Ich sin kroos kewakst in Puerto Limón, een xtat neewich tas meer, in Kosta Rika. Ich waar te 7^te fon 8 khiner. Wii ich 8 yoore alt waar, is mayn papa kextorep. Fon tat aan, hot mayn mama uns aleen ketsoo.

Peyspal * waar imer teel fon mayn leepe. Wii ich noch een khint waar, hat ich tas xon kërn. Un wii ich een pisye elter kep sin, hon ich in een kleene tiim kexpiilt. Wii ich 20 yoore alt waar, hot een man woo kuute xpiiler suucht mich kefroot ep ich welt in een kroose tiim in Nikaraakwa xpiile. Awer, in tiise tsayt, waar mayn mama krank un ich hon se uf kephast. Tes weeche, wolt ich net in Nikaraakwa leepe. Soo, hon ich ti inlaatung net aan kenom. Xpeeter, hot een aner man mich in kelaat fer in te tiim fon Kosta Rika xpiile. Tii hon xpiiler fon fiile kleene tiime in kelaat. Un yets, hon ich ti inlaatung aan kenom. Ich hon in tëm tiim fon Kosta Rika kexpiilt fon 1949 pis 1952. Fiile fon unser xpiile waare in Kupa, Mëksiko un Nikaraakwa kewees. Un ich hon mechtich kuut kexpiilt; een mool, hon ich 17 xpiile in te ray khee feele kemacht. Es waar mechtich kuut ti layt im xtatyum se heere mayn naame saan!

Es is xaat, awer ich hon aach een imoraalix leepe kehat. Opwool ich een xetsye hat, hon ich sëks mit anere fraae aach kemacht. Ich hon aach mechtich fiil ketrunk. Een mool, waar ich soo pesof tas wii ich in mayn pet te neekste taach uf kextii sin, wust ich net wii ich tat hin khom sin. Ich hon aach wete kemacht aan dominó xpiile un in te loterii.

Ti tsayt woo ich soo een sort leepe hat, is mayn mama Yeehoowa sayn Tsayer kep. Tii hot fersuucht mit mich iwer ti Piipel xpreche, awer ich hon khee acht kep, wayl ich hat aue ploos fer te peyspal. Wii ich am iipe waar, hon ich mich soo kaar ferkes fon ese keen. Te peyspal waar tas haupste in mayn leepe kewees.

Wii ich 29 yoore alt waar, hon ich mich mechtich wee kemacht. Tas is in een xpiil pasiirt, wii ich fersuucht hon een kuuchel fange. Noo tas ich peser kep sin, hon ich noo kelos peyspal in een kroose tiim xpiile. Noch soo, hon ich wayter xpiiler fon kleene tiime keiipt.

In 1957, hon ich een inlaatung aan kenom fer een konkrës fon Yeehoowa sayn Tsayer kuke in een xtatyum woo ich friier peyspal kexpiilt hat. Ich hon klaych kemërkt ti unerxiit tswixich Yeehoowa sayn Tsayer un tii woo ti xpiile kuke khom siin — ti priiter hon respekt ketsaycht, net kropheet. Weeche was ich im konkrës kesiin hon, hon ich aan kenom ti Piipel xtutiire un in te fersamlunge fon Yeehoowa sayn Tsayer keen.

Was ich fon te Piipel kelërnt hon, hot mich aarich ferwunert. Tsum payxpiil: Yeesus hot foer raus kesaat tas sayn tisipele teete in te letste taache ti kuute notisye fom Raych uf te kans welt preetiche. (Matheus 24:14) Ich hon aach kelërnt tas ti woere kriste tuun net Kot tiine fer kelt kriin. Yeesus hot kesaat: “Umsonst hot teyer tas kriit, tan umsonst kept tas wayter.” (Matheus 10:8)

Wii ich ti Piipel xtutiirt hon, hon ich ferklaycht was tii saat un was Yeehoowa sayn Tsayer mache. Es hot mich aarich ferwunert tas se soo xtram kexaft hon fer ti kuute notisye fom Raych preetiche. Tii waare wërklich krooshërtslich, soo wii Yeesus kesaat hot sayn tisipele solte sin. Tan, hon ich Yeesus sayn inlaatung in Markus 10:21 kesiin: “Khom, kee mich noo”; un yets, wolt ich Yeehoowa sayn Tsayer wëre.

Awer, es hot mich een pisye tsayt kenom fer ti ënerunge mache. Tsum payxpiil, torich fiile yoore, hon ich mayn “klik” numer yeete woch in te loterii kexpiilt. Awer too, hon ich in te Piipel kelërnt tas Kot sich net kefalt mit tëne woo “te kot fom klik” aan peete un tii woo kiirich sin. (Isaiias 65:11; Koloser 3:5) Tes weeche, hon ich ëntxlist noo lose se wete. Te eyerste suntaach noo ich noo kelos hon in te loterii xpiile, is mayn “klik” numer raus khom. Ti layt hon mich ferxpot, wayl ich net in tiise woch kexpiilt hat, un tii hon mich ërnst uf kemuut noch mool tas mache; awer ich hon net tas aan kenom. Ich hon nii mee kewet.

Ich hon een aner fersuuchung mit keleept im selwiche taach woo ich mich ketaaft hon. (Ëfeser 4:24) Oomts, wii ich tsurik tsum hotel khom sin, waar mayn friirix xetsye in te auswenich sayt fon mayn tsimer mich am waarte. “Khom, Sammy — hot se mich kesaat. — Wole mer een pisye xpas hon!” “Nee!” — hon ich klaych keantwort. Ich hon kesaat tas ich yets aan keheert hon was ti Piipel iwer sëks un hayrat saat. (1^te Korinter 6:18) “Was?” — hot se uf een mool keantwort. Too hot se kesaat tas was ti Piipel iwer sëks un hayrat in lërnt net wichtich is un tas se wolt wayter mit mich plaype. Too sin ich in mayn tsimer rin kang un hon ti teer tsu kexlos. Hayt, khan ich froo saan tas, tsayt te taach woo ich Yeehoowa sayn Tsayer kep sin, sin ich troy tsu Yeehoowa keplip.

Ich tenke ich khent een puuch xraype fon te kanse seechen woo ich xon kriit hon. Hayt, hon ich echte fraaynte, een leepe mit opjetiiw, un woere frooheet.

Ich xpiile imer noch kërn peyspal. Awer yets, is tas net mee tas haupste fer mich. Weeche te peyspal, sin ich pekhant kep un hon fiil kelt kemacht; awer tas is klaych rom kang. Im keeche teel, mayn fraayntxaft mit Yeehoowa un ti priiter tuut fer imer hale. Ti Piipel saat: “Ti welt un sayn luste tuun rom keen, awer weer Kot sayn wile macht playpt fer imer.” (1^te Yoohan 2:17) Yets, tas haupste in mayn leepe sin Yeehoowa un ti priiter.