Carlos: Kuut tich noch mool siin, Luís. Es is imer kuut yeete woch ti Piipel mit tich xtutiire. Wii pist tuu traan?

Luís: Es keet mich kuut, tanke xeen.

Carlos: Ich sin froo tas es tich kuut keet. Tas letste mool woo ich too waar, hon mer kexproch iwer warom Yeehoowa sayn Tsayer klaape tas Kot sayn Raych aan kefang hot se rechiire in 1914. * Un meyer hon een wichtich phunkt too triwer kelees in Tanyël kapitel 4. Khanst tuu tich noch traan tenke was mer kelees hon?

Luís: Ich tenke es waar iwer een traam fom kheenich Napukotonosoor, iwer een kroos paam.

Carlos: Yaa, kenau. In sayn traam, hot Napukotonosoor een mechtich kroos paam kesiin, woo pis tsum himel kang is. Too, hot een engel fon Kot kesaat tas te paam solt ap kehakt wëre; awer sayn xtam un wortsle solte ufm pootem plaype. Un noo “7 tsayte”, teet te paam noch mool wakse. Meyer hon tas in Tanyël 4:23-25 kelees. Meyer hon aach kexproch tas ti profetsii tswaay erfiilunge hot. Khanst tuu tich traan tenke was ti eyerst erfiilung waar?

Luís: Es waar etwas woo mim kheenich Napukotonosoor pasiirt is, kël? Tee is ferikt torich 7 yoore keplip.

Carlos: Yaa, kans richtich. Un wayl Napukotonosoor ferikt kep is, hot eyer noo kelos fer een tsayt rechiire. Awer, in te tsweet erfiilung fon tiise profetsii, teet Kot noo lose torich 7 tsayte rechiire. Wii mer xon kesiin hon, ti 7 tsayte hon aan kefang wii Yeruusalem fernicht kep is in 607 F.K. Fon tii tsayt aan, waare khee mee kheeniche uf te eyert woo Kot sayn rechiirung foer kextan hon. Awer am ën fon te 7 tsayte, teet Kot een Rechiirente im himel in setse fer iwer Kot sayn folek rechiire. In anere wërter, am ën fon te 7 tsayte, teet Kot sayn himlixe Raych aan fange se rechiire. Meyer wise xon wën ti 7 tsayte aan kefang hon. Un wën mer raus kriin wii lang se ketauert hon, khene mer wise wën Kot sayn Raych aan kefang hot se rechiire. Xtimt tas pis yets?

Luís: Yaa, ich khan mich yets peser traan tenke aan was mer letste mool kesiin hon.

Carlos: Wii kuut tan. Tan, wole mer yets siin wii lang ti 7 tsayte ketauert hon. Ich hon ti kleenichkheete noch mool kelees un ich fersuuche tas tich aus leye.

Luís: OK, khan sin.

Carlos: In te eyerst erfiilung iwer Napukotonosoor, hon ti 7 tsayte 7 yoore ketauert. Awer in te tsweet erfiilung, iwer Kot sayn Raych, hon ti 7 tsayte fiil lënger ketauert.

Luís: Wii khanst tuu soo was saan?

Carlos: Eyerst, eriner tich tas tiise 7 tsayte hon aan kefang se tseele wii Yeruusalem fernicht kep is in 607 F.K. Wën mer fon tat aan 7 yoore ap tseele, khome mer tsu 600 F.K. Awer niks wichtich is in tëm yoer pasiirt woo se tuun hot mit Kot sayn raych. Een aner pewaysung is was mer xon kesaat hon; tas fiile yoore xpeeter, wii Yeesus uf te eyert waar, hot eyer ketsaycht tas ti 7 tsayte noch net am ën waare.

Luís: Yaa, yaa. Ich khan mich traan tenke.

Carlos: Tan, ti 7 tsayte mise fiil lënger tauere wii ploos 7 yoore.

Luís: Wii lang sin se tan?

Carlos: Tas puuch Apokalipsis helft uns ferxteen tas puuch Tanyël. Un tas helft uns raus fine wii lang ti 7 tsayte hale. Apokalipsis 12:6, 14 un te noote tsayche tas 3 un halpe tsayte petayte 1.260 taache. Tan, 7 tsayte — tas topelt fon 3 un halpe tsayte — petayte 2.520 taache. Xtimt tas noch fer tich?

Luís: Yaa, kewis. Awer, ich khan noch net ferxteen wii tas tsaycht tas Kot sayn Raych aan kefang hot in 1914 rechiire.

Carlos: Yaa, meyer tuun tas yets siin. Als mool, in te piiplixe profetsiie, een taach petayt een yoer. Tas xteet, tsum payxpiil, in Nuumere 14:34 un Esekyël 4:6. Wën een taach een yoer petayt, teete ti 7 tsayte 2.520 yoore petayte. Wën mer in 607 F.K. aan fange, un tan 2.520 yoore ap tseele, khome mer tsu 1914. Tes weeche, saan mer tas 1914 is wën ti 7 tsayte rom kang sin; un in tëm yoer, hot Yeesus wii Kheenich fon Kot sayn Raych aan kefang se rechiire. Meyer siin aach tas, fon 1914 aan, fiile piiplixe profetsiie iwer ti letste taache hon sich erfiilt.

Luís: Was fer profetsiie?

Carlos: Kuk mool, tsum payxpiil, was Yeesus kesaat hot in Matheus 24:7. Mërk mool was eyer kesaat hot iwer ti tsayt woo eyer teet im himel aan fange wii kheenich rechiire: “Natsyoon tuut sich keeche natsyoon xtele un raych keeche raych; un es wërt hungernoot un eyertxutere uf een plats noom aner kepe.” Mërk mool tas Yeesus kexproch hot iwer hungernoot un eyertxutere. Tas pasiirt fiil in unser tsayte, kël?

Luís: Yaa, is woer.

Carlos: Yeesus hot aach kesaat tas kriiche teete pasiire soo lang wii eyer Kheenich in Kot sayn Raych weyer. Un Apokalipsis 6:4 saat aach tas kriiche uf te kans welt pasiire teete in te tsayt fom ën. Khanst tuu tich traan tenke wën te 1^te Welt Kriich aan kefang hot?

Luís: In 1914, tas selwiche yoer woo Yeesus aan kefang hot se rechiire! Oya! Ich teet nii tas mërke.

Carlos: Wën mer ti profetsii iwer ti 7 tsayte mit anere profetsiie iwer ti tsayt fom ën ferklayche, is es taytlich tas ales xtimt. Yeehoowa sayn Tsayer sin sich sicher tas Yeesus aan kefang hot se rechiire wii Kheenich fon Kot sayn Raych in 1914, un tas ti letste taache im selwiche yoer aan kefang hon.

Luís: Yaa, es is een pisye xweyer fer mich tas ales ferxteen.

Carlos: Ich khan tich ferxteen. Wii ich kesaat hon, tas waar net laycht fer mich. Awer ich hofe tas unser kexpreech hot tich keholef se ferxteen tas opwool 1914 net in te Piipel xteet, tuun Yeehoowa sayn Tsayer sayn klaape iwer tiise yoer wërklich aan te Piipel xtaype.

Luís: Yaa, tuu tuust imer ti Piipel penutse fer pewayse was tuu saast. Tas is iwer kuut. Is net ploos was tuu mënst. Awer ich frooe mich warom is tas soo xweyer. Warom hot Kot net ploos uns kesaat tas Yeesus teet aan fange im himel se rechiire in 1914?

Carlos: Tas is een kuut frooch, Luís. In woerheet, kepts fiile tinge in te Piipel woo net laycht sin fer se ferxteen. Tan, warom meecht ti Piipel soo kexrip kep sin? Meyer khene too triwer xpreche in een aner mool.

Luís: Khan sin.