Ich sin kepoer in Mulhouse, nortëst fon Frankraych, in een aarem nochperxaft woo fiil wyolënts waar. Ich erinere mich tas, wii ich kleen waar, hot es fiil xtrayt un wyolënts tswixich ti familye fon tiise nochperxaft kep. Ti mëner in mayn familye hon ti fraae net respektiirt un neekst nii iire mënung kefroot. Ich hon kelërnt tas ti fraa sayn plats in ti khiich weyer un iire man un khiner uf phase.

Mayn khiner yoore waare net laycht. Wii ich 10 yoer alt waar, is mayne papa kextorep weeche sauferay. Finef yoore tëm noo, eene fon mayn elste priiter hot sich um kepracht. Im selwiche yoer, hon ich kesiin wii yemant fon mayn familye is um kepracht woer in een xtrayt. Tas hot mich seer aan kekrif. Etliche fon mayn familye hon mich in kelërnt mesere un wafe penutse. Tii hon mich kesaat ich solt tas imer penutse wëns neetich weyer. Ich waar een ferloerne yunge un hon aan kefang saufe un mich fol mit tatuaaje mache lose.

Wii ich 16 yoer waar, hon ich 10 pis 15 flaxe pier kesof te taach iwer, un klaych hon ich aan kefang troke penutse. Fer mayn sichtichkheet hale, hon ich kextool un alte metale tinge ferkhaaft. Wii ich 17 yoer waar, sin ich in te katee khom. Ales samer kerechent, sin ich 18 mool konteniirt woer weeche xteeleray un wyolënts.

Wii ich 20 yoer waar, is ales noch xlechter kewoer. Ich hon unkefeer 20 tsikere fon makonya te taach iwer keraucht un hon heroiina un anere troke penutst. Oft mools sin ich neekst kextorep weeche overdose. Ich hon aan kefang troke ferkhaafe un tes weeche, hon ich imer pay mich kehat een meser un een wafe. Een mool hon ich fersuucht eene man umpringe, awer kliiklich hot ti khuuchel ti xnal fon tëm sayn kërtel ketrof. Wii ich 24 yoer waar, is mayn mama kextorep un ich sin noch mee xtraytich kewoer. Ti layt hon soo kroos angst fon mich kehat, tas wën se mich kesiin hon sin se iwich te weech kang. Ich hon imer kextrit. Tes weeche, hon ich ofts mools ti ën fon te woche rom kepracht in te kaate orer in tas krankehaus, fer mayn ferletsunge ferfleeche.

Wii ich 28 yoer alt waar, hon ich mich ferhayrat. Awer sicher, hon ich mayn fraa net respektiirt. Ich hon se ferxënt un ferklopt. Meyer hon niks mitsamer kemacht. Ich tacht tas wën ich teet iir kextooltne xmuke xenke, tas weyer kenuuch fer tëne. Tan is etwas pasiirt woo ich nii truf kewaart hët. Mayn fraa hot aan kefang ti Piipel xtutiire mit Yeehoowa sayn Tsayer. Noo iire eyerste xtuutyum hot se noo kelos tsu rauche un wolt khee kextooltne kelt mee un hot mich ti xmuke tsurik kep. Ich sin wuutich kewoer. Tas hot mich net kefalt tas se ti Piipel xtutiire teet. Oft mools hon ich te tamp fon te tsikere in iire kesicht keploost. Ich hon aach xlecht kexproch iwich iir in ti kans nochperxaft.

Een mool waar ich soo pesof tas oone ketanke hon ich fayer aan unser apartament kepaut. Awer ich un mayn meetche sin net um khom wayl mayn fraa uns keret hot. Wii te efekt fon te sauferay ferkang waar, hon ich mich aarich xultich kexpiirt. Ich waar mich sicher tas Kot teet mich nii fertsaye. Ich khont mich erinere tas een phaater saat tas ti xlechte teete pay te Taywel khome. Soo kaar mayne psikyaater hot mich kesaat: “Mit tich is niks tsu mache! Tuu host khee retung mee.”

Noo tëm woo te apartament ap keprënt waar, sin mer mit mayn fraa sayn eltere woone kang. Wii Yeehoowa sayn Tsayer se pesuuche khom sin, hon ich kefroot ep es meechlich weyer Kot mayn kanse sinte fertsaye. Tii hon mich in te Piipel ketsaycht 1 Korinter 6:9-11, woo xprecht iwich fiil tinge woo Kot net aan nëmt. Awer tat xteet aach: “Tas is was etliche fon aych waare.” Tiise wërter hon mich ti sicherheet kep tas es weyer meechlich mich ënere. Yeehoowa sayn Tsayer hon kelees 1 Yoohan 4:8 un mich keholef ferxteen tas Kot mich liipe teet. Tas hot kemacht tas ich mich peser kexpiirt hon. Tes weeche, hon ich ferlangt tii selte ti Piipel tswaay mool in ti woch mit mich xtutiire. Ich hon aach aan kefang uf ti fersamlunge keen. Ich hon fiil tsu Yeehoowa kepeet.

In eene moonat, hon ich ëntxlist noo lose tsu saufe un troke penutse. Awer klaych hon ich aan kefang tsu xpiire ti xlime efekte tefon in mayne khërper. Weeche ti apstinëns, hat ich hesliche tinge ketreemt, aarich khop wee, maache wee, te kanse khërper hot mich wee ketuun. Awer in ti selwich tsayt, hon ich kexpiirt tas Yeehoowa teet mayn hant fest hale un mich ferxtërke. Ich hon mich kexpiirt wii te aphostel Phaul. Tee hot kexrip wii Kot iim keholef hot: “Fer ales sin ich xtark torich tee woo mich kraft kept.” (Filiper 4:13) Mit te tsayt, hon ich aach kephakt noo lose tsu rauche. (2 Korinter 7:1)

Ti Piipel hot mich keholef mayn leepe kontroliire, hot uns aach keholef een peser familye sin. Ich hon ferënert ti aat wii ich mayn fraa pehantelt hon. Ich hon aan kefang se respektiire un saan “pite” un “tanke xeen”. Ich sin aach een woere fater fer mayn meetche kewoer. Fer een yoer, hon ich ti Piipel xtutiirt un, soo wii mayn fraa, hon ich mayn leepe fer Yeehoowa tetikiirt un hon mich taafe kelos.

Ich sin mich sicher tas ti aanreete fon te Piipel mayn leepe keret hon. Ti layt fon mayn familye, woo net Yeehoowa sayn Tsayer sin, erkhëne tas es kans meechlich weyer kewees tas ich weyer kextorep weeche troke, alkohool orer xtrayt.

Ti Piipel hot mich in kelërnt mayn responsapiliteet wii man un papa erfiile. Tes weeche, hot unser familye sich kans keënert. (Ëfeser 5:25; 6:4) Meyer hon aan kefang ales mitsamer mache. Yets tenke ich net mee tas ti fraa sayn plats in ti khiich is. Mayn fraa penutst een kuut tsayt fer ti anere ti Piipel in lërne un ich tuun se kërn xtitse. Un tii frayt sich fer mich xtitse in mayn tiinst wii elteste in te kemaynt.

Yeehoowa sayn liip un parmhërtslichkheet hon mich tiif aan kekrif. Ich hon lust fer iwich sayn kwaliteete xpreche mit tii woo aan kesiin sin wii oone retung, wayl soo hon ti anere mich aach aan kesiin. Ich wees tas ti Piipel khan ale sorte mënxe helfe een sauwer leepe un een opjetiiw hon. Ti Piipel hot mich keholef ti mënxe, mëner un fraae, liipe un respektiire. Tii hot mich aach keholef respekt tsu mich selepst hon.