Carlos: Luís, es is mechtich kuut mit tich iwer ti Piipel xpreche. Tas letste mool, host tuu mich een frooch iwer Kot sayn Raych kemacht. Tuu host mich kefroot warom Yeehoowa sayn Tsayer klaape tas Kot sayn Raych aan kefang hot se rechiire in 1914.

Luís: Yaa, ich waar eene fon ayre puplikatsyoone am leese un tat xteet tas Kot sayn Raych aan kefang hot se rechiire in 1914. Tas hot mich naykerich kelos, wayl teyer saat tas ayre klaape sich aan te Piipel xtaypt.

Carlos: Tuu host recht, meyer mache tas wërklich soo.

Luís: Awer, ich hon xon ti kans Piipel kelees, un ich khan mich net traan tenke iwer een tekst woo iwer 1914 xprecht. Tes weeche, hon ich in een Piipel in te internet “1914” kesuucht, awer niks is foer khom.

Carlos: Ich wil tich konkratuliire, Luís. Eyerst, wayls tuu xon ti kans Piipel kelees host. Ma siit tas tuu Kot sayn Wort liipst.

Luís: Yaa, ich liipe se. Es kept khee puuch soo wii ti Piipel.

Carlos: Is woer. Ich wil tich aach loope wayls tuu ti antwort fon tayn frooch in te Piipel kesuucht host. Tuu host kemacht kraat was ti Piipel saat mer mache sole. Xpriiche 2:3-5 saat tas mer sole ti ferxtëntnis wayter suuche. Es is kuut siin tas tuu tich too traan aan xtrengst.

Luís: Tanke xeen! Un ich wil wayter lërne. In woerheet, hon ich phaar unersuuchunge kemacht, un etliche informatsyoone iwer 1914 kefun im puuch woo mer am xtutiire sin. Tat xprecht iwer een traam woo een kheenich hat. Ich tenke es waar iwer een kroose paam woo ap kehakt waar un nochter noch mool kewakst is.

Carlos: Ah, yaa. Tas is ti profetsii fon Tanyël kapitel 4. Es hot se tuun mit een traam woo Napukotonosoor, te kheenich fon Papiloon, hat.

Luís: Yaa, tas waar tëm sayn naame kewees. Ich hon ti profetsii noo un noo kelees. Awer ich mus tich saan tas ich net ferxtan hon was tas mit Kot sayn Raych un 1914 se tuun hot.

Carlos: Mërk mool, Luís, tas soo kaar Tanyël net ti profetsii kans ferxtan hot!

Luís: Wërklich?

Carlos: Yaa. Tee hot too hiir in Tanyël 12:8 kesaat: “Ich hon keheert, awer net ferxtan.”

Luís: Wii kuut tas ich net aleen sin!

Carlos: Tanyël hot tas net ferxtan wayl es waar noch net Kot sayn tsayt fer ti mënxe tiise profetsiie ferxteen. Awer yets khene mer se ferxteen.

Luís: Wii soo?

Carlos: Mërk mool was te neekste wersikel, te 9 saat: “Tiise wërter mise kehaym un seliirt kehal wëre pis ti tsayt fom ën.” Tan ti layt teete tiise profetsi, ie ferxteen ploos fiil tsayt xpeeter, in te “tsayt fom ën”. Un klaych tuun mer in unser Piipel xtuutyum pewaysunge siin tas mer in tiise tsayt am leepe sin.

Luís: Tan, khanst tuu Tanyël sayn profetsii fer mich aus leye?

Carlos: Ich tuun mich too traan aan xtrenge.

Carlos: Fer se aan fange, wole mer khorts xpreche iwer was te kheenich Napukotonosoor in sayn traam kesiin hot. Tan tuun mer siin was es petayt, khan sin?

Luís: Yaa, khan sin.

Carlos: In tëm traam, hot Napukotonosoor een mechtich kroose paam kesiin woo pis tsum himel kang is. Too hot Kot sayn engel kesaat tas te paam mist ap kehakt wëre. Awer Kot hot kesaat tas te xtam solt ufm pootem plaype. Un tan, noo 7 tsayte, teet te paam noch mool wakse. Tas xteet in Tanyël 4:13-17. Tiise profetsii hot sich eyerst im kheenich Napukotonosoor erfiilt. Tee waar een xtarke kheenich — soo wii een paam woo pis tsum himel keet —, awer tee is torich “7 tsayte” ap kehakt kep. Khanst tuu tich traan tenke was pasiirt is?

Luís: Mmm… nee.

Carlos: Es is khee propleem. Ti Piipel saat tas Napukotonosoor ferikt keplip is torich 7 yoore. Un tes weeche, khont eyer net kheenich torich tiise tsayt sin. Awer am ën fon te 7 tsayte, is Napukotonosoor noch mool kuut kep un hot noch mool aan kefang se rechiire. Tas ales xteet in Tanyël 4:20-36.

Luís: Yaa, pis yets hon ich es ferxtan. Awer, was hot tas mit Kot sayn Raych un 1914 se tuun?

Carlos: In khortse wërter hot tiise profetsii 2 erfiilunge. Ti eyerst erfiilung is pasiirt wii te kheenich Napukotonosoor noo kelos hot se rechiire torich een tsayt. Ti tsweet erfiilung is pasiirt wii Kot noo kelos hot se rechiire torich een tsayt. Tan, ti tsweet erfiilung hot se tuun mit Kot sayn Raych.

Luís: Yaa… awer wii wise mer tas ti profetsii tswaay erfiilunge hat?

Carlos: Een pewaysung xteet in te aychne profetsii. Tanyël 4:17 saat tas ti profetsii is kep woer “tas al woo leepe wise khene tas te Ale Heechste Rechiirente im raych fon te mënxheet is, un tas eyer tas kept fer weem eyer wil”. Host tuu kemërkt ti wërter “raych fon te mënxheet”?

Luís: Yaa, too hiir saat “tas te Ale Heechste Rechiirente im raych fon te mënxheet is”.

Carlos: Richtich. Un weer tenkst tuu is te “Ale Heechste”?

Luís: Ich tenke es xprecht iwer Kot.

Carlos: Kenau. Tan, tiise profetsii is net ploos iwer Napukotonosoor. Es hot aach se tuun mit Kot sayn rechiirung iwer ti mënxheet. Un tas tuut noch peser xtime wën mer kuke was um rom ti profetsii xteet.

Luís: Was wilst tuu too temit saan?

Carlos: Tas puuch Tanyël xprecht noo un noo iwer tas selwiche theema. Tas xprecht ofts iwer ti tsayt wën Kot sayn Raych rechiire tuut, mit Yeesus wii kheenich. Tsum payxpiil, wole mer etliche kapitele tsurik keen. Khanst tuu pite Tanyël 2:44 leese?

Luís: Kewis. Too saat: “In te taache fon tiise kheeniche tuut te Kot fom himel een raych in xtele woo nii fernicht wërt. Un tas raych wërt net fer een aner folek wayter kep. Es tuut ale rayche ferprokle un tsum ën pringe, un ploos tas raych tuut fer imer plaype.”

Carlos: Tanke xeen. Was mënst tuu: meecht tiise tekst iwer Kot sayn Raych am xpreche sin?

Luís: Mmm… ich sin mich net sicher.

Carlos: Nayaa, mërk tas te tekst saat tas “tas raych tuut fer imer plaype”. Tas xtimt mit Kot sayn Raych, awer khene mer tas selwiche saan iwer ti mënxliche rechiirunge?

Luís: Nee, ich tenke net.

Carlos: Es kept aach een aner profetsii in Tanyël woo iwer Kot sayn Raych xprecht. Tas xteet in Tanyël 7:13, 14. Ti profetsii saat iwer een kheenich woo noch khome teet: “Un tee hot hërxaft, eer un een raych kriit, soo tas ale folke, natsyoone un xprooche tëm tiine. Sayn rechiirung is een eewich rechiirung, woo nii een ën kriit, un sayn raych wërt net fernicht.” Host tuu kemërkt iwer was te tekst xprecht?

Luís: Tee xprecht iwer een raych.

Carlos: Yaa, tuu host recht. Un tas is net een keweenliche raych. Too saat tas es autoriteet hot iwer “folke, natsyoone un xprooche”. In anere wërter: tiise Raych tuut ti kans eyert rechiire.

Luís: Es is woer, ich hon tas am aanfang net kemërkt.

Carlos: Mërk mool was ti profetsii aach saat: “Sayn rechiirung is een eewich rechiirung, woo nii een ën kriit, un sayn raych wërt net fernicht.” Tas heert sich neekst ekaal wii ti profetsii fon Tanyël 2:44, kël?

Luís: Yawool.

Carlos: Wole mer khorts noo hoole was mer pis yets kesiin hon. Ti profetsii in Tanyël kapitel 4 is fer ti layt kep woer tas se wise khente tas “te Ale Heechste Rechiirente im raych fon te mënxheet is”. Tiise wërter tsayche tas tiise profetsii hot een tsweete erfiilung, woo net ploos Napukotonosoor petrof hot. Un im puuch Tanyël, fine mer profetsiie iwer ti tsayt woo Kot sayn Raych fest kextelt wërt, mit Yeesus wii sayn kheenich. Tas ales tsaycht tas ti profetsii fon Tanyël 4 xprecht iwer Kot sayn Raych. Xtimts?

Luís: Yaa, tas xtimt. Awer ich ferxteen net was tas mit 1914 se tuun hot.

Carlos: Nayaa, wole mer tsurik tsum kheenich Napukotonosoor keen. Ferkes tich net tas te paam fon te profetsii petayt Napukotonosoor. Tee hot torich 7 tsayte noo kelos se rechiire — tas is pasiirt wii eyer ferikt kep is. Wii eyer noch mool kuut kep is, hot eyer noch mool aan kefang se rechiire. In te tsweet erfiilung fon te profetsii, teet Kot fer een tsayt noo lose se rechiire — awer tas weyer net wayl Kot was ferkheertes kemacht hët.

Luís: Was wilst tuu too temit saan?

Carlos: Ti Piipel saat tas ti israeliitixe kheeniche, woo iwer Yeruusalem rechiirt hon, hon sich uf “Yeehoowa sayn troon” kesets, tëm noo 1^te Kroonike 29:23. Es wil saan: tii hon Kot foer kextan. Sayn rechiirung hot Kot sayn rechiirung petayt. Awer mit te tsayt, hon ti meyerste kheeniche noo kelos Kot aan heere, un ti meyerste israeliiter hon tas selwiche kemacht. Wayl se unfolich waare, hot Yeehoowa kelos ti papilooner tëne iwerfale in 607 F.K. Fon tiise tsayt aan, waar es khee kheenich woo Yeehoowa foer kextan hot in Yeruusalem. Khene mer saan tas Kot hot noo kelos se rechiire. Pis yets, host tuu tas ferxtan?

Luís: Ich tenke yaa.

Carlos: Tan 607 F.K. is tas yoer woo Kot noo kelos hot se rechiire. In tëm yoer, hon ti 7 tsayte aan kefang. Am ën fon te 7 tsayte, teet Kot een naye rechiirente in setse fer Tëm foer xteen — awer yets im himel. In tiise tsayt, weyere ti anere profetsiie fon Tanyël erfiilt. Tan ti wichtich frooch is: wën sin ti 7 tsayte tsum ën khom? Wën mer ti antwort fine, khene mer wise wën Kot sayn Raych aan kefang hot se rechiire.

Luís: Los mich roote: 1914?

Carlos: Kraat uf te naachel!

Luís: Awer wii wise mer tas?

Carlos: Nayaa, wii Yeesus uf te eyert kepreeticht hot, hot eyer kesaat tas ti 7 tsayte noch net rom kang weyere. * Tan, ti 7 tsayte mise een lang tsayt petayte. Tii hon aan kefang hunerte yoore eep Yeesus tsu te eyert khom is, un tii teete noch hale fer een lang tsayt noo Yeesus tsurik tsum himel kang is. Awer tenk tich traan: Tanyël sayn profetsiie teete ploos ferxtan wëre in te “tsayt fom ën”, wii mer in Tanyël 12:9 kesiin hon. Unkefeer in 1870, hon eerliche Piipel xtutënte sich fiil ketanke kemacht mit tiise profetsii un hon tas mit acht noo kekukt. Tii hon aan kefang se ferxteen tas tiise 7 tsayte teete in 1914 tsum ën khome. Un wën mer siin ales was uf te welt pasiirt is fon 1914 aan, siin mer tas Kot sayn Raych hot aan kefang, in tiise yoer, im himel se rechiire. In tëm yoer, hon ti letste taache aan kefang, orer ti tsayt fom ën. Fiil nayes uf een mool, kël, Luís?

Luís: Yaa, is wërklich fiil... Ich mus sicher tas ales noch mool leese fer tas richtich ferxteen.

Carlos: Mach tich khee ketanke. Es hot mich aach een pisye tsayt kenom fer al tiise profetsiie un erfiilunge ferxteen. Awer ich hofe tas unser kexpreech hot tich keholef ferxteen tas Yeehoowa sayn Tsayer xtaype sayn klaape iwer Kot sayn Raych aan te Piipel.

Luís: Yawool, fer mich is es taytlich tas teyer tas macht.

Carlos: Un ich mërke tas tuu wilst tas selwiche mache. Wii ich xon kesaat hon, tas is fiil nayes uf een mool; kewis host tuu noch phaar frooche. Tsum payxpiil, pis yets hon mer kesiin tas ti 7 tsayte mit Kot sayn Raych se tuun hon un tas se in 607 F.K. aan kefang hon. Awer warom saan mer tas se in 1914 tsum ën khom sin?

Luís: Yaa, tas is was ich mich am frooe waar.

Carlos: Ti Piipel helft uns ferxteen wii lang ti 7 tsayte hale. Khene mer too triwer xpreche tas neekste mool woo ich too torich khome? *

Luís: Kewis, fer mich khan sin. Ich waarte tich!