Ti Piipel is net een keweenlich puuch — sayn wërter khome fon unser Kriatoer. (2 Timóteo 3:16) Sayn pexeet khan uns tiif petrefe. In woerheet, ti Piipel saat: “Kot sayn Wort is lepeentich un xaft mit kraft.” (Hebreus 4:12) Ti Piipel hot ti kraft fer unser leepe in tswaay haupste aate ferpesere: tii kept uns oryentiirung fer unser leepe hayt, un heleft uns Kot un Sayn ferxpreche khëne. (1 Timóteo 4:8; Tiago 4:8)

Oryentiirung fer unser leepe hayt. Ti Piipel khan tich helfe mit perseenliche sache. Tsum payxpiil:

• Wii peser mit te familye un mit te anere rom khome. (Efésios 4:31, 32; 5:22, 25, 28, 33)

• Wii froo un kesunt plaype. (Salmo 37:8; Provérbios 17:22)

• Ti unerxiit tswixich tas ferkheertes un tas richtiches wise. (1 Coríntios 6:9, 10)

• Wii uns fersoriche. (Provérbios 10:4; 28:19; Efésios 4:28) *

Vicent un Annalou, een yung pheyerche in Asya, kepe fiil weyert fer ti Piipel sayn aanreete. Soo wii fiile pheyerche, am aanfang fon sayn hayrat, waar es xweyer tsu tëne mit te personlichkheet fon te aner um keen un eerliche kexpreeche hon. Awer tii hon aan kefang aan se wëne was se in te Piipel keleest hon. Was fer waar te resultaat? Vicent saat: “Was ich in te Piipel keleest hon, hot mich keholef mit te xwiirichkheete fon unser hayrat in een liiplich aat um keen. Ti piiplixe aanreete aan wëne hot uns een frooes leepe mitsamer kep.” Annalou xtimt mit tëm: “Payxpiile in te Piipel leese hot uns keholef. Yets, sin ich froo un tsufriite mit unser hayrat un unser tsiile im leepe.”

Kot peser khëne. Vicent hot kemërkt tas ti Piipel hot net ploos sayn hayrat keholef. Tee saat: “Wayl ich ti Piipel leese, fine ich mich tichter pay Yeehoowa — tichter wii noch nii!” Vicent sayn wërter pringe acht fer een wichtich phunkt: ti Piipel khan tich helfe Kot peser khëne. Wëns tuu es machst, tuust tuu net ploos nutse fon Sayn aanreete kriin, awer aach raus fine tas tuu khanst Tëm sayn froynt wëre. Tuu tuust aach siin tas eyer xprecht iwer een peser tsukhunft woo khomt, een tsayt woos tuu tuust “tas woere leepe” kriin, woo tuut fer imer taure. (1 Timóteo 6:19) Khee aner puuch khan tich tas kepe.

Tuu khanst aach tayn leepe yets ferpesere un Kot peser khëne. Fer tiise nutse kriin, prauchst tuu aan fange ti Piipel leese un net uf kepe. Awer wiis tuu leest, fiilaycht kriist tuu tswayfele. Un wëns tuu tëne kriist, eriner tich fon tëm kuute payxpiil fon een etyoopix ofitseer woo 2.000 yoore tsurik keleept hot. Tee hat fiile frooche iwer ti Piipel. Wën yemant tëm kefroot hot ep eyer ferxteen khont was eyer am leese waar, hot eyer keantwort: “Wii sol ich tas ferxteen wën nimant es mich in lërnt?” Tan, hot eyer klaych Filipe sayn hilef aan kenom, een tisipel fon Yeesus woo xon een Piipel leerer waar. (Atos 8:30, 31, 34) In te selwich aat, wëns tuu wilst mee iwer ti Piipel lërne, ferlang een Piipel xtuutyum in tëm site jw.org, orer xrayp fer eene fon te atrese woo in tiise piichelche foer khome. Tuu khanst aach mit Yeehoowa sayn Tsayer xpreche orer een Raych Saal pesuuche woo ticht pay tich is. Tan, was mënst tuu fon een Piipel hayt hoole un tëne lose tayn leepe ferpesere?