Ich sin uf ti welt khom in Londres, Englant, ich sin kroos kewakst in Paddington, een nochperxaft mit fiil pewooner. Ich hon mit mayn mama un tray eltere xwestere kewoont. Mayne papa is oft mool fon tehëm fat kang weeche sayne propleem mit sauferay.

Wii ich kleen waar, hot mayn mama mich kelërnt tas ich mist yeete oomt peete. Ich hat een kleen Piipel, nuer ti Psalme, ich hat mich aus ketacht een aat tas ich tii singe khënt. Een mool, hon ich in een puuch etwas kelees woo mich net aus te khop kang is: “Eene taach khomt te moye net.” Ich sin ti kans nacht wach keplip un aan mayne tsukhunft ketacht. Ich hon ketacht: ‘Was fer tswek hot tas leepe? Tas is net meechlich tas es ploos tas is.’ Ich wolt net xtërpe!

Ich hon aan kefang mich interesiire aan okultismus. Ich hon fersuucht mit ti toote xpreche, friit hofe pesuuche mit mayn xuul koleke un xrekliche fiilme mit tëne kuke. Meyer hon tas wunerlich kefun, awer in ti selwich tsayt hot tas uns angst kemacht.

Wii ich ploos 10 yoer waar, hon ich aan kefang repëlich wëre. Ich hon aan kefang tsikere rauche un hon mich tas aan keweent. Un noch xlechte, ich hon aan kefang makonya rauche. Wii ich 11 yoer waar, hon ich aan kefang tsu saufe. Tas ketrenk hot mich kaar net kuut kexmekt, awer ich sin kërn pesof kewoer. Ich hon aach aarich kërn musik kehoricht un ketanst, tes weeche, imer wëns meechlich waar sin ich uf fëste kang un in ti boate. Ich sin oomst fat kang un ploos hëm khom wëns palt taach waar. Ich hon tas ales in ferxtekelt kemacht. Wayl ich imer soo miit waar, sin ich oft net in ti xuul kang. Un, wën ich hin kang sin, hon ich ti meyerst tsayt kesof wën friixtik waar.

In mayn letste yoer in ti xuul, hon ich ploos xlechte noote kriit. Ti meyerst tsayt, wust mayn mama niks iwich ti tume tinge woo ich am mache waar. Tan, wii se mayne noote kesiin hot, is se traurich un pees kewoer mit mich. Mer hon kextrit un ich sin fon tehëm aus keris. Fer een tsayt, hon ich mit mayn xetsye, Tony, kewoont, tee waar rastafari. Tony hot kextool un aach trooke ferkhaaft. Tee waar pekhant wii een kewaltiche man. Khorts tsayt tëm noo, sin ich xwange kep. Wii ich nuer 16 yoer alt waar, is mayn khint uf ti welt khom.

Eyerst mool woo ich mit Yeehoowa sayn Tsayer fertseel hon waar in een xits plats fer leetiche mutere. Te sosyaal tiinst hot mich keholef tat een plats kriin. Tswaay fraae woo Yeehoowa sayn Tsayer waare hon tat etliche mutere pesuucht. Eene taach hon ich aach mit Yeehoowa sayn Tsayer fertseelt. Ich wolt pewayse tas tii ferkeert weere. Awer, mit kroos ketult, hon se mayn frooche keantwort un ketsaycht was in ti Piipel xteet. Tii waare soo kuut un liiplich un tas hot mich aan kekrif. Tan hon ich aan kenom mit tëne ti Piipel xtutiire.

Klaych hon ich in te Piipel kelërnt etwas woo mayn leepe kans keënert hot. Fon kleen aan, hat ich angst fer xtërpe. Awer, in mayne Piipel xtuutyum, hon ich raus kriit tas es eene taach een uf xtayung fom toot kept! (Yoohan 5:28, 29) Ich hon aach kelërnt tas Kot wërklich sich khimere teet mit mich. (1 Pheete 5:7) Eene tekst woo mich aan kekrif hot waar Yeeremias 29:11, woo saat: ‘Wayl ich wees kans kenau was ich fer aych pleene’, saat Yeehoowa. ‘Ich wil tas teyer friit hot, net unklik. Ich wil aych een futuer un een hofnung kepe.” Ich hon kelërnt tas ich eene taach uf ti eyert in een paratiis leepe khan fer imer. — Psalm 37:29.

Yeehoowa sayn Tsayer hon ketsaycht tas se mich wërklich liipe teete. Tas eyerste mool woo ich uf tëne sayn fersamlung khan sin, tii waare al soo kuut un froyntlich mit mich. Ich hon mich wërklich wilkhome kexpiirt! (Yoohan 13:34, 35) Tas waar fiil anerste wii ti aat woo ich pehantel kep sin in een anert khërich woo ich foer heyer hin kang waar. Yeehoowa sayn Tsayer hon mich soo kuut uf kenom opwool mayn xlim situatsyoon. Tii waare soo liiplich un hon sich kekhimert mit mich, un hon mich aach keholef mit mayn propleeme um keen. Ich hon kexpiirt tas ich tsu een kroos familye keheere teet.

In mayn Piipel xtuutyum, hon ich kesiin tas ich mist ënerung mache in mayn leepe fer Kot kefale. Awer, tsum payxpiil, noo lose tsu rauche, waar net laycht. Un ich hon aach kemërekt tas etliche musike woo ich kehoricht hat hon mich noch mee lust kept fer makonya rauche. Tan hon ich een anert sort musik raus kesuucht fer horiche. Ich wolt mich weech hale fom ketrenk, tan hon ich noo kelos uf feste un boates keen, wayl tat khent ich lust kriin fer saufe. Un ich hon aach, naye froynt kefun woo mich uf kemuut hon fer wayter ënerung in mayn leepe mache. — Xpriiche 13:20.

In tiise tsayt, hot Tony aach ti Piipel xtutiirt mit Yeehoowa sayn Tsayer. Soo wise tëm sayn frooche keantwort hon, hot eyer ënerung kemacht, Tony waar sich sicher tas tee ti woerheet lërne teet. Tee hot sich fiil keënert: hot sich weech kehalt fon sayn kewaltiche froynte, hot noo kelos mit sayn kriminaale aktiwiteete un makonya rauche. Meyer tswaay hon kesiin tas, fer Yeehoowa kefale, miste mer noo lose mit unser imoraalixe leepe un een ferninftich sort leepe hon fer unser khint kroos tsiie. Tan, in 1982 hon mer uns ferhayrat.

Ich erinere mich tas ich fiil unersuuchunge kemacht hon in ti piichelche A Sentinela un Despertai!. * Ich hon kesuucht kexichte fon layt woo hon iire leepe keënert soo wii ich mache wolt. Tëne sayn payxpiil hot mich aarich uf kemuut! Tiise kexichte hon mich keholef fer forem mich aan xtrenge. Ich hon aach imer kepeet tas Yeehoowa mich net im xtich lose solt. Tan, in Yuuli 1982, sin ich un Tony ketaaft woer wii Yeehoowa sayn Tsayer.

Yeehoowa sayn froynt sin hot mayn leepe keret. Ich un Tony xpiire tas Yeehoowa uns heleft wën mer xwiirichkheete mit mache. Mer hon kelërnt uf Yeehoowa traue opwool ti xwiirichkheete un mërke tas tee imer unser familye keholef un uf kephast hot. — Psalm 55:22.

Meyer hate ti kroos frayt fer unser soon un unser meetche helfe aach Yeehoowa sayn froynte sin. Un yets siin unser ëngel khiner lërne iwich Yeehoowa tuut uns aach seer fraye.

Yets tuun ich net mee te xloof ferliire weeche ketanke mache iwich mayne tsukhunft orer iwich te toot. Tony un ich hon aach te kroose priwilëj fer reese un yeete woch een fon Yeehoowa sayn kemaynt pesuuche fer ti priiter uf muute. Un mit tëne, lërne mer anere layt tas, wën se aan Yeesus klaape, khene se aach fer imer leepe.