase weer rin khome teet. Un wii imer, hat ich te wafe mit mich.

Tiise fersamlung hot mayn leepe keënert. Tas hot aus kesiin tas ich in anert welt weyer! Ti froyntliche layt hon mich seer kuut aan kenom. Ich khan mich noch erinere fon ti kuutheet un eerlichkheet woo ich in ti aue fon tiise Yeehoowa sayn Tsayer kesiin hon. Tas waar soo anerste wii tas woo ich keweent waar.

Ich hon aan kefang ti Piipel xtutiire mit Yeehoowa sayn Tsayer. Soo fiil mee wii ich kelërnt hon, mee hon ich kemërekt tas ich mist mayn leepe enere. Eene tekst woo mich aan kekrif hot waar Xpriiche 13:20: “Weer mit kluuche layt um keet, wërt kluuch, awer weer sich mit te tume halt, keets xlecht.” Ich hon kesiin tas ich mist mich wech hale fon ti kanke. Tas waar net laycht, awer mit Yeehoowa sayn hilef hon ich tas kephakt.

Mayn ausiin hot sich aach keënert. Mit fiil aanxtrengung, hon ich noo kelos tsu rauche un trooke penutse. Ich hon mayn lange hoer ap kexnit, hon ti oer ring aus ketuun un noo kelos trekiche wërter saan. Tas waar tas eyerste mool woo ich hat te kontrol iwich mayn leepe.

Ich hon nii kërn keleest un xtutiirt, tes weeche waar tas xlim mich konsentriire im Piipel xtuutyum. Awer ich hon mich aan kextrengt un mit te tsayt hon ich aan kefang Yeehoowa liipe. Tan hot mayn kewise aan kefang mich kweele. Als mool hat ich nekatiiwe xpiirunge un hon ketacht tas Yeehoowa teet mich nii fertsaye weeche ales woo ich kemacht hat. In tiise xtune, was mich ketreest hot waar leese iwich wii Yeehoowa te Kheenich Tawi fertsayert hot weeche sayn kroose sinte. — 2^te Samuël 11:1–12:13.

Tas waar aach net laycht fer mich iwich mayne klaape xpreche in te haus tsu haus preetich aarwayt. (Matheus 28:19, 20) Ich hon een kroos angst kehat, yemant aan trëfe woo ich ferwunt hët orer etwas xlechtes keeche kemacht. Awer lamsam is ti angst ferkang. Ich hon aan kefang woere frayt xpiire fer layt helfe lërne iwich unser wunerliche himlixe Fater Yeehoowa, woo uns soo fertsayert.

Yeehoowa khëne hot mayn leepe keret. Mayn friiriche koleke waare neekst al toot orer in ti katee, awer ich hon wërklich een kuut leepe un ti sicherheet fon een frooe tsukhunft. Ich hon kelërnt teemuutich sin, heere un mich kontroliire. Tes weeche, kepe ich mich yets fiil peser mit ti layt. Ich hon een froo hayrat mit mayn liiplich fraa, Karmen. Mit samer, xpiire mer ti kroos frayt am helfe ti anere iwich ti Piipel lërne.

Ah, yets hon ich een eerlich aarwayt, ich mache etliche pletse sauwer. Als mool mache ich een pank sauwer, awer yets aan xtats tas kelt raus hoole, tuun ich te trek raus hoole!