KAPITEL 37

Sol ich mich taafe lose?

Richtich orer Falx?

Weer een krist wil sin, mus sich taafe lose.

□ Richtich

□ Falx

Te haupste opjetiiw fom taaf is tich tsurik hale fom sint.

□ Richtich

□ Falx

Ti taaf is een wichtiche xrit tas tuu keret khanst wëre.

□ Richtich

□ Falx

Wëns tuu net ketaaft pist, host tuu khee responsapiliteet foer Kot.

□ Richtich

□ Falx

Wën tayn fraaynte sich taafe lose, tas tsaycht tas tuu pist aach fërtich fer tiise xrit kepe.

□ Richtich

□ Falx

Wëns tuu tich aan ti Piipel halst, een fraaynt fon Kot wilst sin un mit anere iwich tayne klaape xprechst, tan is natiirlich tas tuu aan te taaf tenkst. Awer wii khanst tuu wise tas tuu wërklich fërtich pist fer tiise xrit kepe? Fer tich helfe tiise frooch antworte, wole mer unersuuche ti phunkte woo foer traan kenënt sin woer.

● Weer een krist wil sin, mus sich taafe lose.

Richtich. Yeesus saat sayn tisipele miste ketaaft wëre. (Matheus 28:19, 20) In woerheet, eyer selepst hot sich taafe kelos. Fer Kristus noo keen, must tuu tich taafe lose wëns tuu rayf kenuuch pist fer tiise ëntxlus mache un hërtslich winxe tas mache.

● Te haupste opjetiiw fon te taaf is tich tsurik hale fom sint.

Falx. Torich ti taaf tsaychst tuu foer ti layt tas tuu tayn leepe fer Yeehoowa kep host. Tuu kepst tayn leepe fer Yeehoowa wayls tuu wilst leepe soo wii tee saat, un net fer tich tsurik hale fon ferkheerte tinge mache woo tich im xtant kefale.

● Ti taaf is een wichtiche xrit tas tuu keret khanst wëre.

Richtich. Ti Piipel saat tas ti taaf is een wichtiche xrit fer keret wëre. (1 Pheeter 3:21) Awer tas petayt net tas ti taaf tich xitst fon etwas xlechtes woo pasiire khan. Tuu must tich taafe lose wayls tuu Yeehoowa liipst un wilst tee hërtslich tiine fer imer. (Markus 12:29, 30)

● Wëns tuu net ketaaft pist, host tuu khee responsapiliteet foer Kot.

Falx. Tyako 4:17 saat: “Wën yemant wees was richtich is fer se mache un imer noch tas net mache tuut, is es een sint fer tëm” — op tee ketaaft is orer net. Tes weeche, wëns tuu weest was richtich is un pist rayf kenuuch fer tayn leepe in een ërnst aat fiire, tan fiilaycht is es tsayt fer mit tayn eltere xpreche orer mit een anere rayfe krist. Tii khene tich helfe foer perayte fer ketaaft wëre.

● Wën tayn fraaynte sich taafe lose, tas tsaycht tas tuu pist aach fërtich fer tiise xrit kepe.

Falx. Tuu solst tich noore taafe lose wëns tuu tas wërklich wilst. (Psalm 110:3) Fer tich taafe lose, must tuu kenau ferxteen was es petayt Yeehoowa sayn Tsayer sin un must sicher sin tas tuu perayt pist fer tiise responsapiliteet tich iwerneme. (Eklesyastes 5:4, 5)

Eene xrit woo tayn leepe ënert

Ti taaf is eene xrit woo tas leepe ënert un pringt fiil seechen. Awer tas pringt aach een kroos responsapiliteet — ales mache was tuu fer Yeehoowa ferxproch host.

Pist tuu fërtich fer tich taafe lose? Wën yaa, tan host tuu fiil uersache fer tich fraye. Was fer kreeser eere khenst tuu hon wii Yeehoowa hërtslich tiine un taach tsu taach tsayche tas tuu fer iim leepst? (Matheus 22:36, 37)

IM NEEKSTE KAPITEL

Lërn wii tsiile xtele fer kuut tayn leepe penutse.

HAUPSTE TEKST

“Tas teyer ayer khërper foer xtelt wii een lepeentich opfer, woo haylich is un woo Kot kefalt. Un soo tuut teyer een haylich tiinst mache mit ayre ferxtant.“ (Romaaner 12:1)

FOERXLACH

Tayn eltere khene tich helfe fer eene pruuter orer een xwester in te kemaynt raus suuche woo tich helfe khan in spirituaal aat foran keen. (Aphostele sayn Kexicht 16:1-3)

WUST TUU . . . ?

Ti taaf is een wichtich teel fom “sinaal” woos tuu prauchst fer keret wëre. (Esekyël 9:4-6)

MAYN PLEEN!

Ep ich mich taafe lose, wil ich peser ferxteen tiise piiplixe inlërnunge: ․․․․․

Was wil ich mayn eltere frooe iwich tiise sache: ․․․․․

WAS TEEST TUU SAAN?

● Warom is ti taaf eene ërnste xrit?

● Was khent mache tas een yunge sich foer ti tsayt taafe lose teet?

● Was macht tas etliche yunge uf xupe sayn leepe tsu Yeehoowa ferxpreche un sich taafe lose?

[Hooche phunkt]

“Traan tenke tas ich ketaaft sin, heleft mich mache was richtich is un mich wech hale fon was ferkheert is.” — Holly

[Khaste/​Pilt]

Frooche woo oft kemacht wëre iwich taaf

Was wërt torich ti taaf simpolisiirt? Wëns tuu uner ketaucht wërst im waser, is es wëns tuu xtërpe teest fer tayn friirix leepe, woos tuu kemacht host was tuu wolst. Un wëns tuu aus tëm waser khomst, is wëns tuu een naye leepe aanfange teest fer Yeehoowa sayne wile mache.

Was petayt tayn leepe fer Yeehoowa ferxpreche? Tas petayt tayn leepe fer Yeehoowa kepe un ferxpreche mache was tee wil. (Matheus 16:24) Tes weeche, eeps tuu tich taafe lost, must tuu peete fer Yeehoowa un iim ferxpreche tas tuu tëm sayne wile im eyerst plats in tayn leepe tuust.

Wii khan ich mich foer perayte fer ti taaf? Tuu must aan wëne was ti Piipel in lërnt un xpreche mit anere iwich tayne klaape. Tuu must aach tayn fraayntxaft mit Kot ferxtërke torich tas kepeet un ti Piipel leese. Tuu solst Yeehoowa tiine wayl tuu tas wilst — net wayl anere wole tas tuu tas mache solst.

Wii alt mus yemant sin fer ketaaft wëre? Tas elter is net tas haupste. Tuu must alt kenuuch sin — un rayf — fer ferxteen was tas petayt tayn leepe tsu Kot ferxpreche.

Un wëns tuu tich taafe lose wilst, awer tayn eltere saan tas tuu must noch een pisye waarte? Im xtant, tenke se tas tuu prauchst pisye mee tsayt fer wise wii ti oryentiirunge fer kriste aan wëne. Nëm iire aanreete aan un penuts ti tsayt fer tayn fraayntxaft mit Yeehoowa ferxtërke. (1 Samuël 2:26)

[Khast]

Aarwayts plaan

Tenkst tuu aan tich taafe lose?

Tiise phunkte hiir sole tich helfe fest xtele ops tuu xon soo wayt pist. Lees ti Piipel tekste woo kenënt sin.

Wii pewayst tuu yets xon tas tuu tich uf Yeehoowa ferlost? (Psalm 71:5) ․․․․․

Weest tuu kenau te unerxiit tswixich was richtich un was ferkheert is? (Hepreeyer 5:14) ․․․․․

Wii oft peetst tuu? ․․․․․

Peetst tuu iwich spetsiifixe tinge? In tayn kepeet, wii saast tuu tas tuu Yeehoowa liipst? (Psalm 17:6) ․․․․․

Xrayp uf was tuu kërn mache teest fer tayn kepeete ferpesere. ․․․․․

Wii oft xtutiirst tuu ti Piipel? (Yosuee 1:8) ․․․․․

Iwich was xtutiirst tuu in tayn persoonlich xtuutyum? ․․․․․

Xrayp hiir uf was tuu in tayn persoonlich xtuutyum unersuuche wilst. ․․․․․

Mënst tuu tas tayn preetich aarwayt kuut weyer? (Tsum payxpiil: Weest tuu ti haupste inlërnunge fon te Piipel aus leye? Keest tuu wiiter pesuuche ti woo interes tsayche aan te Piipel? Xtrengst tuu tich aan fer een Piipel xtuutyum aan fange?)

□ Yaa □ Nee

Keest tuu aach preetiche wën tayn eltere net keen? (Aphostele sayn Kexicht 5:42)

□ Yaa □ Nee

Xrayp uf was tuu tich foer nëme wilst fer in ti preetich aarwayt mache. (2 Timoteus 2:15) ․․․․․

Keest tuu reekelmeesich uf te fersamlung orer tuust tuu se oft ferliire? (Hepreeyer 10:25) ․․․․․

Wii machst tuu teel in te fersamlunge? ․․․․․

Keest tuu aach oone tayn eltere uf ti fersamlunge (wën tii erlaupe)?

□ Yaa □ Nee

Frayt tich Kot sayne wile mache? (Psalm 40:8)

□ Yaa □ Nee

Erinerst tuu tich ti situatsyoone woos tuu net aan kenom host mache was tayn koleke wolte? (Romaaner 12:2) ․․․․․

Was khanst tuu mache tas tayn liip tsu Yeehoowa nii ferkeet? (Yuutas 20, 21) ․․․․․

Teest tuu foran Yeehoowa tiine wën tayn eltere orer fraaynte net mee tas mache teete? (Matheus 10:36, 37)

□ Yaa □ Nee

[Pilt]

Ti taaf is eene ërnste xrit woo tas leepe ferënert, kraat soo wii ti hayrat.