Ich sin uf ti welt khom in een kleen xtëtche in Saksoonya woo in Taytx Temokratix Repuuplik waar. Pay uns tehëm, hon mer uns imer mit liip un kuutheet pehantelt. Mayn eltere hon mich imer kelërnt een kuut persoon sin. Wii tas een komunist lant waar, ti meyerste fon uns in Saksoonya hon sich khee ketanke mit relichyoon kemacht. In woerheet, ich hon kaar net aan Kot keklaapt. Pis mayn 18 yoere, tswaay ketanke hon mayn leepe fiil influentsiirt: te atheismus un komunismus.

Wees tuu warom te komunismus soo fiil mayn acht keruuft hot? Wayl tee in kelërnt hot tas ti kanse layt ekaal wëre, un ich hat tas kërn. Ich hon ketenkt tas ti kanse materyaalixe tinge solte ekaal ferteelt wëre. Soo teet nimant tsu raych wëre un aach net tsu aarm. Tan hon ich aan kefang een orkanisatsyoon fon yunge komuniste se helfe. Wii ich 14 yoer alt waar, hon ich aan kefang in een ekolookix projëkt helfe woo papiir resikliirt hot. Ti autoriteete fon ti xtat Aue, woo ich kewoont hon, hon soo kërn mayn aarwayt kehat tas se mich een kexenk kep hon. Opwool ich yung waar, hon ich xon fiile komuniste politik khële kekhent. Fer mich, waar ich in te richtiche weech.

Uf een mool, hot sich ales keënert. In 1989, sin ti mauer fon Berlin um kefal un fiile komuniste rechiirente in Europa sin aach kefalt. Tas hot mich fiil petrof. Awer tas hot net mit tas noo kelos. Nochter hon ich aus kekluucht tas ti rechiire fon mayn lant hon fiil unkerechtes kemacht. Een payxpiil, weer te komunismus net pay kextan hot, hon net te selwiche rechte wii ti anere. Ich hon mich kefroot: ‘Wii khan tas meechlich sin? Hon ti komuniste net kesaat tas ti layt al ekaal wëre? Meecht tas komunismus net ploos een lii sin?’ Tas ales hot mich aarich ëngstlich kelos.

Tan hon ich entxlist mich konsentriire in pilte xtrayche un musik mache. In tëne tsayt hon ich in een musik xuul xtutiirt un wolt wayter musik in een Uniwersiteet xtutiire. Mayn traam waar xtraycher sin un musik mache. Tan hon ich ales neewer kelos was mayn eltere mich kelërnt hon iwer was richtich waar. Yets tas eensiche woo ich wolt mache waar mich ferkniiche, un tepay, waar fiile meet in te selwich tsayt namoriire. Opwool ich een leepe oone reekele hat un hat fiil tsu tuun in musik un xtrayche, ich hat imer noch pang fom tsukhunft. Un ti pilte woo ich kextrich hon, hon mayn pang ketsaycht. Ich hon ketenkt: ‘Was kept tas mit mayn tsukhunft? Was fer opjetiiw hot tas leepe?’

Wii ich ti antworte fon mayn frooche kefun hon, hon ich mich ferwunert! Een taach in ti xuul, ich un een krup koleke waare am fertseele iwer wii te tsukhunft weyer. Een kolekin woo Mandy * heest, waar Yeehoowa sayn Tsayer. Tii hot mich een kuut aanreet kep: “Andreas, wëns tuu ti antworte fon te frooche fine wilst iwer tas leepe un tsukhunft, must tuu siin was ti Piipel saat.”

Ich hon net fiil keklaapt was tii kesaat hot, awer noch soo, hon ich entxlist siin was ti Piipel saat. Mandy hot mich te kapitel 2 fon Daniel ketsaycht, un ich hon mich ferwunert mit was ich kelees hon. Te kapitel xprecht iwer fiil rechiirente woo een kroos influens pis in unser taache hon. Tii hot mich aach anere teele fon te Piipel ketsaycht woo iwer unser tsukhunft xpreche. Tsum xlus hat ich ti antworte fer mayn frooche kefun! Nochter hon ich wayter ketënkt: ‘Tiise profetsiie hon soo fiil kleenichkheete. Meecht tas een pewaysung sin eep Kot wërklich eksistiirt? Weer hot wërklich ti macht fer te tsukhunft soo foer raus saan?’

Mim hilef fon Mandy hon ich Horst un Angelika kekhënt, een pheyerche woo Yeehoowa sayn Tsayer waare. Tii hon mich keholef ti Piipel peser ferxteen. Ich hon klaych kemërkt tas Yeehoowa sayn Tsayer ti eensich relichyoon is woo ti layt heleft Kot sayn naame, Yeehoowa, khëne. (Salmos 83:18; Mateus 6:9) Ich hon aach kelërnt tas Yeehoowa uns een hofnung kep fer imer hiir uf te eyert in een paratiis leepe. Te Salmo 37:9 saat: “Tii woo hofnung tsu Yeehoowa hon, kriin ti eyert.” Ich sin aarich froo kep se wise tas ale layt woo Yeehoowa foliche, khene fer imer uf te eyert leepe.

Awer tas waar niks laychtes mache was ti Piipel saat. Ich must mich fiil aan xtrenge. Am aanfang, must ich lërne teemuutich sin, wayl te susës wii musikant un xtraycher hot mich fiil hoochmuutich kelos. Tas waar aach xweerlich ti imoraalixe tinge woo ich kemacht hon, neewe lose. Ich tanke Yeehoowa wayl eyer een kemiitliche Kot is un fertsaye tuut, un siit unser aanxtrengung fer tëm sayn wile mache!

Pis mayn 18 yoer alt, hot te atheismus un komunismus ti aat wii ich ketenkt hon fiil influentsiirt. Awer, nochter hon ich aan kefang se mache was ti Piipel saat. Was ich kelërnt hon, hot mich keholef te pang fom tsukhunft ferliire un hot mich keholef een opjetiiw im leepe hon. In 1993 hon ich mich taafe kelos wii Yeehoowa sayn Tsayer. Siwe yoer tëm noo, hon ich mich mit een xwester ferhayrat, woo flaysich im preetich waar, woo Tabitha heest. Hayt tuun mer fiil tsayt penutse fer anere layt helfe ti Piipel peser se khene. Fiil fon tëne, soo wii ich, sin influentsiirt kep torich te atheismus un komunismus fon kleen uf. Ich fine mich aarich froo tas ich khan tëne helfe peser Yeehoowa se khene.

Wii ich aan kefang hon ti Piipel se xtutiire mit Yeehoowa sayn Tsayer, sin mayn eltere oone pootem keplip. Awer mit te tsayt hon se kemërkt tas te Piipel xtuutyum mayn leepe fiil keënert hot. Fer mayn frayt, tuun se yets ti Piipel leese un soo kaar ti fersamlunge fon Yeehoowa sayn Tsayer kuke.

Ich un Tabitha hon een froo hayrat wayl mer ti aanreete fon Kot sayn wort in hale. Tsum payxpiil, ti Piipel tuut ti pheyerche aanreete fer troy eene tsum aner sin. Tiise aanreet in hale los unser hayrat aarich xtarek. (Hebreus 13:4)

Hayt hon ich khee pang mee fom tsukhunft. Ich xpiire mich teel fon een kroos familye, woo fon Yeehoowa sayn Tsayer sin fon te kans welt. Meyer hon friit, eenichkheet un es kept khee prekonseyt unich uns. Tas waar imer mayn traam. Yets leep ich tas.