Ich sin kepoer in Akul, een isoliirt xtat uf ti përiche fom oëst Kwatemaala. Mayn familye waar ixil, een etnixe krup ap xtant fon ti mayas. Fon khint aan xpreche ich xpaanix un aach ixil, ti xprooch fon mayn folek. Ich waar khint kewees in een xlim tsayt wii Kwatemaala in kriich waar, tee hat 36 yoore aan kehal. In tiise tsayt, sin fiil ixiles umkhom.

Wii ich 4 yoer alt waar, mayne elste pruuter, woo 7 yoer waar, hot kexpiilt mit een kranaat, un ti is ferplatst. Tes weeche, sin ich plint kewoer un mayne pruuter is umkhom. Noo tas, hon se mich hin ketuun fer woone in een instiitut fer pliinte khiner in ti Xtat fon Kwatemaala, tat hon ich prayle kelërnt. Tat, ich khont net ferxteen warom, awer ti woo tat kexaft hon, hon mich ferpoot mit ti anere khiner fertseele, un mayne koleke hon sich ap kelënkt fon mich. Ich hon mich soo aleen kexpiirt un tas hot mich imer ti tsayt tsu lang ketauert pis ti tswaay monete im yoer khom sin woo ich khont hëm keen pay mayn mama, ti waar imer kuut un liiplich. Unkliklich, ti is kextorep wii ich 10 yoer waar. Ich hon kexpiirt tas ich hot ferloer te eensiche persoon woo mich wërklich keliipt hot. Tas waar soo xlim fer mich.

Wii ich 11 yoer waar sin ich tsurik kang tsu mayn xtat fer mit mayne xtiif pruuter un sayn familye woone. Tii hon mich in materyaalixe aat fersoricht, awer nimant khont mich helfe um kheen mit was ich kexpiirt hon. Als mool hon ich tsu Kot kesaat: “Warom is mayn mama kextorep? Warom mus ich plint sin?” Ti layt hon mich kesaat tas was pasiirt waar weyer Kot sayn wunx. Tan hon ich aan kefang se tenke tas Kot teet sich niks traus mache un weyer unkerecht. Ich hon mich net umkepracht wayl ich wust net wii tas mache.

Plint sin hot kemacht tas ich khont laycht ferletst wëre in emotsyonaal un fiisix aat. Wii ich khint waar hon se mich sëksuaal xaate kemacht oft mools. Ich hon tas nii aan kep —  ich hon ketenkt tas nimant teet sich khimere mit mich. Ich hon mit nimant fertseelt un ti layt hon aach un aach neekst nii mit mich kexprooch. Ich waar traurich, aleen, un hon uf nimant ketraut.

Am aanfang fon mayn yunge yoore, een pheyerche fon Yeehoowa sayn Tsayer is mit mich fertseeler khom in ti xuul wii es friixtik waar. Een leerin hot mich ketauert un hot ferlangt tas ti tas mache solte. Tii hon mit mich kexproch iwich ti piiplix hofnung tas ti toote wiiter uf xtaye teete un tas eene taach teete ti pliinte wiiter siin. (Isaiias 35:5; Yoohan 5:28, 29) Opwool ich pleet waar, tii waare ketultich un kuut un hon foran mich ti Piipel in kelërnt. Fer in mayn xtat hin khome, muste tii mee wii 10  khilomeeter laafe un iwich ti përiche keen.

Mayne xtiif pruuter hot aus keleet tas ti weere een pheyerche woo teet sich kuut aan tsiie, awer hëte weenich kelt. Awer toch, hon tii uf richtiche interes aan mich ketsaycht un hon mich kleene kexenke kepracht. Fer mich, nuer ti woere kriste teete sich soo interesiire um anere un liip tsayche.

Ich hon ti Piipel kelërnt in puplikatsyoone in prayle. Opwool ich ferxtan hon was ich am lërne waar, in mayn hërts, etliche tinge waare xweer fer aan neme. Tsum payxpiil, waar xweer klaape tas Kot wërklich sich khimere teet mit mich un tas anere mich aach liipe teete soo wii Kot mich liipt. Ich hat ferxtan warom Yeehoowa foerlaywich net ti xlechte tinge um halt, awer tas waar net laycht fer mich tenke aan Kot wii eene liipliche fater. *

Mit ti tsayt, was ich fon te Piipel kelërnt hon, hot mayn ketanke keënert. Tsum payxpiil, ich hon kelërnt tas Yeehoowa ferxteet uns wën mer layte tuun. Iwich sayn tiiner woo xlecht pehantelt waare, Kot saat: “Sicher hon ich kesiin mayn folek sayn eelent ... un ich wees kenau wii se layte.” (Eeksotus 3:7) Wii ich aan kefang hon liipe Yeehoowa sayn liipliche kwaliteete, hon ich entxlist mayn leepe fer Yeehoowa kepe. In 1998, sin ich ketaaft woer wii Yeehoowa sayn Tsayer.

Unkefeer een yoer noo mayne taaf, hon ich aan kefang in een xuul keen fer pliinte in ti xtat Escuintla. Een elteste fon ti lokaal kemaynt hot tsu wise kriit tas tas xweer weyer uf ti fersamlunge keen in ti rechyoon woo ich kewoont hon. Ti tichts kemaynt waar uf ti anert sayt fon te përiche fon woo tas pheyerche khom is fer ti Piipel mit mich xtutiire. Ti rees waar net laycht fer mich. Fer mich helfe, te elteste hot een familye kefun in Escuintla woo waare wilich fer mich uf nëme un mich helfe in ti fersamlunge keen. Pis hayt, phase se mich uf wii wën ich fon te familye weyer.

Ich khent xpreche iwich fiil anere payxpiile fon woere liip in ti aat wii ti mitkliiter fon ti kemaynt mich uf kenom hon. Tas ales kep mich ti sicherheet, tas wii een fon Yeehoowa sayn Tsayer, sin ich unich ti woere kriste. — Yoohan 13:34, 35.

Ich xpiire net mee tas ich khee weyert orer hofnung hon. Hayt hot mayn leepe tswek. Ich sin fol tsayt tiiner in een piiplix inlërnung aarwayt fon Yeehoowa sayn Tsayer. Soo, tuun ich mich traan hale aan anere in lërne wichtiche woerheete fon ti Piipel un net ploos tenke aan mayne fisixe propleem. Un noch, ich hon te priwilëj fer tiine wii elteste in ti kemaynt un reete mache in anere kemaynte in ti rechyoon. Soo kaar hon ich te priwilëj kriit fer piiplixe reete mache fer tausente layt in rechyonaal konkrëse.

In 2010, sin ich kang in ti Xuul fer in te Preetich se Iipe (woo yets heest Xuul fer Preetiche fom Raych) in El Salwatoer. Ti Xuul hot mich keholef peser mayn flicht in ti kemaynt erfiile. Ti xuul hot kemacht tas ich kexpiirt hon tas Yeehoowa mich liipt un kept mich fiil weyert, tiise iipung khan yeete eene in lërne fer sayn tiinst aarwayt mache.

Yeesus saat: “Kepe pringt mee frooheet wii se kriin.” (Aphostele sayn Kexicht 20:35) Yets khan ich saan tas ich wërklich froo sin un xpiire tas ich mache khan etwas woo ich nii tacht woo meechlich weyer: anere helfe.