1. Woo khëne mer iwer ti tsukhunft lërne?

HOST tuu xon ti noorichte aan kekukt un tich kefroot: ‘Khëne ti tinge noch xlimer këpe?’ Mit soo fiil unklike un xlëchtichkheet tuun ëtliche layt mëne tas tas ën fon te wëlt ticht is. Meecht tas woer sin? Khëne mer wise was in tsukhunft noch pasiire tuut? Yaa. Es is woer tas ti mënxe nët foer hëyer saan khëne was noch uf uns tsu khomt, awer Yeehoowa khan es. In te Piipel saat er was mit te ëyert pasiire tuut un wii unser leepe sin wërt. (Isaías 46:10; Tiago 4:14)

2, 3. (a) Was wolte Yeesus sayn tisipele wise? (b) Was hot Yeesus tëne keantwort?

² Wën mer in te Piipel iwers ën fon te wëlt leese, tuut tas nët tas ën fon te ëyert petayte, awer tas ën fon te xlëchtichkheet. Yeesus hot ti layt in kelërnt tas Kot sayn Raych iwer ti ëyert rechiire teet. (Lucas 4:43) Sayn tisipele wolte wise wan Kot sayn Raych khome teet un hon tee kefroot: “Wan tuun tiise tinge pasiire, un was wërt tas sinaal sin tas tuu too pist un tas tiise sisteem fon tinge am ën is?” (Mateus 24:3) Yeesus hot tëne nët te kenaue taach këp, awer hot tëne kesaat was khorts foer tëm ën fon tiise wëlt pasiire teet. Tas was Yeesus kesaat hot tuut hayt pasiire.

³ In tiise kapitel tuun mëyer lërne warom mer saan khëne tas tas ën fon te wëlt ticht is. Ëyerstens, mise mer iwer een kriich lërne woo im himel pasiirt is. Tan khëne  mer ferxteen warom ti tinge hiir uf te ëyert soo xlim sin.

4, 5. (a) Was is im himel pasiirt klaych tëm noo wii Yeesus Kheenich këp is? (b) Was teet uf ti ëyert pasiire tëm noo wii te Taywel runer keworef këp is?

⁴ Im kapitel 8 hon mer kelërnt tas Yeesus im yoer 1914 Kheenich im himel këp is. (Daniel 7:13, 14) Tas puuch fon Apocalipse saat was pasiirt is: “Im himel is een kriich aus keproch: Michel [Yeesus] un sayn ëngele hon keeche te trakoon [Satanaas] kekhëmpft un te trakoon un sayn ëngele hon kekhëmpft.” * Satanaas un sayn taywele hon te kriich ferloer un sin tsu ti ëyert keworef këp. Tënk mool wii froo ti ëngele këp sin! Awer was teet mit te layt uf te ëyert pasiire? Ti Piipel saat tas es een xwëyer tsayt fer ti mënxe këpe teet. Warom? Wayl te Taywel aarich wuutich is, “wayl er wees tas er een khorts tsayt hot.” (Apocalipse 12:7, 9, 12)

⁵ Te Taywel tuut uf te ëyert soo fiil propleeme aan xafe wii er khan. Tee is wuutich wayl er een khorts tsayt hot eep Kot tee wëch xaft. Wole mer siin was Yeesus kesaat hot was in te lëtste taache pasiire teet. (Kuk ti Noote 24)

6, 7. Was khan ma iwer kriich un hunger hayt se taach saan?

⁶ Kriich. Yeesus hot kesaat: “Natsioon tuut sich keeche natsioon xtële un raych keeche raych.” (Mateus 24:7)  In unsere taache sin mee layt in kriiche um khom wii in yeete aner tsayt fon te mënxe kexichte. Een orkanisatsioon woo xtutiirt was uf te wëlt pasiirt, informiirt tas sayt 1914 sin mee wii 100 milioone mënxe in kriiche um keprung këp. Tswixich te yoere 1900 un 2000 sin tray mool mee mënxe in kriiche um khom, wii in te 1900 yoere foer hëyer. Tënk mool tas eelent un phayn woo milioone mënxe weeche tëm kriich mit kemacht hon!

⁷ Hunger. Yeesus hot kesaat: “Es wërt hungernoot këpe.” (Mateus 24:7) Opwool hayt mee ësmitel wii friier protutsiirt këpe, hon fiile mënxe nët kenuuch fer se ëse. Warom nët? Wayl se nët kenuuch këlt hon fer ësmitel se khaafe orer khee plats hon fer se planse. Mee wii een pilioon mënxe mise mit weenicher wii een tolar am taach leepe. Ti Wëlt Kesuntheet Orkanisatsioon saat tas yeetes yoer milioone khiner xtërpe tuun, haupstsëchlich, wayl se nët kenuuch ëse hon fer kesunt se plaype.

8, 9. Was tsaycht tas Yeesus sayn profetsiie iwer ëyertxutere un krankheete sich erfiile tuut?

 ⁸ Ëyertxutere. Yeesus hot foer hëyer kesaat: “Es tuut kroose ëyertxutere këpe.” (Lucas 21:11) Yeetes yoer tuun mer kroose ëyertxutere waarte. Sayt tëm yoer 1900 sin unkefeer 2 milioone mënxe weeche ëyertxutere kextorep. Opwool ti teknoloxii in unsere taache hëleft ti tsayche fon te ëyertxutere friier se siin, tuun imer noch fiile mënxe xtërpe.

⁹ Krankheete. Yeesus hot foer hëyer kesaat tas es “krankheete” këpe teet. Kefeerliche krankheete teete sich xnël ferprayte un fiile um pringe. (Lucas 21:11) Opwool ti toktere kelërnt hon fiile krankheete se pehantele, këpts noch fiile woo khee tratamënt hon. Een reportaaj leet aus tas yeetes yoer milioone mënxe weeche krankheete wii xwintsucht, malaaria un kholera xtërpe tuun. Un tas is nët ales. In te lëtste 40 yoere hon toktere mee wii 30 naye krankheete kefun, un fer ëtliche këpts khee tratamënt.

10. Wii tuut 2 Timóteo 3:1-5 sich hayt erfiile?

¹⁰ Ti Piipel saat in 2 Timóteo 3:1-5 tas es “in te lëtste taache kritixe tsayte këpt, woo xwëyer wëre fer um se keen”. Wii te aphostel Phaul kesaat hot, teete ti layt

• sich sëlepst liipe

• tas këlt liipe

• nët sayn ëltere aan heere

• layt sin woo ma nët traue khan

• sayn familye nët liipe

• khee sëlepst kontrol hon

• wiolënt un krop sin

• ti luste mee wii Kot liipe

• xayne tas se Kot liipe, awer tee nët aan heere.

11. Was saat Salmo 92:7 tas mit te xlëchte layt pasiire tuut?

¹¹ Sin ti layt soo woos tuu woonst? Uf te kans wëlt këpts layt woo soo sin. Awer Kot tuut nët erlaupe tas tas imer soo playpt. Tee ferxprëcht: “Wën ti xlëchte wii unkraut wakse, un ale woo xlëchtes mache, pliie, is  es tas se fer imer fernicht wëre.” (Salmo 92:7)

12, 13. Was tuut Yeehoowa uns in te lëtste taache in lërne?

¹² Ti Piipel hot foer hëyer kesaat tas ti wëlt in te lëtste taache fol phayn un eelent wëyer. Awer ti Piipel saat aach tas kuute tinge pasiire teete.

¹³ Ti Piipel ferxteen. Te profeet Taniël hot iwer ti lëtste taache kexrip: “Ti woere khëntnis wërt raychlich pekhant këpe.” (Daniel 12:4) Kot teet sayn folek hëlfe ti Piipel soo kuut se ferxteen wii noch nii. Haupstsëchlich sayt tëm yoer 1914 tuut Yeehoowa tas mache. Tee hot uns tsum payxpiil inkelërnt wii important sayn naame is, was er fer ti ëyert foer hot, ti woerheet iwer tas fray khaaf opfer, was pasiirt wën mer xtërpe un iwer tas ufxtaye fom toot. Mëyer hon kelërnt tas ploos Kot sayn Raych unsere propleeme al wëch xafe khan. Mëyer hon aach kelërnt wii mer een frooes leepe hon khëne, un wii mer Kot tsufriite lose khëne. Awer was mache Kot sayn tiiner mit tëm was se kelërnt hon? Een aner profetsii këpt uns ti antwort. (Kuk ti Noote 21 un 25)

14. (a) Woo wëre ti kuute oter fom Raych kepreeticht? (b) Weer tuut se preetiche?

¹⁴ Preetich aarwayt in te kans wëlt. Yeesus hot iwer ti lëtste taache kesaat: “Tiise kuute oter fom Raych wëre uf te kans pewoont ëyert kepreetich.” (Mateus 24:3, 14) Ti kuute oter fom Raych këpe in mee wii 230 lënter un in mee wii 700 xprooche kepreeticht. Yaa, uf te kans ëyert, tuun Yeehoowa sayn Tsayer ‘fon ale natsioone un xtëme’ ti  layt hëlfe se ferxteen was Kot sayn Raych is un was es fer ti mënxe mache tuut. (Apocalipse 7:9) Un tii mache tas umsonst. Awer, wii Yeesus kesaat hot, fiil layt teete wuut fon Yeehoowa sayn Tsayer hon un teete se yachte. (Lucas 21:17) Awer, es këpt niks woo ti preetich aarwayt um hale khan.

15. (a) Klaapst tuu tas mer in te lëtste taache leepe? Warom? (b) Was tuut pasiire mit tëne woo Kot aan heere un mit tëne woo tas nët mache?

¹⁵ Klaapst tuu tas mer in te lëtste taache leepe? Fiile profetsiie fon te Piipel iwer ti lëtste taache sin hayt am pasiire. In khorts tsayt tuut Yeehoowa xike tas ti kuute oter nëme kepreetich këpe sole, tan khomt “tas ën”. (Mateus 24:14) Was is tas ën? Es is te Armaxeton, wën Kot ale xlëchtichkheet tsum ën pringt. Yeesus un sayn mëchtiche ëngele tuun al woo Yeehoowa un Yeesus nët aan heere, fernichte. (2 Tessalonicenses 1:6-9) Tëm noo, tuun Satanaas un ti taywele nëme ti layt ër fiire. Al woo Kot aan heere wole un sayn Raych aan nëme, tuun tan siin wii ale ferxprëche fon Kot woer wëre. (Apocalipse 20:1-3; 21:3-5)

16. Wayl tas ën soo ticht is, was must tuu mache?

¹⁶ Wayl tas ën soo ticht is, is es important tas sich yeete eene fon uns frooe tuut: ‘Was mus ich mache?’ Ëyerstens, tuu must tayn xtuutium ërnst nëme. Yeehoowa wil hon tas tuu imer mee fon te Piipel lërnst. (João 17:3) Tsweetens, tuu tich aan xtrënge fer in te fersamlunge fon Yeehoowa sayn Tsayer imer khome . Tii tuun sich yeete woch fersamele fer ti Piipel se xtutiire. (Lees Hebreus 10:24, 25) Trite, tuu klaych ti ënerunge, woos tuu in tayn leepe mache must, mache. Wëns tuu mache tuust was Yeehoowa tsufriite lost, wërt tayn froyntxaft mit Tee imer xtërker. (Tiago 4:8)

17. Warom wëre ti layt sich ferwunere wën tas ën khomt?

¹⁷ Te aphostel Phaul hot aus keleet tas ti fernichtung fon te xlëchte in een tsayt khomt, woo ti mëyeste nët waarte teete, soo “wii een xpits puup in te nacht”. (1 Tessalonicenses 5:2) Yeesus hot foer hëyer kesaat tas fiile, ti sinaale tas mer in te lëtste taache sin, nët siin wole. Tee hot ti lëtste taache mit Noee sayn taache ferklaycht. Tee hot kesaat: “Wayl in tëne taache foer te sintfluut hon ti layt kës un ketrunk, ti mëner hon kehayrat un ti fraae sin ferhayrat këp, pis tsum taach woo Noee in ti arich rin kang is, un tii hon sich niks traus kemacht, pis ti sintfluut khom is un se al wëch kekheert hot.” (Mateus 24:37-39)

18. Was hot Yeesus kesaat tas mer uf phase mise?

¹⁸ Yeesus hot kesaat tas mer uf phase solte fer nët mit “tsu fiil ëse un trinke un mit te soriche fom leepe” iwerlaat wëre. Ëyer hot kesaat tas tas ën uf een mool khome tuut, “wii een fal”, un tas es ‘iwer ale khomt woo uf te ëyert woone’. Tan hot er noch kesaat: “Tës weeche, playpt wachsam, tuut ti kans tsayt peete tas tëyer es hin kriit fon al tiise tinge, woo pasiire mise, nët petrof se wëre un foer te mënxe Soon xteen khënt.” (Lucas 21:34-36) Warom is es important tas was Yeesus kesaat hot, aan se heere? Wayl in khorts tsayt wërt te Taywel sayn xlëcht wëlt fernicht. Ploos tii woo Yeehoowa un Yeesus sayn tsuxtimung kriin, tuun tas ën iwerleepe un tas eewich leepe in te naye wëlt kriin. (João 3:16; 2 Pedro 3:13)