Iwer leetich een papa woo mit sayn khint fon 7 yoer xprecht. Tee saat: “Fiil tsayt tsurik, hot Kot ti Eyert kemacht un ales was uf tii eksistiirt; Tee hot ti sun, te moont un ti xtërne kemacht.” Noo tee een pisye tenke, tuut tas puupche frooe: “Papa, un weer hot Kot kemacht?”

Te papa antwort: “Nimant hot Kot kemacht. Kot hot imer eksistiirt.” Tiise keweenlich ausleyung is im xtant yets fer tas puupche kenuuch. Awer in ti tsayt woo tee wakst, tuut eyer wayter iwer ti frooch tenke. Tee ferxteet tas net: wii is tas meechlich yemant khee aanfang hon? Soo kaar tas uniwërsum hat een aanfang. Tee tenkt: ‘fon woo is Kot heyer khom?ʹ

Was is ti Piipel sayn antwort? Neekst ti selwich antwort woo te papa fer sayn puupche kep hot, hot Mooses aach kexrip: ‘Oo Yeehoowa,... eeps tuu ti përiche kepoer host orer eep tuu ti eyert un tas fruchtpar lant kemacht host, fon eewichkheet tsu eewichkheet, tuu pist Kot’ (Salmo 90:1, 2) In te selwiche aat, saat te profeet Isaiias: “Meechst tuu tas net wise? Host tas net keheert? Yeehoowa te kriatoer fon te wayteste pletse fon te eyert is kot fer ti kans eewichkheet.”(Isaías 40:28) Judas hot aach in sayn priif kexrip tas Kot xon ‘in ti kans ferkang eewichkheet’ eksistiirt hot. (Judas 25)

Tii tekste tsayche uns tas Kot te “Kheenich fon te eewichkheet” is, wii te aphostel Phaul kexrip hot. (1 Timóteo 1:17) Was petayt tas? Tas petayt tas Kot imer eksistiirt hot, is ekaal wii lang tuu tsurik tenkst. Un tee tuut imer eksistiire. (Apocalipse 1:8) Tas eewiche eksistëns is een fon ti wunerliche kwaliteete woo macht tas Kot te Ale Mechtiche is.

Warom is tas soo xweer se ferxteen? Wayl unser leepe soo khorts is, siin mer ti tsayt anerste wii Yeehoowa siit. Wayl Kot eewich is, tausent yoere sin fer tëm wii eene taach. (2 Pedro 3:8) Een ferklaychung: meecht eene hayxrek woo in sayn aus kewakst leepe, ploos 50 taache leept, unser leepe ferxteen khëne, woo 70 orer 80 yoere sin? Xweerlich, kël? Es is interesant tas ti Piipel saat tas meyer wii hayxreke sin wën se uns ferklaycht mit te Ale mechtiche Kriatoer. Unser ferxtant khan net mool fon wayt ferklaycht wëre mit Yeehoowa sayn. (Isaías 40:22; 55:8, 9) Tan, is es net tsum ferwunere tas mer, wii mënxe, fiil tinge fon Yeehoowa net ferxteen khene.

Wëns aach xweerlich is fer se ferxteen, ti itee iwer een eewiche Kot xtimt. Wën yemant Kot kemacht hët, tan weyer tiise persoon te Kriatoer. Awer wii tii Piipel aus leet, waar Yeehoowa ‘woo ale tinge kemacht hot’. (Apocalipse 4:11) Ale tëm, mer wise tas tas uniwërsum een aanfang hot. (Gênesis 1:1, 2) Fon woo is tas uniwërsum khom? Sayn Kriatoer must foer tëm eksistiirt hon. Te Kriatoer hot xon eksistiirt foer ale anere kluuche kriatuere, wii sayn eensiche Soon un ti ëngele. (Jó 38:4, 7; Colossenses 1:15) Tan is taytlich tas eep Kot aan kefang hot ti tinge mache, hot eyer xon aleen keleept. Tes weeche, is eyer net kemacht kep; wayl niks eksistiirt hot woo hët khene Kot kemacht hon.

Unser aychner eksistëns un fom kans uniwërsum pewayst tas een eewiche Kot eksistiirt. Fer unser kroose uniwërsum in mowimënt xtele un ti kesëtse woo tas kontroliire in sëtse, weyers neetich tas unser Kriatoer imer eksistiirt hët. Ploos eyer khent tas leepe fer ti kanse anere tinge kepe. (Jó 33:4)