Was khan tich helfe kërn hon ti Piipel leese un ti kanse nutse fon tëne kriin? Mërk finef aanunge woo hon fer fiile richtich pariirt.

Suuch een kuut plats raus. Fersuuch een ruych plats fine. Fer tich traan hale aan tayn leesung, playp wech fon te tinge woo khene tayn acht ap lënke. Ti richtich licht un friix luft tuun tich aach helfe ti kanse nutse fon tayn leesung kriin.

Lees mit te richtich aanxtelung. Ti Piipel khomt fon unser himlixe Fater. Tes weeche, tuust tuu mee nutse kriin wëns tuu ti aanxtelung fon een khint host, woo fërtich is fer fon sayn liipe papa lërne. Wëns tuu nekatiiwe mënunge iwer ti Piipel host, fersuuch tëne uf sayt lose. Tan, khan Kot tich in lërne. (Salmo 25:4)

Peet foer se leese. In te Piipel, fine mer Kot sayn ketanke. Tan, es xtimt tas mer prayche sayn hilef hon fers ferxteen. Kot ferxprecht tas eyer tuut ‘hayliche kayst kepe fer tii woo tëm ferlange’. (Lucas 11:13) Te hayliche kayst khan tich helfe Kot sayn ketanke ferxteen. Mit te tsayt, tuut eyer tayn ferxtant uf mache tas tuu khanst ‘soo kaar ti tiife tinge fon Kot ferxteen’. (1 Coríntios 2:10)

Lees fer se ferxteen. Tuu net xnel torich leese — tenk aan was tuu am leese pist. Wiis tuu leese tuust, mach tich soo sorte frooche: ‘Was fer kwaliteete hot tiise persoon iwer weem ich am leese sin? Wii khan ich tas in mayn leepe in fiire?’

Tuu taytliche tsiile hon. Fer kans nutse fon tayn Piipel leesung kriin, fersuuch etwas lërne woo tuut tayn leepe ferpesere. Fiilaycht khanst tuu tsiile soo wii ti neekste hon: ‘Ich wil mee iwer Kot lërne.’ ‘Ich wil een peser persoon wëre; een peser man orer fraa.’ Tan, suuch xtike fon te Piipel raus woo tuun tich helfe tiise tsiile trefe. *

Tiise finef aanunge tuun tich helfe aan fange. Awer, wii khanst tuu tayn Piipel leesung noch interesanter lose? Te neekste artikel kept welche aanunge.