Ich sin kroos kewakst in een aarm plats in ti xtat fon Montreal. Wii ich seks moonate waar is mayne papa kextorep. Tan must mayn mama aleen sich ti familye iwer nëme. Ich waar te yingste fon acht khiner.

Mit te tsayt hon ich aan kefang um keen mit troke, xpiile, kewaltiche layt un kriminoose. Wii ich tseen yoer alt waar, hon ich aan kefang kleene aarwayte mache fer unmoraale fraae un fer tëne woo kelt leene mit hooche tsinse. Ich hon oft keloo un tas hot mich richtich xpas kemacht ti layt hinerkeen. Tas waar fer mich xon een aankewoonung.

Wii ich unkefeer 14 yoer waar, waar ich xlau fer uf fiile aate anere hinerkeen. Tsum payxpiil, ich hon fiile uere, aarem pënt un finger ringe khaaft woo iwertsoo waare mit kolt. Tan hon ich truf kexrip “kolt 14 karaat” un hon tas ferkhaaft ufm weech un aach in pletse tich am shoppings woo ti layt sayn autos kelos hon. Tas waar wunerlich fer mich soo laycht kelt kriin. Een mool hon ich 10 tausent kanatixe tolare kriit in eene taach!

Wii ich 15 yoer waar, hon se mich faart kexikt fon een haymat fon te rechiirung fer yunge woo xlechte tinge kemacht hon. Ich hat khee plats fer woone. Ich hon ufm weech kexloof, prasas orer pay pekhante.

Weeche mayn aktiwiteete woo keeche ti kesetse waare, sin ich ofts aus kefroot woer fon te polise. Awer, wayl ti tinge woo ich ferkhaaft hon, net kextool waare, sin ich nii in kexpërt woer. Awer ich hon xweer multe petsaalt wayl ich falx tings ferkhaaft hon un hat khee erlaupnis fer tinge ferkhaafe. Wayl ich fon nimant angst hat, hon ich als kexaft fer leener un hon tsurik ferlangt tas kelt woo ti layt sich keporicht hon. Tas waar kefeerlich, tes weeche, hon ich als een wafe mit kenom. Als mool, hon ich tsu tuun kehat mit kriminaale orkanisatsyoone.

Te eyerst kontakt woo ich mit te Piipel hat, waar wii ich 17 yoer alt waar. Mayn xetsye, woo ich mit kewoont hon, hat aan kefang ti Piipel xtutiire mit Yeehoowa sayn Tsayer. Awer ich hat net aan kenom ti moraalix muste fon te Piipel. Tan hon ich se kelos un sin mit een anert fraa woone kang woo ich aach xon namoriirt hon.

Awer mayn tsweet xetsye hot aach aan kefang xtutiire mit Yeehoowa sayn Tsayer! Fon tat aan hon ti tinge sich keënert. Tas hot mich kewunert wii te xtuutyum fon te Piipel tëne sayn leepe ferënert hot. Tii waar yets tsaamer un ketultich. Ich hon aan kenom uf een fersamlung im Raych Saal fon Yeehoowa sayn Tsayer keen. Tat hon fraayntliche un ferxtëntiche layt mich kuut aan kenom. Was fer unerxiit fon te welt woo ich keweent waar. Ich hon nii kexpiirt tas mayn familye mich keliipt hot. Wii ich kleen waar hon ich net kexpiirt tas mayn familye mich keliipt hot un sich um mich kekhimert. Ti kuutheet woo Yeehoowa sayn Tsayer tsu mich ketsaycht hon waar kraat was ich praucht. Wii tii mich een Piipel xtuutyum aan kepoot hon, hon ich tas aan kenom mit frayt.

Was ich fon te Piipel kelërnt hon, hot kans sicher mayn leepe keret. Ich hat kepleent mit tswaay koleke xteele keen fer mayn xulte fom xpiile petsaale. Tas waar mee wii 50 tausent kanatixe tolare. Kans kuut tas ich net mit kang sin. Mayn friirixe koleke sin hin kang un eene is in te katee khom, un te anere is um khom.

Wii ich foran ti Piipel xtutiirt hon, hon ich kesiin tas ich mist ënerunge mache. Tsum payxpiil, ich hon keleest in te Piipel in 1 Korinter 6:10: “Ti xpitspuupe, ti kiiriche, ti sifer, layt woo anere pelaytiche un tii woo anere uner trike fer etwas se kriin, tuun Kot sayn Raych net ërpe.” Wii ich tiise wërse keleest hon, hon ich aan kefang tsu prile, wayl ich ferxtan hon wii xlecht mayn situatsyoon weyer. Ich hon ferxtan tas ich mist mich kans ferënere. (Romaaner 12:2) Ich waar kewaltich un krop, un mayn kans leepe hot sich aan liieray kehal.

Awer torich mayn Piipel xtuutyum, hon ich kelërnt tas Yeehoowa parmhërtslich is un uns fertsayert. (Isaiias 1:18) Ich hon fiil kepeet un hon aan kehalt fer Yeehoowa tas tee solt mich helfe im xtich lose tas leepe woo ich eyerst hat. Mit tëm sayn hilef, lamsam hon ich aan kefang mayn personaliteet ënere. Een wichtiche xrit waar wii ich un mayn xetsye uns ufm kericht ferhayrat hon.

Mit 24 yoer, waar ich ferhayrat un hat tray khiner. Yets, must ich een ferninftich aarwayt fine. Awer ich hat khee aarwayts referents un aach net fiil xuul. Noch mool, hon ich aan kehalt aan Yeehoowa. Tan, hon ich aan kefang aarwayt suuche. In ti entrewiste, hon ich kesaat tas ich wolt mayn leepe ënere un wolt uf een eerlich aat xafe. Als mool, hon ich aus keleet tas ich teet ti Piipel xtutiire un wolt een peser mënx wëre. Fiil hon mich net aan kenom. Tsum ën, wii ich kans austriiklich iwich mayn friirix leepe kexproch hon, in een entrewist, hot te man kesaat: “Ich wees net kenau warom, awer etwas saat mich tas ich sol tich aan nëme.” Ich sin mich sicher tas tas waar ti antwort fon mayn kepeete. Mit te tsayt, sin ich un mayn fraa ketaaft woer wii Yeehoowa sayn Tsayer.

Hayt leepe ich wayl ich ti piiplixe oryentiirunge aan wëne un leepe wii een krist. Ich hon een xeen familye un hon een sauwer kewise, wayl ich wees tas Yeehoowa mich fertsayert hot.

Tas sin xon 14 yoer woo ich tiine wii een fol tsayt pyoneer, un helfe anere lërne iwich ti Piipel. Khërtslich, hot mayn fraa aach aan kefang mit mich in tiise aarwayt. In ti letste 30 yoore, hon ich 22 fon mayn aarwayts koleke keholef Yeehoowa sayn tiiner wëre. Ich keen noch in shoppings, net fer layt hinerkeen, awer fer xpreche iwich mayne klaape. Yets wil ich fer tëne etwas kepe: ti hofnung fer im tsukhunft in eene welt leepe woos khee hinerlistiche layt kept. (Psalm 37:10, 11.)