In 1949, is mayne papa fon Taytxlant tsu Austraalya kewanert fer aarwayt suuche in khoole mine un elëktrixe enerxii protutsyoon. Tee is woone kang uf ti kolonii, in te xtat fon Victoria. Tat, hot eyer sich ferhayrat mit mayn mama. In 1953, sin ich kepoer.

Khorts tsayt tëm noo, hot mayn mama aan kefang ti Piipel xtutiire mit Yeehoowa sayn Tsayer. Soo, khan ich mich erinere tas ich fon kleen aan keheert hon ti piiplixe kexichte. Awer mayn papa hat khee sort relichyoone aan kenom. Tee is een krope un kewaltiche mënx kewoer, un mayn mama hat aarich angst fon tëm kehat. Awer tii hot foran ti Piipel xtutiirt im ferxtekelt. Tii hat keliipt was se am lërne waar. Wën mayne papa net tehëm waar, hot se mich un mayn xwester ti Piipel in kelërnt. Tii hot imer kesaat tas ti Eyert een paratiis wërt un tas mer khente froo sin wën mer mache teete was ti Piipel saat. (Psalm 37:10, 29; Isayas 48:17)

Wii ich 18 yoer alt waar, must ich fon tehëm faart keen wayl mayne papa tsu krop waar. Ich hon keklaap aan was mayn mama mich kelërnt hot iwich ti Piipel. Awer ich hat khee kroos weyert too truf kep. Tes weeche, khont ich net mache was richtich waar. Ich hon aarwayt kefun wii eletrisiist, in te khoole mine. Wii ich 20 yoer alt waar, hon ich kehayrat un tray yoer tëm noo is mayn eyerst meetche uf ti welt khom. Tan hon ich mich peser iwerleet was wichtiches weyer in mayn leepe. Ich wust tas ti Piipel khent mich un mayn familye helfe. Tan hon ich aan kefang mit Yeehoowa sayn Tsayer xtutiire. Tas hot mayn fraa khee pisye kefalt. Noo tëm woo ich tas eyerst mool uf een fersamlung kang sin, hot se kesaat tas ich solt raus suuche: te xtuutyum orer ti familye. Tan hon ich uf kep. Ich hon mayn xtuutyum noo kelos mit Yeehoowa sayn Tsayer. Xpeeter, hot mich tas layt ketuun tas ich net foran xtutiirt hon, wayl ich wust tas tas weyer tas richtiches tsu mache.

Eene taach, in mayn aarwayt, hon mayn koleke mich pilter fon pornokrafii ketsaycht. In te selwich tsayt woo ich wolt tas kuke, hot mich tas keekelt. Ich hon xult kexpiirt. Fon tas woo ich mich erinere khont fon te Piipel, waar ich sicher tas Kot mich xtroofe teet. Soo fiil mee woo ich ti pilter kesiin hon, soo fiil mee lust hon ich kriit fer kuke un hon weeniche xult kexpiirt. Mit te tsayt, hon ich mich aan keween pornokrafii kuke.

In te neekste 20 yoore, hon ich yeetes mool weeniche ketacht aan was mayn mama in kelërnt hat. Ti tinge woo ich kesiin hon un in mayn ketanke ketuun, hon aan kefang ënere ti aat woo ich mich aan kextelt hon. Ich hon aan kefang trekich kexpreech hale un sëks in ferkheert aat aan siin. Ich waar noch ferhayrat awer ich hon mayn fraa hiner kang mit fiil anere fraae. Eene taach hon ich mich im xpiichel kekukt un ketacht: ‘Ich hase tich.’ Xtats respëkt, hon ich eekel uf mich selepst kexpiirt.

Mayn hayrat is am ën kang un mayn leepe waar fernicht. Tan, hon ich kepeet fer Yeehoowa un hon iim fertseelt ales was in mayn hërts waar. Tswansich yoore tëm noo, hon ich wiiter aan kefang ti Piipel xtutiire. Mayne papa waar xon kextorep un mayn mama waar ketaaft wii een Yeehoowa sayn Tsayer.

Ti aat woo ich keleept hon waar wayt wech fon was in te Piipel xteet. Awer tas mool, wolt ich net uf kepe ti inerlich friit woo ti Piipel ferxprecht. Ich hon aan kefang mich aan xtrenge fer ferninftich xpreche un mich kontroliire fer net klaych wuutich wëre. Ich hon aach ëntxlist noo lose mit imoraaliteet, xpiile, saufe un fon mayne xëf xteele.

Mayn aarwayts koleke khonte net ferxteen warom ich soo kroose ënerunge mache wolt. Torich tray yoore, hon se imer hiner mich kextan tas ich solt wiiter sin wii ich eyerst waar. Als mool, hon ich een rik fal kriit, tsum payxpiil, ich sin laycht wuutich kewoer un trekiche wërter kesaat. Wën tas pasiirt is, hon se mit frayt kesaat: “Ah, tas is te Joe woo mer wërklich khëne!” Tas hot mich keayert. Ich hon mich xwach un oone weyert kexpiirt.

In mayn aarwayt, waarst laycht pornokrafii kuke. Tas waar iweraal in wiiteos un pilter. Mayn koleke hon tas aus keteelt un ketsaycht torich komputatoore, etwas woo ich eyerst aach kemacht hon. Ich hon mich aan kextrengt fer too mit noo lose, awer tas hot aus kesiin tas se ales kemacht hon fer mich xteere. Ich hon hilef ferlangt fer mayn Piipel leerer. Tee hot mich mit ketult aan keheert un hot in te Piipel ketsaycht wii ich khent tiise kewoonheet im xtich lose. Tee hot mich aach uf kemuut fer oft mools peete un hilef fer Yeehoowa ferlange. (Psalm 119:37)

Eene taach hon ich in een fersamlung mit mayn aarwayts koleke kemacht. Wii se al samer waare, hon ich kesaat tii selte piie kepe fer tswaay koleke woo wolte noo lose tsu alkohool ketrenk trinke. Tii sin pees kewoer mit mich un hon kexënt: “Pis tuu ferikt! Tii tuun sich aan xtrenge fer ti kewoonheet im xtich lose.” Tan hon ich keantwort: “Ich aach.” Tan, hon se mich in ruu kelos.

Mit te tsayt un mit Yeehoowa sayn kroos hilef, hon ich te khampf keeche pornokrafii ëntlich kewun. Ich sin ketaaft woer in 1999 un sin petanklich tas Yeehoowa mich ti oportuniteet kep hot fer een froo un ferxtëntich leepe hon.

Yets khan ich siin warom Yeehoowa ti tinge hast woo ich eyerst soo kërn hat. Tee is een liipliche Fater un tee wolt mich xitse fom xaate woo ti pornokrafii macht. Mer mise traue uf ti wërter fon Xpriiche 3:5, 6, woo saat: “Trau uf Yeehoowa mit tayn kans hërts; tuu net aan tayn aychne ferxtëntnis traue. Tenk aan tëm in ale tayn weeche un eyer tuut tayn weeche richt mache.” Leepe wii ti Piipel in lërnt xitst mich un heleft mich een froo leepe hon. (Psalm 1:1-3)

Ich hat eekel fon mich selepst. Yets hon ich friit un selepst respëkt. Ich hon een sauwer leepe un xpiire tas Yeehoowa mich fertsayert hot un xitst mich. In 2000, hon ich mich ferhayrat mit Karolin, een xeen liip xwester woo aach Yeehoowa liipt. Yets is friit in unser haus. Tas is een priwilëj fer uns teel mache in een welts familye fon liipliche layt woo een sauwer leepe hon.