Ich sin kroos kewakst in Los Angeles, California, Fereenichte Xtaate fon Amërika, in etliche pletse woo pekhant waare weeche ti troke un ti gangues. Ich waar tas tsweete fon 6 khiner kewees.

Mayn mama hot uns imer tsu een ewankeelix khërich kenom. Awer wii ich in mayn yunge yoore waar, hon ich aan kefang een topelt leepe nëme. Suntaachs, hon ich in te khoer fon te khërich kesung. Awer te rest fon te woch, waar mayn leepe ploos feste, troke un sëks.

Ich sin imer klaych pees kep un waar wyolënt kewees. Wën ich kextrit hon, ales was foer mich waar khent wii een waf penutst wëre. Was ich in te khërich kelërnt hat, hot mich net keholef. Ich hon imer kesaat: “Ti winkans is fon tëm Hër… un ich sin tëm sayn kexër!” Wii ich in te ensino médio waar, hon ti itee fon een politixe krup mich tiif petrof. Tes weeche, hon ich aan kefang teel mache fon een krup woo wolt aach ti mënxliche rechte xitse. Meyer hon ofts protëste orkanisiirt, un tes weeche hon se als mool ti xuul tsu kemacht.

Wayl ich aarich wyolënt waar, ploos protëste mache waar net kenuuch fer mich. Too, hon ich aan kefang krime mache weeche has. Tsum payxpiil: als mool, hon ich un mayn froynte etliche fiilme kekukt woo kexproch hon iwer wii ti afrikanixe sklaawe fiil mit kemacht hon in te Fereenichte Xtaate fon Amërika. Meyer sin soo pees kep, tas mer atakiirt hon yunge wayse layt woo tat im cinema waare. Tan sin mer pis een nochperxaft kang woo wayse layt kewoont hon fer noch mee layt ferklope.

Wii ich unkefeer 18 yoore alt waar, waare ich un mayn priiter xon pekhant wii wyolënte kriminoose. Ofts hate mer propleeme mit te polise. Eene fon mayn yinger priiter waar teel fon een pekhant gangue, un ich hon aan kefang mit tëne keen. Mayn leepe is yeete taach xlechter kep.

Ti eltere fon eene froynt waare Yeehoowa sayn Tsayer kewees. Tii hon mich in kelaat fer een fersamlung un ich sin kang. Xon am aanfang, khont ich siin tas Yeehoowa sayn Tsayer anerste sin. Yeete eene hat sayn Piipel un tii hon se aach in te fersamlunge penutst. Soo kaar yunge layt hon reete kemacht! Was mich aach ferwunert hot, waar tsum wise kriin tas Kot een naame hot, Yeehoowa, un siin ti layt tëm aach penutse. (Psalm 83:18) Layt fon fiile lënter waare teel fon te kemaynt, awer es waar taytlich tas se net too teweeche keteelt waare.

Am aanfang, wolt ich net ti Piipel mit Yeehoowa sayn Tsayer xtutiire; awer ich hon kërn ti fersamlunge kekukt. Een nacht, in te tsayt woo ich in te fersamlung waar, sin etliche fon mayn froynte tsu een show kang. Tat hon se een yunge puup pis tsum toot ferklopt wayl eyer wolt net sayn leter yaker tëne kepe. Te neekste taach, hon se sich keproost too triwer. Soo kaar wii se foer tas kericht waare, hon se xpiileray too triwer kemacht. Ti meyerste fon tëne hon een xrooe xtroof kriit: tas kanse leepe in te katee plaype. Ich waar mechtich froo tas ich net mit tëne kang sin in tiise nacht. Ich hon ëntxlist mayn leepe ënere un aan fange ti Piipel se xtutiire.

Ich hon ofts kesiin ti layt sich naner hase weeche ti ras. Tes weeche, es hot mich aarich ferwunert siin wii Yeehoowa sayn Tsayer sich naner pehantelt hon. Tsum payxpiil: wii een wayse man, woo Yeehoowa sayn Tsayer waar, tsu een aner lant reese must, hot eyer sayn khiner mit een xwats familye kelos. Een ways familye hot aach in sayn haus aan kenom een xwatse yunge man woo praucht een plats fer se leepe hon. Tas hot mich sicher kelos tas Yeehoowa sayn Tsayer aan wëne Yeesus sayn wërter in Yoohan 13:35: “Torich tas, tuun al wise tas teyer mayne tisipele sayt: wën teyer liip unich aych hot.” Ich wust tas ich woere priiter un xwestere kefun hat.

Weeche mayn Piipel xtuutyum, hon ich ferxtan tas ich mist mayn ketanke ënere. Ich mist aach mayn personaliteet ënere un imer friitlich, net wyolënt, mit te anere sin. Ich must aach ferxteen tas es ti pest aat fer se leepe waar. (Romaaner 12:2) Xrit noo xrit, hon ich mayn leepe keënert. Un in yanuer fon 1974, hon ich mich taafe kelos wii Yeehoowa sayn Tsayer.

Soo kaar noo mich taafe lose, must ich noch wayter mich aan xtrenge fer mayn wuut kontroliire. Tsum payxpiil: een mool, wii mer haus tsu haus am preetiche waare, hot een xpitspuup te ratyo fon mayn khare kextool. Ich sin tëm noo kexprung, awer wii ich xon ticht waar, hot eyer te ratyo fale kelos un is aus keris. Ich hon fer ti anere in te krup fertseelt wii ich te ratyo tsurik kriit hon. Too hot een elteste mich kefroot: “Was hëst tuu kemacht, Stephen, wëns tuu tëm kefang hëst?” Tiise frooch hot mich tenke kemacht un hot mich uf kemuut wayter traan xafe fer friitlicher sin.

Ich hon aan kefang fol tsayt in te preetich aarwayt xafe in oktooper fon 1974. Xpeeter, hon ich aan kefang se xafe wii fraywilich tiiner in te haupst sets fon Yeehoowa sayn Tsayer, in Brooklyn, Nay York. In 1978, sin ich tsurik tsu Los Angeles kang fer mayn muter woo krank waar, uf phase. Tswaay yoore xpeeter, hon ich mich ferhayrat mit mayn liip fraa, Aarhonda. Tii hot mich keholef mayn mama uf phase pis se kextorep is. Een tsayt xpeeter, hon ich un Aarhonda ti Xileat Xuul kemacht. Meyer sin tsu Panamaa kexikt kep, un mer tuun wayter too wii misyoneere tiine.

Ich khent mich wyolënt aan kextelt hon in fiile situatsyoone woo ich torich ti yoore mit kemacht hon. Awer ich hon kelërnt fat keen wën ti layt mich uf kehetst hon orer een aner aat fine fer ti situatsyoon friitlich resolwiire. Mayn fraa un anere hon mich keloopt weeche mayn aanxtelung in tiise situatsyoone. Mayn aanxtelung hot soo kaar mich selepst ferwunert! Ich khent nii tiise ënerunge mit mayn aychne kraft mache! Ich klaape tas es ploos meechlich is weeche ti kraft fon te Piipel. (Hepreeyer 4:12)

Weeche ti Piipel, hon ich een opjetiiw im leepe un ich sin wërklich een friitlich persoon kep. Ich tuun ti layt net mee ferklope; nee, yets tuun ich se helfe Kot peser khëne lërne. Ich hon soo kaar ti Piipel xtutiirt mit eene man woo waar mayn faynt in te ensino médio kewees! Noo sayn taaf, hon mer fer een tsayt im selwich haus kewoont, un mer sin noch kuute froynte. Pis hayt, hon ich un mayn fraa xon mee wii 80 layt keholef Yeehoowa sayn Tsayer wëre.

Ich sin mechtich petanklich tsu Yeehoowa. Weeche tëm, hon ich een froo leepe mit een opjetiiw un fiile woere froynte.