XTELS TEER MOOL FOER tas tuu in een museum pist. Ti meyerste xtaatue sin xon aarich alt un eeklich. Aan fiile feele xon xtike, woo ap keproch sin. Awer wii wunerlich, is eens woo in yeete kleenichkheet perfekt is. Im xtant tenkst tuu tas tii nayer, wii ti anere weyer. Awer te fiirer fom museum saat: “Nee. In woerheet, tii is elter wii ti anere un must noch nii repariirt wëre.” Tan, froost tuu op se uf een aner plats wech ketuun kep woer is. Te fiirer saat: “Nee. Tii hot fiil reen un wint mit kemacht. Fiile layt wolte se xon fernichte.” Tan ferwunerst tuu tich un tuust tich frooe: “Awer wii is tas meechlich?”

Ti Piipel is wii ti xtaatue. Es is een puuch woo elter is, wii ti meyerste piicher. Awer aach wëns anere piicher kept, sin se toch mit te tsayt alt woer, ferxwun orer kaput kang. Tsum payxpiil, was se iwer ti syens kexrip hon, hot mit te tsayt net mee kextimt. Ti aanreete iwer kesuntheet hon ofts mool xaate keprung, xtats se was keholef hon. Un etliche fon tiise alte piicher sin net komplët, wayl fiile sayte fon tiise piicher ferxwun orer kaput kang sin.

Ti Piipel is xon kans anerste. Opwool se foer 3.500 yoore aan kefang woer is se xraype, tuut pis hayt khee teel feele. Tii is torich fiile atake kang, is ferprënt, ferpoot un kehast woer. Awer tii hot ales aus kehal. Is net tsu alt, tas mer sayn aanreete net mee penutse khene. Un was in tëne xteet, tsaycht een wunerlich kluucheet.— Kuk te khaste “Tsu alt orer tsu motërn?”

Awer, im xtant froost tuu tich: “Meechte ti Piipel sayn aanreete in unser motërn welt funktsyoniire?” Fer tas se antworte, tenk too triwer: “Was fer sin ti kreeste propleeme fon te menxheet? Fiilaycht tenkst tuu aan kriich, natuer fernichtung, kriminaliteet orer koruptsyoon. Wole mer siin, was ti Piipel uns iwer tas in lërnt. Tan froo tich: “Wën ti layt mache teete was ti Piipel saat, weyer tan ti welt peser?”

TI FRIIT LIIPE

“Froo sin ti friitxafer, wayl se Kot sayn khiner kenënt wëre.” (Mateus 5:9) “Wëns meechlich is, soo wayt wii tas fon aych ap hëngt, say friitlich mit ale layt.” - Romanos 12:18.

PARMHËRTSLICH SIN UN FERTSAYE

“Froo sin ti parmhërtsliche, wayl tii wëre mit parmhërtslichkheet pehantelt.” (Mateus 5:7) “Tuut aych wayter aus hale un eene tëm anere fraywilich fertsaye, aach wën yemant uersache hot fer sich keeche een anere se peklaae. Soo wii Yeehoowa * aych fraywilich fertsayert hot, mist teyer tas selwiche mache.” - Colossenses 3:13.

KHEE PREKONSEYT HON

Kot “hot fon ploos eene mënx ale natsyoone fon mënxe kemacht, tas se uf te kans eyert woone solte.” (Atos 17:26) “Kot suucht khee sayt raus, awer in ale natsyoon nëmt tee aan, tee woo tsu tëm tiife rexpekt tsaycht un macht was richtich is..”—Atos 10:34, 35.

REXPEKT IWER TI NATUER TSAYCHE

“Yeehoowa Kot hot te man kenom un hot tee in te Eetem Kaate ketuun fer se planse un uf phase.” (Gênesis 2:15) Kot tuut ‘tii fernichte, woo ti eyert fernichte.’ —Apocalipse 11:18.

PEKIIRICHKHEET UN IMORAALITEET HASE

“Tan hot eyer tsu tëne kesaat: “Halt ayere aue uf un halt aych wech fer imer mee hon wole, wayl, soo kaar wën yemant fiil hot, khomt sayn leepe net fon te tinge woo eyer hot.” (Lucas 12:15) “Ti seksuaal imoraaliteet un yeete sort unraynheet orer pekiirichkheet sole soo kaar unich aych net mool kenënt wëre, soo wiis sich fer ti hayliche layt keheert.”—Efésios 5:3.

EERLICH UN FLAYSICH XAFE

“Mer wole uns in ale tings mit kerechtichkheet aan xtele.” (Hebreus 13:18) “Weer xteelt, sol net mee xteele; uf aner sayt, xaft fiil, macht mit ayre hënt een kuut aarwayt” —Efésios 4:28.

ANERE HELFE

“Tas teyer ... tii woo tiifsinich sin, treeste tuut, xtitst ti xwache, sayt mit al ketultich.” (1 Tessalonicenses 5:14) “Xitse tii woo khee eltere hon un ti witfraae in iire xwiirichkheete.” —Tiago 1:27.

Ti Piipel tsaycht mee wii ploos saan, was mer mache mise fer een peser leepe hon. Tii tuut uns in lërne weyert fer ti aanreete kepe un wii mer tii aan wëne khene. Wën mee layt mache teete, was ti Piipel saat, mënst tuu net tas tas fiile propleeme fon te menxheet aans ën pringe teet? Yaa, sicher tas ti aanreete fon te Piipel mee aktualisiirt sin, wii noch nii. Awer was khan ti Piipel yets fer tich mache?

Te kluuchste man saat: “Ti kluucheet tsaycht sich kerechtich torich ti resultaate.” (Mateus 11:19, noote) Ti pest aat fer se wise op ti aanreet richtich wërt, is wën mer se aan wëne, kël? Un soo, fiilaycht tenkst tuu: ‘Wën ti Piipel wërklich nutslich is, tan mus tii mayn leepe ferpesere. Awer wii khan ti mich helfe, mayn propleeme woo ich yets hon, aans ën pringe?’ Kuk een payxpiil.

Ilse * hat een kuut un froo leepe kehat. Awer uf een mool hot sich ales rom ketreet. Sayn yung meetche is kextorep un sayn hayrat is aans ën khom un sin ploos xuulte un xuulte tsurik keplip. Tii saat: “Ich hon te potem ferloer. Ich hon mayn meetche, mayn man un mayn haus ferloer. Ich hon mich kans ferloer kexpiirt un wust net mee weer ich waar un hat khee uersache mee fer se leepe.”

Ilse hot in sayn haut kexpiirt, wii ti wërter woo in Salmo 90:10 xteen, woer sin: “Ti taache fon unsere leepe sin siptsich yoore, orer, achtsich yoore fer ti woo krefticher sin. Awer tiise yoore sin fol mit xwiirichkheete un traurichkheet. Tii keen xnel rom un mer tuun klaych ferxwiine.”—Salmo 90:10.

Ilse hot hilef in te Piipel kehool. Un was ti Piipel fer tii kemacht hot, waar wunerlich. Ti neekste artikle tsayche, wii fiil anere layt kemërkt hon, tas te Piipel sayn aanreete wërklich funktsyoniire tuun. Tii hon kesiin, tas ti Piipel, wii ti xtatuue fom aanfang fon tiise artikel is. Tii is kans anerste wii fiile piicher woo mit te tsayt khee weyert mee hon. Meecht tas pasiire wayl ti Piipel etwas hot, woo ti anere piicher net hon? Meecht ti Piipel wërklich Kot sayn Wort sin? —1 Tessalonicenses 2:13.

Khan sin tas tas leepe khorts un fol mit xwiirichkheet is. Wën ti propleeme tsu kroos wëre, woo keest tuu hiin fer troost, hilef un aanreete suuche?

Wole mer tray aate siin, woo ti Piipel tich in tayn leepe helfe khan. Tii khan tich helfe:

1. fon propleeme wech hale.

2. ti propleeme aans ën pringe.

3. peser um keen mit te propleeme woos tuu net ënere khanst.

Ti neekste artikele tuun iwer tiise tray phunkte xpreche.