ALS MOOL macht Yeehoowa wunerliche tinge fer xitse khiner un tii woo sich net aleen uf phase khene. Wëns tuu ufm khamp xpatsiire keest, im xtant khanst tuu siin etwas woo sich klaycht mit was Yeehoowa macht, wëns tuu aach net klaych ferxteest was am pasiire is.

Im xtant, wëns tuu tat rom laafst, siist tuu een feechelche ufm pootem ticht pay tich. Siit aus tas se fermaleert weyer, tee lost sayn fliitche xlepe, awer wëns tuu fersuuchst tichter khome, keet tee wech fon tich; tuu keest tëm noo, awer tee keet imer wayter wech un mit mool fliit tee uf. In woerheet, tee waar net fermaleert. Wees tuu warom tee tas kemacht hot? —

Tas waar wayl sayn yunge ferxtekelt waare in een kraas pitche tat ticht. Te foochel is ti yunge sayn mama un tii hot angst kehat tas tuu teest se fine un wee mache. Tes weeche hot se sich ferxtelt tas tuu solst noo iir kuke un net ti yunge fine. Weest tuu weyer uns xitse khan soo wii te foochel sayn yunge xitst? — In te Piipel Yeehoowa is ferklaycht mit een foochel woo aatel heest, woo heleft sayn yunge. (Teuteronoomyum 32:11, 12)

Yeehoowa sayn liipste soon is Yeesus. Im himel waar Yeesus eene mechtich kayst wii sayn Fater. Tee khont sich aleen uf phase, awer wii tee kepoer is hiir uf ti Eyert, wii een kleen khint, must tee kexitst wëre.

Tas Yeesus khont Kot sayne wile mache hiir uf ti Eyert, must tee eyerst eene perfekte auskewakste mënx wëre. Satanaas wolt oft mools Yeesus um pringe, awer ti aat wii Yeehoowa tas puupche Yeesus keret hot, is een kexicht woo uns ferwunert. Teest tuu tas kërn heere? —

Khorts tëm noo wii Yeesus kepoer waar, hot Satanaas kemacht tas im himel fom Oryent een licht kexaynt hot woo sich keklaycht hot mit een xtërn. Astrooloker, mëner woo ti xtërne xtutiire, hon sich fon tas licht fiire kelos hunerte kiloometer wayt pis Yeruusalem. Tat hon se etliche mëner, woo kuut ti Piipel kekhënt hon, kefroot: ‘Woo khomt ti yuute iire tsukhunft kheenich uf ti welt?’ Ti mëner hon keantwort: “In Petleheem”. (Matheus 2:1-6)

Wii te xlecht kheenich Herotes, fon Yeruusalem, tsu heere kriit hot tas een naye kheenich uf te welt khom weyer, in ti nochper xtat Petleheem, hot tee tsu te astrooloker kesaat: ‘Keet un suucht tas khint, noochte khomt tsurik un fertseelt mich woo tee is.” Weest tuu warom Herotes wise wolt woo Yeesus weyer? — Wayl tee waar naytich un wolt Yeesus um pringe!

Wii hot Kot sayne soon kexitst? — Wii ti astrooloker Yeesus kefun hon, hon se iim kexenke kep. Noo tas, in een traam, hot Kot tëne kesaat tii selte net tsurik keen woo Herotes weyer. Tes weeche, sin se hëm kang torich een anere weech un sin net in Yeruusalem torich kang. Wii Herotes tas raus kriit hot, is tee aarich wuutich kewoer. Fer fersuuche Yeesus um pringe, hot tee kexikt toot mache ti kanse puupche unich tswaay yoer, in Petleheem. Awer tan, waar Yeesus xon wayt wech fon tat.

Wees tuu wii Yeesus fon tat wech khom is? — Noo tëm woo ti astrooloker faart kang waare, hot Yeehoowa kexikt Yoosef, Maria iire man, uf xtaye un aus rayse mit sayn familye noo Ejipt. Tat waar Yeesus kexitst fom xlechte Herotes. Yoore tëm noo, wii Maria un Yoosef tsurik khom sin fom Ejipt mit Yeesus, hot Kot wiiter mit Yoosef kexproch. In een traam, hot tee kesaat ti selte woone keen in Nasarë, woo tas khint net in kefoer weyer. (Matheus 2:7-23)

Host tuu kesiin wii Yeehoowa sayne soon kexitst hot? — Hayt, weer is wii ti feechelche woo sich ferxtekele in kraas pitche, orer wii Yeesus, wii tee kleen waar? Tas pist tuu, kël? — Un tas kept aach layt woo im xtant wole tich xaate mache. Weest tuu weer? —

Ti Piipel saat tas Satanaas is wii een leep woo krumt, un wil uns uf frese. Soo wii te leep oft mools noo keet kleenere tiere, wil aach Satanaas un sayn temoone ti khiner xaate mache. (1 Pheeter 5:8) Awer Yeehoowa is fiil xtërker wii Satanaas. Tee khan ti khiner woo iim tiine xitse un tsurik mache ales xlechtes woo Satanaas kemacht hot.

Erinerst tuu tich tas im Kapitel 10 fom tiise puuch, hon mer keleest iwich tinge woo te Taywel un sayn temoone wole tas mer mache sole? — Tii wole tas mer sëks mache uf aate woo Yeehoowa saat tas es ferkheert is. Weer sin ti eensiche woo thërfe sëks mache? — Yaa, ploos tii woo ferhayrat sin khene sëks mache mit iire fraa orer man.

Awer xeemlich, etliche auskewakste mache kërn sëks mit khiner. Tes weeche, lërne etliche puupe un meet xlechte tinge mache. Tii fange aach aan iire xenitaale oorkan in ferkheerte aate penutse. Tas is friier pasiirt in te xtat Sotooma. Ti Piipel saat tas yunge pis alter fersuucht hon sëks mache mit te mëner woo sin Lo pesuuche kang. (Xeenesis 19:4, 5)

Tan, soo wii Yeesus must kexitst wëre, must tuu aach kexitst wëre fon auskewakste — un soo kaar anere khiner — woo im xtant wole sëks mit tich mache. Ti meyerst tsayt, tiise sorte mënxe xtele sich aan als wën se tayn fraaynte weyere. Im xtant wole se tich een kexenk kepe wëns tuu ferxprechst net anere fertseele was tii mache wole mit tich. Awer tiise mënxe sin ekoiistixe soo wii Satanaas un sayn temoone; tii tenke nuer aan iire aychne wunx erfiile. Tes weeche wole se sëks mit khiner mache. Un tas is kans ferkheert!

Was mache se fer sayne wunx erfiile? — Im xtant, wole se tayn xenitaale oorkan xtraychle. Anere wole im xtant iire xenitaale oorkan aan tayn raype. Awer tuu thërfst nimant xpiile lose mit tayn xenitaale. Net tayne pruuter, orer tayn xwester, tayn mama un aach net tayne papa. Tiise teele fom khërper sin ploos fer tich.

Wii khanst tuu tich xitse fon layt woo soo xlechte tinge mache? — Los nimant xpiile mit tayn seksuaale oorkan. Wën yemant fersuucht tas mache, saa kans hat un xtram: “Los noo! Ich wëre fertseele was tuu machst!” Un wën tee saat tas es tayn xult is, klaap tas net. Tas is net woer. Fertseel yemant was tee kemacht hot, ekaal weer tas waar. Wën tee aach saat was teyer macht een kehaymnis is unich aych, fertseel tas yemant. Wën tee tich aach ferxprecht xeene kexenke orer saat tas se was xlimes keeche tich mache teet, rays aus un fertseel yemant was tee kemacht hot.

Tuu prauchst khee angst hon, awer phas imer uf. Wën tayn eltere saan tas etliche layt orer pletse kefeerlich sin fer tich, heer was tii saan. Wëns tuu tas machst, wërt tas net laycht sin fer xlechte layt etwas tich mache.