Host tuu xon kepleent ti Piipel leese, awer pist oone muut kep, soo wii Jovy, Queennie un Ezekiel? Fer fiile layt, ti Piipel leese siits xweyer aus. Awer, wëns tuu tsu wise kriin teest tas ti Piipel khan tich helfe een frooer un tsufriitilicher leepe hon? Un wëns tuu raus fine teest tas es kept etliche aate fer tayn Piipel leesung mee interesant lose? Teest tuu wilich sin fer se siin was khan ti Piipel tich saan?

Fiile layt hon aan kefang ti Piipel leese, un tas waar aarich kuut tsu tëne. Mërk was welche fon tëne hon iwer tas kesaat.

Ezekiel, woo een pisye mee wii 20 yoore alt is, saat: “Friier, waar ich wii yemant woo am faare is, awer woo wees net woo wil eyer hin keen. Awer, ti Piipel leese hot mich keholef een opjetiiw in mayn leepe fine. Tëne sayn aanreete tuun mich yeete taach helfe.”

Frieda, woo aach mee wii 20 yoore alt is, leet aus: “Ich waar aarich hitsich kewees. Awer, wii ich aan kefang hon ti Piipel leese, hon ich kelërnt selepst kontrol hon. Yets, fine ti layt laychter mit mich um keen; tan, hon ich mee froynte kriit.”

Eunice, woo mee wii 50 yoore alt is, saat: “Ti Piipel is mich am helfe een peser persoon wëre. Tii hot mich keholef welche xlechte kewoonheete uf sayt lose.”

Ti Piipel leese hot tiise layt un milyoone anere keholef een peser leepe hon. Es khan tas selwiche fer tayn leepe mache. (Isaías 48:17, 18) Tsum payxpiil, ti Piipel leesung khan tich helfe (1) kuute ëntxlise mache, (2) woere froynte hon, (3) mit stress um keen un (4) tas haupste, ti woerheet iwer Kot lërne. Ti aanreete fon te Piipel khome fon Kot; tan, tuun se imer pariire. Kot tuut nii mools een xlecht aanreet kepe.

Tas haupste is aan fange. Was fer aanunge khene tiise eyerst xrit laychter un peser lose?