In te eyerste yoore fon mayn leepe, hot mayn familye kewoont ticht aan Leipzig, in Taytxlant, aan ti krëns fon Pholant un Txëkix Repuplik. Wii ich 6 yoer alt waar sin mer in auslant kewanert, weeche mayn fater sayn aarwayt. Eyerst hon mer in Brasil kewoont un nochter in Ekwatoer.

Wii ich 14 yoer alt waar, sin ich in een internat xuul in Taytxlant kexikt woer. Wayl mayn eltere in Siit Amërika waare, must ich aleen fer mich soriche. Tes weeche, sin ich selepstxtëntich kewoer. Waar es mich ekaal was ti anere iwich mich kexproch hon.

Wii ich 17 yoer waar, sin mayn eltere tsurik noo Taytxlant khom. Eyerst, sin ich mit tëne woone kang. Awer ich khont net mee unich iire reekele leepe. Wii ich 18 yoer waar, sin ich tehëm fat kang.

Ich hat khee ruu, ich wolt een opjetiiw fer mayn leepe fine. Noo fiil orkanisatsyoone kenau unersuuche, hon ich ëntxlist unser xeene planeet khëne lërne eep ti mënxheet tee kans fersaue teet.

Ich sin kereest mit een moto fon Taytxlant pis Afrika. Awer klaych must ich wiiter tsurik noo Europa khome fer mayn moto flike lose. Tan xpeeter sin ich in Portukaal hin khom. Tat aan een praya, hon ich ti itee kriit net mee reese mit te moto awer mit een kleen xif.

Ich hon mich kesamelt mit een krup fon yunge layt woo sich am perayte waare fer iwich te Atlantik reese. Mit tëne waar Laurie, woo nochter mayn fraa kewoer is. Eyerst, sin meyer tswaay pis Karipe insle kereest mit een kleen xif woo fon wint ketriip wërt. Tan, noo een khorts tsayt in Porto Riko, sin mer wiiter tsurik noo Europa kang. Meyer wolte een kleen wela xif fine un tas umpauer fer een xif mit motoer woo tiine teet wii een haus fer uns. Awer, noo tray moonate must mer noo lose tsu suuche wayl ich keruuft kewoer sin fom militeer fer mayn lant tiine.

Ich hon fer fuftseen moonate ketiint pay tas taytxe marin. In tiise tsayt hon Laurie un ich kehayrat un pleen kemacht fer unser rees. Khorts tsayt eep ich tiine must, hon mer een rump (casco) fon een leepensretung xif khaaft. In te tsayt woo ich ketiint hon, hon ich aan kefang tas umpauer tsu een kleen wela xif. Meyer hon kepleent tat trin woone un foran unser rees torich te planeet mache. Mayn militeer tiinst waar am ën un tas xif waar neekst fërtich un unser rees solt aan fange, tan hon Yeehoowa sayn Tsayer aan unser tiir keklopt un hon mit uns aan kefang ti Piipel xtutiire.

Am aanfang, hon ich net ti neetichkheet kesiin fer fiil ënerunge im leepe mache. Laurie un ich waare yets ferhayrat un hon mim rauche uf keheert. (Ëfeser 5:5) Wayl unser plaan waar torich ti welt reese, tacht ich tas weyer am weyert tas leepe penutse fer Yeehoowa sayn kriatsyoon peopachte.

Awer in woerheet must ich ënerunge mache — haupstseechlich in mayn personaliteet. Ich waar hoochmuutich un hon fiil uf mich selepst ketraut, tes weeche hon ich mich kehal aan mayn aychne apiliteete un was ich xon kemacht hat. Ich hon nuer aan mich selepst ketenkt.

Eene taach, hon ich ti reet woo Yeesus ufm përich kemacht hot keleest. (Matheus, kapitele 5-7) Am aanfang, hon ich mich kewunert iwich was Yeesus saat iwich frooheet. Tsum payxpiil, tee saat tas froo weyere ti layt woo hunger un torst hëte. (Matheus 5:6) Awer ich khont net ferxteen wii ti neetichkheet khent yemant froo mache. Mit te Piipel xtuutyum, hon ich kemërkt tas Yeesus iwich spirituaal neetichkheet kexproch hot, un fer tiise neetichkheet fersoriche mise mer eyerst wise tas mer se hon. Tas is wërklich wii Yeesus saat: “Froo sin tii woo sayn kaystliche neetichkheete erkhëne.” — Matheus 5:3.

Noo tëm woo mer ti Piipel xtuutyum aan kefang hon in Taytxlant, sin mer noo Frankraych kewanert un nochter noo Itaalya. Ekaal woo mer waare, hon mer Yeehoowa sayn Tsayer aan ketrof. Ich hon mich aarich ferwunert mit te woere liip un eenichkheet woo unich tëne waar. Ich hon kemërkt tas tii wërklich een kroos familye in te kans welt sin. (Yoohan 13:34, 35) Mit te tsayt, sin ich un Laurie wii Yeehoowa sayn Tsayer ketaaft woer.

Noo tëm taaf, hon ich wayter ënerunge kemacht in mayn personaliteet. Ich un Laurie hon ëntxlist een rees mache mit unser wela xif langst Afrika un tan iwich te Atlantik Osean pis Nort Amërika. Tat, im mite osean, umringelt mit tausente kiloometer waser, is es mich in ti ketanke khom wii kleen ich waar in ferklaychung mit unser Ale Mechtiche Kriatoer. Ich hat fiil tsayt kehat (ma hat net fiiles tsu tuun in mite osean), tan hon ich mich ti tsayt kenom fer ti Piipel leese. Ti kexichte fon Yeesus sayn leepe uf ti Eyert hon mich ferwunert. Tee waar een perfëkte mënx, mit wunerliche apiliteete, un noch soo, hot tee sich net proosich aan kextelt. Tee hot net eere fer sich selepst kesuucht, awer fer sayn himliche Fater.

Aan Yeesus sayn payxpiil noo tenke, hot mich keholef ferxteen tas Kotes Raych mist tas haupste in mayn leepe sin, tas ich mist mayn meyerst tsayt tat traan pringe un net ploos ti tsayt woo iwrich weyer fon anere interese. (Matheus 6:33) Wii mer, ëntlich mool, in Nort Amërika hin khom sin, hon mer ëntxlist tat woone plaype un in unser aanpeetung uns traan hale.

Eyerst, hon ich mich ploos imer uf mich selepst ferlost un oft mools ketswayfelt op ich ti richtiche ëntxluse mache teet. Awer yets hon ich ti woere kwël fon kluucheet kefun fer mich lenke. (Isaiias 48:17, 18) Un aach een opjetiiw fer mayn leepe kriit — Yeehoowa aan peete un anere layt helfe iim khëne lërne.

Ti oryentiirunge fon te Piipel aan wëne, hot unser hayrat ferxtërkt un Yeehoowa hot uns keseechent mit een xeen meetche woo iim khënt un liipt.

In unser leepe is net imer ales klat ap kelaaft. Awer, meyer sin uns sicher tas Yeehoowa uns heleft nii uf kepe un nii unser fertraung uf iim ferliire. — Xpriiche 3:5, 6.