Wii mer im letste artikel kesiin hon, tas wichtiches fer Yeesus waar ti ‘kuute notisye iwich Kot sayn Raych pekhant mache’. (Lukas 8:1) Tee is hunerte kiloometer kelaaft torich Israël fer ti layt in lërne iwich Kot sayn Raych. Ti fier Ewankeelye, woo fertseele iwich sayn preetich aarwayt, xpreche mee wii hunert mool iwich te Raych. Ti meyerst tsayt sin tas Yeesus sayn aychne wërter, awer tas is nuer een teel fon ales was tee kesaat hot iwich Kot sayn Raych. — Yoohan 21:25.

Warom waar te Raych soo wichtich fer Yeesus wii tee uf ti Eyert waar? Yeesus wust tas Kot iim raus kesuucht hat fer te Kheenich fon tiise Raych sin. (Isaiias 9:6; Lukas 22:28-30) Awer tee wolt net macht orer eere kriin. (Matheus 11:29; Markus 10:17, 18) Wii Yeesus te Raych pekhant kemacht hot, tacht tee net aan sich selepst. Kot sayn Raych waar un is noch wichtich fer Yeesus * haupstseechlich weeche ales kuutes woo tiise Raych wërt mache fer tëne woo eyer liipt — sayne himliche Fater un sayn tisipele.

Yeesus liipt seer sayne himliche Fater. (Xpriiche 8:30; Yoohan 14:31) Tee hot soo kërn tëm sayn xeene kwaliteete, wii liip, mitlayt un kerechtichkheet. (Teuteronoomyum 32:4; Isaiias 49:15; 1 Yoohan 4:8) Sicher, is es tes weeche tas Yeesus ti liieray iwich sayne Fater hast, soo wii: tas Kot sich niks traus macht wën ti mënxe layte un tas tee soo kaar wil tas se layte sole. Tas is eene fon te motiiwe woo kemacht hot tas Yeesus sich soo traan kehalt hot aan ti ‘kuute notisye fom Raych’ preetiche — tee wust tas te Raych teet tëm Fater sayne naame sauwer mache fon te kans liieray. (Matheus 4:23; 6:9, 10) Wii teet tas pasiire?

Torich te Raych, wërt Yeehoowa kroose ënerunge fer ti mënxe mache. ‘Tee tuut yeete treene’ fon ti troye mënxe sayn aue ap trokne. Yeehoowa wërt soo kaar ti uersache fon te treene am ën mache — tas kept net mee ‘toot, traurichkheet, krayxe un phayn’. (Apokalipsis 21:3, 4) Torich te Raych, wërt Kot ti kans eelent tsum ën pringe. *

Khee wuner tas Yeesus soo een kroos wunx hat fer mit te layt iwich te Raych xpreche! Tee wust tas tiise Raych tsayche teet tas sayne Fater seer mechtich un parmhërtslich is. (Tyako 5:11) Yeesus wust aach tas te Raych teet fer ti troye mënxe fiil kuutes pringe.

Fer een lang tsayt, eep Yeesus uf ti Eyert khom is, hot tee im himel mit sayne Fater keleept. Torich Yeesus, hot te Fater ales kemacht — ti wunerliche himele, mit soo fiil xtërne un kalaksiie tas ma se net tseele khan, un unser xeen welt mit soo fiil tiere. (Koloser 1:15, 16) Awer, fon ti kans kriatsyoon hot Yeesus te liipst ti mënxheet. — Xpriiche 8:31.

Ti liip tsu ti mënxe waar tas haupste in Yeesus sayne tiinst. Fon aanfang aan, hot tee klaar ketsaycht tas eyer uf ti Eyert khom weyer fer ‘kuute notisye pekhant’ mache fer tëne woo hilef praychte. (Lukas 4:18) Awer Yeesus hot net ploos kexproch, tee hot noo un noo ketsaycht tas tee ti layt liipe teet. Tsum payxpiil, wii een kroos folek sich kesamelt hot fer iim horiche, “hot tee se ketauert un ti kranker keheelt”. (Matheus 14:14) Wii een man mit lepra kesaat hot tas Yeesus iim heele khent wën tee nuer wolt, hot Yeesus liip ketsaycht. Tee saat in een liiplich aate: “Ich wil es. Kep rayn”. (Lukas 5:12, 13) Een aner mool, wii Yeesus kesiin hot wii sayn fraaynt Maria keprilt hot wayl iire pruuter, Lasaro, toot waar, hot tee ‘keyomert im kayst’, ‘unruych kewoer’ un ‘hot keprilt’. (Yoohan 11:32-36) Tan, hot Yeesus ale ferwunert un hot Lasaro fom toot uf keruuft,  ale tëm tee xon fier taache toot waar! — Yoohan 11:38-44.

Sicher wust Yeesus tas, in tiise tsayt, was tee kemacht hot fer ti mënxe helfe, teet net fer imer aan hale. Tee wust tas mit ti lënk, ale tii woo eyer keheelt hat, khente wiiter krank wëre un tii woo eyer fom toot uf keruuf hot teete wiiter xtërpe. Awer Yeesus wust aach tas Kot sayn Raych teet fer imer mit ale propleeme am ën mache. Tës weeche hot tee net ploos wunere kemacht, awer hot flaysich ti “kuute notisye” fom Raych kepreeticht. (Matheus 9:35) Sayn wunere waare nuer een kleene tsayche fon was Kot sayn Raych uf ti kans Eyert hatich mache wërt. Kuk ti piiplixe ferxprechunge fon tiise tsayt.

•  Khee krankheet mee

  “In tiise tsayt tuun ti aue fon te pliinte uf keen, un ti oore fon te thaape wëre uf kemacht. In tiise tsayt tuun ti laame wii een ree hupse, un ti tsung fon tëne woo net xpreche khene, tuut yukse.” Un aach, “khee pewooner tuut saan: ‘Ich sin krank.”’ — Isaiias 33:24; 35:5, 6.

• Khee toot mee

  “Ti kerechte tuun ti eyert kriin, un tuun fer imer too truf woone.” — Psalm 37:29.

  “Eyer tuut te toot fer imer wech xafe, un te Soweraan Hër Yeehoowa tuut ti treene fon ale kesichte ap trokne.” — Isaiias 25:8.

• Ti toote wëre wiiter leepe.

  “Al tii woo in te kreeper sin, tuun tëm sayn xtim heere un raus khome.” — Yoohan 5:28, 29.

  “Tas kept een ufxtaye fom toot.” — Aphostele sayn Kexicht 24:15.

• Too wërt woonung un aarwayt fer ale sin.

  “Tii tuun hayser paue un in tëne woone; un tuun traupe kriste plantse un tëne sayn friichte ese. Tii tuun net paue fer anere trin woone, un aach net plantse fer anere ese. . . . Mayn raus kesuuchtner tuun ti aarwayt fon sayn aychne hënt kans aus nutse.” — Isaiias 65:21, 22.

•  Khee kriich mee.

  “Tee tuut ti kriiche in te kans eyert tsum ën pringe.” — Psalm 46:9.

  “Ti natsyoone tuun net mee tas xwaart eene keeche te anere uf heepe, Un tuun se aach net mee te kriich lërne.” — Isaiias 2:4.

• Khee hungernoot mee.

  “Ti eyert kept tan sayn ërnt. Kot, unser Kot tuut uns tan seechne.” — Psalm 67:6.

  “Es tuut tan aarich fiil sereaal uf te eyert kepe, soo kaar uf te kiple fon te përiche wërt es iwer fiil kepe.” — Psalm 72:16.

• Khee aarmheet mee.

  “Te aarme wërt net fer imer ferkest.” — Psalm 9:18.

  “Tee tuut ti aarme woo hilef ferlange fray mache, un aach tee woo in noot is un al tii woo khee hilfe hon. Tee tuut mitlayt fon tëm keweenliche un te aarme hon, un retet ti aarme sayn leepe.” — Psalm 72:12, 13.

Yets woos tuu tiise ferxpreche keleest host, khanst tuu peser ferxteen warom Kot sayn Raych soo wichtich fer Yeesus is? Wii tee uf ti Eyert waar, hot tee sich aan kextrëngt fer iwich te Raych xpreche mit al woo heere wolte, wayl tee wust tas te Raych teet tsum ën pringe ti mënxheet sayn kanse propleeme.

Hon tiise ferxpreche fom Raych tich kefal? Tan, wii khanst tuu mee triwer lërne? Un was must tuu mache fer nuts hon fon tiise ferxpreche? Te letste artikel fon tiise sekwëns pringt ti antwort.