TEETE Kot sayn tiiner troy plaype wën se xlime proope mit mache teete un teet aus siin tas se niks tsurik kreechte? Tiise frooch is kextelt — un keantwort — woer in Yoop sayn kexicht. 

Wii ti israeliiter noch im Ejipt kewoont hon, Yoop, een ferwanter fon Apraham, hot keleept in een plats woo hayt Araapya heest. Eene taach, hon ti engele im himel sich kesamelt foer Kot. Un te repëlixe Satanaas waar unich tëne. In tiise himlix fersamlung, hot Kot kesaat tas tee traue teet uf sayne leaal tiiner, Yoop. Yeehoowa hot kesaat tas khee anere mënx weyer soo unxultich un kerecht wii Yoop. Awer Satanaas hot kesaat tas Yoop teet ploos Kot tiine wayl eyer tee seechne un xitse teet. Tee hot aach kesaat tas wën Kot tëm wech nëme teet ales was tee hët, teet tee sicher Kot ferfluuche.

Kot hot kelos tas Satanaas eyerst Yoop sayn aychentum un khiner wech kenom hot, un nochter, sayn kesuntheet. Yoop khont net ferxteen warom Kot soo fiil xlechtes iim pasiire kelos hot, wayl tee wust net tas Satanaas too hiner traan waar. Noch soo, hot tee sich nii keeche Kot kextelt.

Tray falxe fraaynte sin Yoop pesuuche kang, un hon aan kefang tsu saan tas Yoop hët sicher etwas ferkheertes kemacht, un tas Kot teet iim xtroofe weeche sinte woo eyer im ferxtekelt kemacht hët. Tii hon soo kaar kesaat tas nimant khent Kot kefale, un tas Tee teet net uf sayn tiiner traue. Yoop hot net aan kenom was se iwich Kot kesaat hon. Un mit sicherheet, hot tee kesaat tas eyer teet troy tsu Kot plaype pis sayne toot.

Awer Yoop hot een feeler kemacht wii eyer sich tsu fiil ketanke iwich sayne aychne kerechtichkheet kemacht hot. Eliuu, een yunge woo tat waar un hot sich tas kexpreech aan keheert, hot tsu Yoop kesaat tas eyer ferkheert weyer, wayl fer tëm waar tas wichticher sayne naame sauwer hale xtats weyert kepe tsu Kot sayne naame un autoriteet. Tee hot aach Yoop sayn falxe fraaynte aus kexënt.

Tan hot Yeehoowa aan kefang mit Yoop xpreche. Tee hot tëm keholef ti tinge richtich ferxteen. Yeehoowa hot kexproch iwich ti wunere fon te kriatsyoon. Tee hot Yoop ferxteen kemacht wii kleen te mënx foer Yeehoowa is. Yoop hot teemuutich aan kenom was Kot saat. Yeehoowa, mit sayn hërtslich liip un parmhërtslichkheet, hot wiiter Yoop kesunt kemacht, hot iim tas topelte raychtum tsurik kep woo eyer eyerst hat un hot iim keseechent mit tseen khiner. (Tyako 5:11) Wayl Yoop sayn intekriteet kehal hot unich xweyer proope, hot Yoop ketsaycht tas was Satanaas saat iwich ti mënxe, falx is — tas khee eene teet troy tsu Yeehoowa plaype wën tee keproopt teet wëre.

— Aus tëm piiplixe puuch Yoop.