Wii wërt tayn Piipel leesung sin: leetich orer ufmuutich? Es hot fiil se tuun mit te aat wiis tuu leest. Wole mer siin was khanst tuu mache fer tayn leesung interesanter un ufmuuticher lose.

Suuch een iwersetsung raus woo laycht fer se leese is un woos tuu truf traue khanst. Nimant leest kërn een puuch woo alt un xweyere wërter penutst. Tan, suuch een Piipel raus woo keweenliche wërter penutst, woo aan tayn hërts krayfe. Awer, in te selwich tsayt, suuch een Piipel raus woo kenau is un woos tuu traue khanst. *

Penuts ti letste tëknoloxii. Hayt tsu taach khan ma ti Piipel in papiir orer in eletroonixe aparate leese. Welche Piipele khanst tuu online leese, orer een download mache fer in komputatoore, tablets, orer selulaare leese. Aan etliche fon tëne finst tuu feramente woo erlaupe tich phaar anere wersikele fon te Piipel xnel fine — woo iwer te selwich sache xpreche —, orer anere iwersetsunge fon tëm selwich wersikel ferklayche. Wëns tuu rechter horiche wii leese tuust, khanst tuu ti Piipel aach in autyos fine. Fiile layt tuun kërn tas laustre wii se puuplix transport hoole fer pis te aarwayt keen, wii se tehëm xafe, orer wii se anere tinge mache woo erlaupe tëne horiche. Warom net proope was fer tich peser tiint?

Penuts feramente fer ti Piipel xtutiire. Ti Piipel xtuutyum feramente khene tich helfe mee nutse fon tayn leesung kriin. Tsum payxpiil, wëns tuu een kexicht am leese pist, es kept lantkhaarte fon te piiplixe lënter woo tich helfe khene tiise pletse fine un leepe fer ti leesung kepe. Een aner hilef fer welche kexichte fon te Piipel ferxteen sin artikele soo wii tii woo in tiise piichelche xteen, orer ti sesyoon “Piiplixe inlërnunge”, woos tuu khanst in tëm site jw.org fine.

Lees in unerxiitliche aate. Was khanst tuu mache wën es siit fer tich xweyer aus ti Piipel fom aanfang pis aans ën leese? Tuu khanst aan fange in een xtik fon te Piipel woos tuu interesant finst. Was mënst tuu fon te kexichte fon te pekhante layt fon te Piipel leese? Te khaste “ Tuu tas leepe fon pekhante layt fon te Piipel khëne lërne” khan tich helfe tas mache kriin. Orer fiilaycht khanst tuu ti Piipel theema noo theema leese, orer tëm noo te tsayt woo ti ewënte pasiirt sin. Was mënst tuu fon eene fon tiise aate fer se leese proope?