Erinerst tuu tich warom eene fon Kot sayn engele, Satanaas, te Taywel, kewoer is? — Weeche sayn ekoiistixe wunx fer aan kepeet wëre, hot tee sich keeche Kot kextelt. Meechte anere engele tëm Taywel noo kemacht hon? — Yaa, ti Piipel nënt tii wii ‘Satanaas sayn engele’, orer temoone. (Apokalipsis 12:9)

Meechte ti xlechte engele, orer temoone, aan Kot klaape? — ‘Ti temoone klaape tas Kot eksistiirt’, saat ti Piipel. (Tyako 2:19) Awer yets hon se angst. Tii wise tas Kot wërt se xtroofe weeche ti xlechte tinge woo se kemacht hon. Was hon tii kemacht woo soo xlecht is? —

In te Piipel xteet tas ti engele sin aus te himel kang, woo iire richtich plats waar fer woone, fer uf ti welt leepe khome wii mëner. Tii hon tas kemacht wayl se wolte sëks mache mit te xeene fraae hiir uf ti Eyert. (Xeenesis 6:1, 2; Yuutas 6) Was weest tuu iwich sëks? —

Sëks is wën eene man un een fraa in een kans spetsyaal aat paysamer sin. Noo tas, khan im xtant een nëne aan fange tsu wakse in te mama sayne layp. Awer, fer ti engele, sëks mache is ferkheert. Kot saat tas ploos man un fraa woo in naner ferhayrat sin thërfe sëks mache. Soo wën te nëne uf ti welt khomt, khene se tee kuut uf phase.

Noo tëm woo ti engele sich mënxliche khërper kemacht hate, hon se sëks kemacht mit te fraae un tii hon khiner kriit woo aarich, aarich kroos kewakst sin. Tëne iire khiner waare aarich xlecht un hon anere layt wee kemacht. Soo, hot Kot ti Sintfluut kepracht, orer een kroos iwerxwëmung, fer fernichte ausferxeemte kroose mënxe un al tii woo xlecht waare. Awer tee hot kexikt Noee een arich, orer een kroos xif, paue, fer ti phaar mënxe woo kemacht hon was richtich waar, rete. Te Kroose Leerer saat tas es wichtich is uns erinere was im Sintfluut pasiirt is. (Xeenesis 6:3, 4, 13, 14; Lukas 17:26, 27)

Weest tuu was mit te xlechte engele pasiirt is wii ti Sintfluut kep hot? — Tii hon iire mënxliche khërper im xtich kelos un sin tsurik im himel kang. Awer tii khonte net mee Kot sayn engele sin, tan sin se Satanaas sayn engele, orer temoone, kewoer. Un was is pasiirt mit iire khiner, ti aariche kroose mënxe? — Tii sin um khom in te Sintfluut. Un aach al ti anere mënxe woo net Kot aan keheert hon.

Noo te Sintfluut, hot Kot net mee kelos tas ti temoone khente mënxliche khërper fer sich mache. Meyer khene ti temoone net siin, awer tii tuun imer noch fersuuche ti layt influentsiire fer xlechte tinge mache. Hayt se taache pringe se noch mee propleeme wii nii, wayl se runer keworeft woer sin fom himel tsu te Eyert.

Warom khene mer ti temoone net siin? — Wayl se kayste sin. Awer mer khene uns sicher sin tas tii eksistiire. Ti Piipel saat tas Satanaas ‘is am ap lenke fon Kot mënxe fon te kans welt’, un ti temoone helfe tëm. (Apokalipsis 12:9, 12)

Meecht te Taywel un sayn temoone uns aach ap lenke khene orer hiner keen? — Yaa, tii khene tas mache, wën ma net uf phast. Awer mer prayche khee angst hon. Te Kroose Leerer hot kesaat: ‘Te Taywel hot khee macht iwich mich.’ Tas petayt tas wën mer foran Kot sayn fraaynte sin, wërt tee uns xitse fom Taywel un sayn temoone. (Yoohan 14:30)

Tas is wichtich wise was fer xlechte tinge ti temoone wole hon tas mer mache sole. Tenk mool: Was fer xlechte tinge hon ti temoone kemacht wii se uf ti Eyert waare? — Eep ti Sintfluut, hon se sëks kehat mit te fraae, etwas woo kans ferkheert waar fer ti engele. Hayt, hon ti temoone kërn wën ti layt net Kot sayn kesetse aan heere iwich sëks. Ich wil tich mool frooe: Ploos weer thërf sëks mache? — Richtich, ploos ti woo ferhayrat sin.

Hayt se taach, etliche puupe un meetche mache sëks, awer tas is ferkheert. Ti Piipel xprecht iwich tëm man sayn xenitaale oorkan, te pênis. (Lewiitikus 15:1-3) Un ti fraa iire xenitaale oorkan is kenënt vulva. Yeehoowa hot tiise teele fom khërper kemacht fer eene spetsyaale uersache. Tes weeche, ploos tii woo uner sich ferhayrat sin thërfe sëks mache. Ti temoone fraye sich wën ti mënxe tinge mache woo Kot ferpiit. Tsum payxpiil, tii hon kërn wën eene puup un een meetche xpiile mim pênis orer mit te vulva eene fom anere. Meyer wole net ti temoone fraye, kël? —

Too is noch etwas woo ti temoone kërn hon, awer woo Yeehoowa hast. Weest tuu was tas is? — Wyolënts. (Psalm 11:5) Wyolënts is wën ti mënxe xlecht sin un mache ti anere ferkërn wee. Eriner tich tas tas waar was ti temoone sayn khiner, ti aariche kroose mënxe, kemacht hon.

Ti temoone tuun aach kërn ti layt ferxreke. Als mool, ferxtele se sich als layt woo xon kextorep sin. Tii mache soo kaar tëm toote sayn xtim noo. Soo hiner keen ti temoone ti layt un mache se tenke tas ti toote noch am leepe sin un khene xpreche mit te lepeentiche. Yaa, ti temoone mache tas fiil aan kexpëns klaape.

Tan mise mer uf phase tas Satanaas un sayn temoone uns net hiner keen. Ti Piipel saat: ‘Satanaas selepst ferxtelt sich wii een kuute engel un sayn tiiner mache tas aach.’ (2 Korinter 11:14, 15) Awer in woerheet, ti temoone sin xlecht. Wole mer siin was se mache tas mer sole aach soo sin wii tii.

Woo khene ti layt fiil wyolënts, ferkheerte sëks, kexichte iwich kayste un kexpëns sin? — Is tas net in TV prokrame, filme, in komputatoer xpiile, videogames, internet un piichelche? Meecht leese orer kuke tiise tinge uns tichter tsu Kot orer tsum Taywel un ti temoone pringe? Was mënst tuu? —

Tenk mool, weer wil hon tas mer sole tiise xlechte tinge kuke un horiche? — Richtich, Satanaas un sayn temoone. Soo, was mise mer tan mache? — Meyer mise leese, horiche un kuke kuute tinge, woo uns helfe Kot tiine. Khanst tuu tich erinere etwas kuutes woo mer mache khene? —

Wën mer mache was richtich is, prayche mer khee angst hon fon te temoone. Yeesus is xtërke wii tii, un tiise xlechte engele hon angst fon tëm. Eene taach, hon ti temoone kexraayt fer Yeesus: ‘Pist tuu uns fernichte khom?’ (Markus 1:24) Tas wërt aarich kuut sin wën ti tsayt khomt woo Yeesus Satanaas un sayn temoone fernicht, mënst tuu net? — Pis tan hin, khene mer uns sicher sin tas Yeesus wërt uns xitse fon te temoone wën mer een kuut fraayntxaft mit iim un sayne fater hon.