KAPITEL 35

Wii khan ich Yeehoowa sayn froynt wëre?

Noo een persoonlich unklik, hot Jeremy ferxtan ti woere froyntxaft mit Yeehoowa. “Wii ich 12 yoer waar, hot mayne fater unser familye im xtich kelos”, saat tee. “Een nacht waar ich in mayn pet am peete, un aan kehalt tsu Yeehoowa tas mayne fater tsurik khome solt.”

Jeremy waar aarich traurich, tan hot tee aan kefang ti Piipel leese. Wii tee te Psalm 10:14 kefun hot, tas hot tëm sayn hërts aan kekrif. Tiise psalm saat iwich Yeehoowa: “Te unkliikliche khomt tsu tich; Tuu helefst tee woo khee fater hot. Tuu selepst pist mayn hilfe kewoer.” Jeremy saat: “Tas waar mich aan als wën Yeehoowa teet mit mich xpreche, teet mich tsayche tas tee mayne hilfe weyer, mayne Fater. Khënt ich een pesere fater wii Tee hon?”

EKAAL ops tuu etwas mit machst wii Jeremy orer net, ti Piipel tsaycht tas Yeehoowa wil tas tuu tëm sayn froynt solst sin. Tas is soo wii ti Piipel saat: “Khomt ticht tsu Kot, un Eyer wërt ticht tsu aych khome.” (Tyako 4:8) Tenkt aan was tiise wërter uf sich hon: opwool tuu tee net siin khanst — un tas tee anerst is wiis tuu in ale aate Yeehoowa Kot tuut tich inlaate fer tëm sayn froynt sin!

Awer tuu must tich aan xtrenge fer Kot sayn froynt sin. Tsum payxpiil: wëns tuu een pluume xtok in een waase host, tee wakst net aleen. Fer tas tee xeen wakst, must tuu waser kepe un ufm richtich plats hin xtele. Soo is tas aach mit ti froyntxaft mit Kot. Was khanst tuu mache fer ti froyntxaft foran wakse?

Ti Piipel xtutiire hot kroos weyert

Fer een kuut froyntxaft hon mise mer tswaay tinge mache — horiche un xpreche. Tas selwiche khan ma saan iwich ti froyntxaft mit Kot. Ti Piipel leese un xtutiire is ti aat woo Kot penutst fer mit uns xpreche. — Psalm 1:2, 3.

Khan sin tas tuu im xtant net soo kërn xtutiire tuust. Fiil yunge tuun liipe telewisyoon kuke, sich ferkniiche mit een xpiil orer tsayt rom pringe mit sayn froynte. Awer, wëns tuu wilst Yeehoowa sayn froynt sin, kepts khee aner aat— tuu must horiche was tee saat torich ti Piipel xtutiire.

Awer prauchst tich khee ketanke mache. Ti Piipel xtutiire is net soo was xlimes. Tuu khanst lërne tas kërn mache — opwool xtutiire tich net aarich kefalt. Tas eyerst woos tuu mache must is tich tsayt lose fer ti Piipel xtutiire. “Ich hon mich in kericht,” saat een yung woo Laís heest. “Tas eyerst woo ich mache yeete moynt is een kapitel fon ti Piipel leese.” Maria, fon15 yoer, tuut sich anerst in richte. Tii saat: “Ich tuun een xtik in ti Piipel leese yeete oomt eep ich xloofe keen.”

 Kuk te khaste in ti sayt 292 fer tich helfe tayne aychne xtuutyum in richte. Noochte, xrayp uner traan een uer tsayt woos tuu khënst 30 minute penutse fer Kot sayn Wort xtutiire.

․․․․․

Tich in richte is ploos te aan fang. Wëns tuu aan fangst xtutiire, khanst tuu mërke tas es net imer laycht is ti Piipel leese. Fiilaycht mënst tuu tas selwiche wii Jezreel, fon 11 yoer, woo uf richtich saat: “Etliche teele fon ti Piipel sin xweer fer leese un sin kaar net interesant.” Wëns tuu aach soo tenkst, kep net uf. Tuu wayte ti Piipel xtutiire un ferkes net tas es ti tsayt is fer tayne froynt, Yeehoowa Kot, horiche. Soo fiil mee wiis tuu tich aan xtrengst, mee interesant un nutslich wërt tayn Piipel xtuutyum!

Peete is wichtich

Meyer fertseele mit Kot torich tas kepeet. Tenk wii een xeen kexenk tas kepeet is! Tuu khanst mit Yeehoowa Kot fertseele in yeete xtun, taach orer nacht. Tee is imer fërtich fer tich horiche. Un noch, tee wil horiche was tuu saan wilst. Tes weeche, tuut ti Piipel tich uf muter: “Awer, in yeete situatsyoon, ferlangt Kot sayn hilef torich peete, aan hale un tanke.” — Filiper 4:6.

Wii tiise wersikel tsaycht, tuu khanst mit Yeehoowa iwich fiil tings xpreche. Tas khëne tayn propleeme sin, tayn ëngst un aach tings iwich was tuu petanklich pist. Is tas net woer tas tuu tayn froynte tankst wën tii etwas kuutes fer tich mache? Tan, tank aach Yeehoowa woo noch mee fer tich kemacht hot wii tayn froynte mache khënte. — Psalm 106:1.

Mach een list fon tinge woos tuu tsu Yeehoowa petanklich pist.

․․․․․

Sicher, als mool khan pang un ëngst mache tas tuu tich iwerlaat xpiirst. Te Psalm 55:22 saat: “Xmays tayn last uf Yeehoowa, un tee tuut tich xtitse. Tee tuut nii erlaupe tas te kerechte falt.”

Xrayp, uner traan, iwich was tuu tich ketanke machst woos tuu khënst mit Yeehoowa xpreche.

․․․․․

Aychne speryëns

Too is noch een aner aspëkt fon tayn froyntxaft mit Kot woos tuu net ferkese thërfst. Te psalmist hot kexrip: “Xmëkt un siit tas Yeehoowa kuut is.” (Psalmo 34:8) Wii Tawi te Psalm 34 kexrip hot, hot tee kraat een xlim speryëns mit kemacht. Tee waar am aus rayse fom Kheenich Saul — tee wolt Tawi umpringer. Noo tas, must tee xuts suuche unich sayn faynte, ti filisteer. Wii tas aus kesiin hot tas tee um khome teet, waar tee xlau, un hot sich ferxtelt als wën eyer ër weyer un soo is se am leepe keplip. — 1 Samuël 21:10-15.

Tawi is knap aus keris fom toot, awer tee hat net ketacht tas es weyer weeche sayn aychne kluucheet. Tee hot eere tsu Yeehoowa kep. Im Psalm 34: 4, hot tee kexrip: “Ich hon Yeehoowa kesuucht un Eyer hot mich keantwort. Eyer hot mich fray kemacht fon mayn ëngste.” Soo waar tas torich Tawi sayn aychne speryëns tas tee khont anere uf muute fer ‘xmëke un siin tas Yeehoowa kuut is.’ *

Khanst tich etwas erinere woo pasiirt is mit tich woo pewayst tas Yeehoowa tich uf kephast hot? Wën yaa, xrayp iwich tas uner traan. Foerxlach: Tayn speryëns prauch net etwas xlimes sin. Tenkt aan seechne woos tuu taach tsu taach krist, woos tuu als mool kaar net mërkst.

․․․․․

Fiilaycht, tayn eltere hon tich ti Piipel in kelërnt. Wëns soo is, tas is een seechen. Awer toch, must tuu tayn froyntxaft mit Yeehoowa uf paue. Wëns tuu tas noch net kemacht host, ti informatsyoone fon tiise kapitel khëne tich helfe aan fange. Yeehoowa seechent tayn aanxtrengung. Ti Piipel saat: “Tuut wayter ferlange un es wërt fer aych kep; tuut wayter suuche, un teyer tuut es fine.” — Matheus 7:7.

LEES MEE IWIICH TIISE SACHE IM WOLUME 1, KAPITEL 38 UN 39

IM NEKSTE KAPITEL

Mënst tuu tas es xweer is iwich Kot mit anere layt xpreche? Lërn wii tuu khanst een antwort kepe iwich was tuu klaapst.

[Noote]

HAUPSTE TEKST

“Froo sin tii woo sayn kaystliche neetichkheete erkhëne.” — Matheus 5:3.

FOERXLACH

Wëns tuu ploos fier sayte fon ti Piipel yeete taach leest, tan kriist tuu se kans kelees in unkefeer een yoer.

WUST TUU . . . ?

Wayls tuu tas puuch leese tuust un wënst aan ti piiplixe aan reete woo too trin xteen, tsaycht tas Yeehoowa een persoonlich interes aan tich hot. — Yoohan 6:44.

AKTSYOON PLAAN!

Fer mee nuts hon fon mayne persoonlich Piipel xtuutyum, ich tuun ․․․․․

Fer reekelmeesich peete, ich tuun ․․․․․

Ich teet kërn mayn eltere een frooch mache iwich tiise sache: ․․․․․

WII TEEST TUU ANTWORTE?

● Was khanst tuu mache tas tayne xtuutyum tich peser kefalt?

● Warom wil Yeehoowa ti kepeete fon imperfekte mënxe horiche?

● Wii khanst tuu ferpesere ti kwaliteet fon tayn kepeete?

[Hooch phunkt]

Wii ich yung waar, hat ich imer tas selwiche kepeet kemacht. Hayt, fersuuche ich peete iwer kuute un xlechte tinge woo yeete taach pasiire. Wayl eene taach is anerste wii te anere, tas heleft mich net yeetes mool tas selwiche tinge saan. — Eve

[Khaste/​Pilt]

 Unersuuch tayn Piipel.

1. Suuch raus een Piipel kexicht woos tuu kërn leese teest. Peet un ferlang kluucheet fer tas kuut ferxteen.

2. Lees kenau un kep acht tsu was tuu leest. Tuu tich net ayle. Wëns tuu am leese pist tenk tas tuu tat weyerst: wii siit tas aus? was is am pasiire? horich was ti layt xpreche; tenk wii tas ese riiche un xmëke teet un soo foran. Mach tas es kexicht leepe kriit!

3. Tenk aan was tuu keleest host. Mach tich frooche wii ti:

● Warom hot Yeehoowa tas kexicht in ti Piipel ketuun?

● Was fer persoone fon ti Piipel sin te weyert noo mache un was sin payxpiile woo uns etwas aan saan?

● Was fer praktixe lisyoone khan ich lërne fon tiise leesung?

● Was lërnt mich tas iwich Yeehoowa un ti aat wii tee mit ales um keet?

4. Peet tsu Yeehoowa. Fertseel iim was tuu in tiise xtuutyum kelërnt host un wiis tuu tas aan wëne wilst in tayn leepe. Tank imer Yeehoowa fer tas kexenk woo tee tich kept hot, sayn Wort — ti Piipel!

[Pilt]

“Tayn wort is een lamp fer mayne fuus un een licht fer mayne weech.” — Psalm 119:105.

[Khaste/​Pilt]

Eyerst, ti wichtiche tinge

Khee tsayt fer peete? Khee tsayt fer ti Piipel xtutiire? Oft layt tas aan wiis tuu raus suuchst was wichtiche is.

Mach een speryëns: Hool een ayme tuu fiil kroose xteen rin. Tan fiil te ayme mit sant. Yets is tee fol mit xteen un sant.

Yets mach te ayme leyer, awer heep ti xteen un sant uf. Mach tas yets anerste: Fil te ayme mit sant un noochte fersuuch ti xteen rin tuun. Is khee plats? Tas is wayl yets host tuu eyerst sant rin ketuun.

Was hon mer kelërnt? Ti Piipel saat: “Tas teyer sicher sayt iwer was fer tinge wichticher sin.” (Filiper 1:10) Wëns tuu kleene tinge, wii ferkniichung, ufm eyerst plats in tayn leepe tuust, tan khan aus siin tas tuu khee tsayt host fer wichtiche tinge — spirituaale aktiwiteete. Awer, wëns tuu ti piiplix aanreet aan wënst, tan host tuu tsayt fer spirituaale aktiwiteete un aach fer ferkniichung. Tuu prauchst ploos wise was te eyerst in te ayme rin tuun!

[Pilt]

Wii een pluume xtok in een waase, mus ti froyntxaft uf kephast wëre fer foran wakse