Yeesus waar perfekt, soo mus tee net um keen mit fiil xwiirichkheete woo ti meyerste layt mit mache. Awer toch, waar tee mitlaytich mit ti layt. Tee waar wilich fer ales mache fer tëne was meechlich waar, soo kaar was fiilaycht net soo neetich waar. Yaa, sayn parmhërtslichkheet hot tee uf kemuut fer ti anere helfe. Tas tsayche ti Kapitele 32, 37, 57, 99.

Ale sorte layt — yunge un alte — hon khee angst kehat fer mit Yeesus xpreche keen, tee hot sich net aan kextelt als wëne tsu fiil tsu tuun hët orer tas eyer wolt mee sin wii tii. Ti layt waare kërn pay iim, wayl se kesiin hon tas Yeesus wërklich sich mit tëne kekhimert hot. Kuk tas in te Kapitele 25, 27, 95.

Fer Yeesus waar tas een aan kewoonheet tsu sayne Fater peete, wën tee aleen waar un aach wën tee mit sayn tisipele waar. Tee hot oft kepeet, net ploos foer tas ese. Tee hot kepeet fer sayne Fater tanke un loope, un aach fer oryentiirunge ferlange wëne must een wichtich ëntxlus mache. Tas tsayche te Kapitele 24, 34, 91, 122, 123.

Yeesus hot net eyerst aan sich selepst ketacht, als mool, wën tee aach miit waar, hot tee net keruut, awer hot ti anere sayn neetichkheete foer sayn aychne ketuun. Tas is een payxpiil fer uns. Lërn iwich tas in te Kapitele 19, 41, 52.

Yeesus hot mee kemacht wii ploos in lërne tas es neetich is fertsaye. Im umkang mit sayn tisipele un anere, hot tee pewayst tas eyer selepst fërtich waar fer fertsaye. Tenk iwich ti payxpiile in te Kapitele 26, 40, 64, 85, 131.

Tas waar xon in foer raus kesaat tas ti meyerste yuute teete te Mesias net aan nëme un sayn faynte teete tee um pringe. Soo, hët khene Yeesus sich kexoont hon, un ploos kraat was neetich weer mache fer ti layt. Xtats tas, hot tee flaysich kexaft fer ti woere aanpeetung pekhant mache. Sayn flaysich aarwayt is een payxpiil fer sayn tisipele woo mise um keen mit keechente un mit tëne woo khee interes hon. Kuk ti Kapitele 16, 72, 103.

Uf fiile aate waar Yeesus kluuche wii ti imperfekte mënxe. Sicher, wayl tee perfekt waar, waar sayne khërper un ketanke soo fiil pesere tas es net meechlich waar ferklayche mit ti anere mënxe sayn. Ale tëm, waar tee teemuutich un hot ti anere ketiint. Kuk tiise lisyoone in te Kapitele 10, 62, 66, 94, 116.

Yeesus waar imer ketultich mit sayn tisipele un anere wën se net iim noo kemacht hon orer net aan keweent sayn aanreete. Yeesus hot mit ketult imer wiiter in kelërnt was se mache miste fer tas se khente ticht tsu Yeehoowa khome. Iwer lee tich wii Yeesus ketultich waar wëns tuu leest ti Kapitele 74, 98, 118, 135.