Ti Piipel hot ti efekte fon te tsayt, ti xlim yachtung un ti fersuuchung fer sayn tekst se ënere — tas ales — iwerleept. Un ti resultaat is tas hayt yeete eene een Piipel hon un leese khan. Un wëns tuu ti Piipel leest, khanst tuu traue tas was tuu leest ti pexeet fon te orixinaale xrifte is. a Awer warom is ti Piipel iwerleepe keplip un tas oft mools in een wunerlich aat? Was macht tas tas puuch soo ekstra is?

Fiile layt woo ti Piipel xtutiire mache ti selwich ëntxlus wii te aphostel Phaul, woo kexrip hot: “Ti kans Xrift is kep woer torich Kot sayn Kayst.” (2 Timóteo 3:16) Tii klaape tas ti Piipel iwerleept hot, wayls Kot sayn Wort is un wayl Kot se pis hayt kexitst hot. Faizal, woo im eyerste artikel fom piichelche kenënt woer is, waar pextimt fer ti Piipel xtutiire fer aus kluuche, op tas ales woer weyer. Tee hot sich ferwunert mit was tee kelërnt hot. Een payxpiil, tee hot kesiin tas fiile inlënunge fon te relichyoone woo sich wii kriste nëne, net in te Piipel xteen. Wii tee in te Piipel kesiin hot, was Kot sayn wile fer ti eyert is, tas hot sayn hërts fiil aan kekrif.

Faizal saat: “Yets sin ich mich sicher tas ti Piipel woo ich hon, een kexenk fon Kot is. Wën Kot tas kans Uniwërsum kemacht hot, weyer tas net xweyer fer tee een puuch fer uns kepe un tas pis hayt xitse. Net too traan klaape, teet petayte tas ma tenkt tas Kot sayn macht xwach weyer. Soo tenke weyer kans ferkheert, wayl mer wise tas Kot te Ale Mechtiche is. Un weer sin ich fer fon Kot sayn macht tswayfel hon?”— Isaías 40:8