1-3. (a) Was tuut uns kefang hale? (b) Wii macht Yeehoowa uns fray?

XTËL teer foer tas tuu inkexpërt pist, weeche etwas woos tuu nët kemacht host. Es këpt khee xans tas tuu een taach fray khomst. Wiis aus siit, këpts khee hofnung fer ti tsukhunft, un too këpts niks was tuu mache khanst. Awer, kraat woo tuu tayn hofnung ferloer host, tuust tuu yemant fine woo ti macht hot fer tich fray se mache, un tee hot ferxproch tas er teer hëleft! Wii teest tuu tich fine?

² Mëyer al sin kefangne fom toot. Es is een tuun was mer mache, mer khome aynfach nët los. Awer Yeehoowa hot ti macht fer uns fom toot fray se mache. Un tee hot ferxproch tas ‘te lëtste faynt, te toot, tsu niks kemacht wërt’. (1 Coríntios 15:26)

³ Tënk mool aan tëm friite woos këpt wën te toot nët mee eksistiirt! Yeehoowa tuut nët ploos te toot fermache. Ëyer tuut aach tii, woo toot sin, tsurik ins leepe pringe. Ti Piipel nënt tas ufxtaye fom toot. Yeehoowa ferxprëcht tas ‘ti ëyert, tii oone kraft im toot, ins leepe khome lost’. (Isaías 26:19) Was petayt tas fer tich?

4. (a) Was khan uns treeste wën een parent orer froynt xtërept? (b) Weer waare ëtliche fon Yeesus sayn kuute froynte?

⁴ Wën een keliipte persoon xtërept, is es xwëyer ti  phayn un ti trauer aus se hale. Too këpts niks was mer mache khëne fer tee tsurik ins leepe se pringe. Awer ti Piipel këpt uns een sicher hofnung. (Lees 2 Coríntios 1:3, 4) Yets tuun mer een payxpiil pexprëche woo tsaycht wii Yeehoowa un Yeesus unsere liipe parente tsurik ins leepe pringe wole. Yeesus hot oft mools Lasaro un sayn xwëstere Marta un Maria pesuucht, woo kuute froynte fon tëm waare. Ti Piipel saat: “Yeesus hot Marta un sayn xwëster, un Lasaro keliipt.” Awer, een taach, is Lasaro kextorep. (João 11:3-5)

5, 6. (a) Wii hot Yeesus sich kexpiirt wii er kesiin hot tas Lasaro sayn familye un froynte keprilt hon? (b) Wii tuut ti traurichkheet woo Yeesus kexpiirt hot uns treeste?

⁵ Yeesus is Marta un Maria treeste kang. Wii Marta tas keheert hot, is se tëm aus te xtat ëntkeeche kang. Tii waar froo tas Yeesus tat waar, awer hot kesaat: “Hër, wëns tuu too hiir wëyerst, wëyer mayne pruuter nët kextorep.” Marta hot kemënt tas Yeesus tsu xpeet khom is. Tan, hot Yeesus kesiin tas Maria, am prile waar. Tëne sayn phayn, hot Yeesus soo traurich kelos tas er aach keprilt hot. (João 11:21, 33, 35) Tee hot te xmërts kexpiirt, woo te toot fon yemant woo mer liipe, pringt.

⁶ Se wise tas Yeesus tas sëlwiche wii mëyer iwer te toot xpiirt, treest uns. Un Yeesus is kraat soo wii sayn Fater. (João 14:9) Yeehoowa hot ti macht fer te toot fer imer se fernichte, un in khorts tsayt tuut ëyer tas mache.

7, 8. Warom wolt Marta nët hon tas te xteen fon Lasaro sayn kraap wëch kehoolt këpe solt? Un was hot Yeesus tan kemacht?

⁷ Wii Yeesus aans kraap khom is, woo Lasaro sayn khërper kelee hot, waar tas plats  mit een kroose xteen tsu. Yeesus hot kesaat: “Hoolt te xteen wëch.” Awer Marta wolt tas nët hon. Lasaro sayn khërper waar xon “fier taache” im kraap. (João 11:39) Tii wust nët was Yeesus mache teet fer sayn pruuter hëlfe.

⁸ Yeesus hot kesaat: “Lasaro, khom raus!” Tan, hon Marta un Maria was wunerliches kesiin. “Te man woo toot waar, is raus khom”. (João 11:43, 44) Yeesus hot Lasaro tsurik ins leepe keprung! Tee waar wiiter paysamer mit sayn familye un froynte. Tii khonte Lasaro um aareme un mit tëm xprëche. Was een wuner!

9, 10. (a) Fon weem hot Yeesus macht kriit fer layt fom toot uf se ruufe? (b) Warom hon ti kexichte iwer tas uf xtaye fom toot fiil wëyert fer uns?

⁹ Hot Yeesus torich sayn aychne macht ti toote uf keruuft? Nee. Eep ëyer Lasaro fom toot uf keruuft hot, hot er tsu Yeehoowa kepeet un Yeehoowa hot tëm ti macht këp fer Lasaro fom toot uf se ruufe. (Lees João 11:41, 42) Lasaro waar nët te eensiche woo fom toot uf keruuft këp is. Ti Piipel xprëcht iwer Jayro sayn meetche, woo 12 yoer alt waar. Tii waar sayn eensiches khint un waar aarich krank. Jayro hot Yeesus aan kehal tii se heele, awer wii tee noch mit Yeesus am xprëche waar, sin ëtliche mëner khom un hon kesaat: “Tayn meetche is kextorep! Fer was te Leerer noch xteere?” Awer Yeesus hot fer Jayro kesaat: “Tuu khee pang hon, tuu noore klaape, un tii wërt kerët.” Tan, is Yeesus mit Jayro pis tëm sayn haus hin kang. Tat hot Yeesus ti layt prile kesiin un tëne kesaat:  “Lost noo se prile, wayl tii is nët kextorep. Tii is am xloofe.” Tas meetche sayn ëltere hon sich fiilaycht kefroot was er saan wolt. Yeesus hot al raus kexikt un tas meetche sayn ëltere ins tsimer kenom woo tii kelee hot. Yeesus hot tas meetche sayn hant kehoolt un kesaat: “Meetche, ich saan teer: Xtay uf!” Tënk mool wii froo ti ëltere fon tee këp sin wii tii uf kextii is un aan kefang hot se laafe! Yeesus hat tëne sayn meetche fom toot uf keruuft. (Marcos 5:22-24, 35-42; Lucas 8:49-56) Fon tëm taach aan, wën se sayn meetche siin teete, teete se sich erinere was Yeehoowa fer tii, torich Yeesus, kemacht hat. *

¹⁰ Yaa, tii woo Yeesus tsurik ins leepe keprung hot, sin xpeeter noch mool kextorep. Iwer tiise layt leese, hot fiil wëyert, wayl es uns sicher lost tas Yeehoowa wil un tuut ti layt fom toot uf ruufe.

11. Was tuut Eclesiastes 9:5 uns iwer Lasaro in lërne?

¹¹ Ti Piipel tuut taytlich in Eclesiastes 9:5 saan: “Ti toote sin sich kaar niks mee kewaar.” Kraat soo waar es mit Lasaro. In te tsayt woo ëyer im kraap waar, wust Lasaro “kaar niks”. Wii Yeesus kesaat hot, waar es wii wën Lasaro am xloofe wëyer. (João 11:11)

12. Wii wise mer tas Lasaro wërklich fom toot uf kextii is?

¹² Fiil layt hate  kesiin wii Yeesus Lasaro fom toot uf keruuft hot. Soo kaar Yeesus sayn faynte wuste tas er tas wuner kemacht hot. Lasaro waar am leepe un tas hot pewayst tas er wërklich fom toot uf kextii waar. (João 11:47) Fiil layt sin aach Lasaro pesuuche kang, un tës weeche hon se aan kefang se klaape tas Yeesus fon Kot kexikt këp is. Yeesus sayn faynte hon tas nët kuut kefun, soo hon se kepleent Yeesus un Lasaro um se pringe. (João 11:53; 12:9-11)

13. Warom khëne mer uns sicher sin tas Yeehoowa ti toote tsurik ins leepe pringt?

¹³ Yeehoowa hot ales kemacht. Tës weeche, wise mer tas er ti toote tsurik ins leepe pringe khan. Yeesus hot aach kesaat tas “ale woo in te ketëchnis kreeper sin” wëre fom toot uf keruuft. (João 5:28) Fer tii tsurik ins leepe pringe, mus Yeehoowa sich nët ploos aan ale erinere, awer aach wii tii waare. Awer meecht tas meechlich sin? Yaa, tënk mool, es këpt pilioone xtërne im uniwërsum, un ti Piipel saat tas Yeehoowa te naame fon yeete eensiche xtërn wees. (Lees Isaías 40:26) Wën er sich aan te naame fon yeete xtërn erinere khan, tan khan er sich sicher laycht aan ales iwer tii woo ëyer tsurik ins leepe pringt, erinere.

14, 15. Was lërne mer fon Yoop sayn wërter iwer tas ufxtaye fom toot?

¹⁴ Te troy man Yoop hot aan tas ufxtaye fom toot keklaapt. Tee hot kefroot: “Wën een man xtërept, khan tee noch mool leepe?” Tan, hot ëyer fer Yeehoowa kesaat: “Tuu tuust mich ruufe, un ich tuun teer antworte. Tuu tuust ferlangre fon te aarwayt fon tayne hënt hon.” Yaa, Yoop wust tas Yeehoowa ploos waarte tuut pis ti tsayt khomt fer ti toote tsurik ins leepe pringe. (Jó 14:13-15)

 ¹⁵ Wii finst tuu tich iwich ti hofnung fom ufxtaye fom toot? Fiilaycht tuust tuu tich frooe: ‘Un mayn familye un froynte woo xon kextorep sin, meechte tii aach fom toot uf keruuft wëre?’ Es treest uns se wise tas Yeehoowa wërklich ti toote tsurik ins leepe pringe wil. Yets, wole mer xtutiire was ti Piipel saat iwer weer fom toot uf keruuft wërt un woo se tan leepe tuun.

16. Was fer een leepe kriin tii woo fom toot uf keruuft wëre fer uf te ëyert se leepe?

¹⁶ Tii woo in te friirixe tsayte fom toot uf keruuft këp sin, hon sich mit sayn familye un froynte hiir uf te ëyert fersamelt. Tas tuut aach in te tsukhunft pasiire, awer es wërt fiil pëser sin. Weeche was? Wayl tii, woo uf keruuft wëre fer uf te ëyert se leepe, kriin ti xans fer eewich se leepe un nii mee se xtërpe. Un ti wëlt wërt kans anerst wii hayt, oone kriich, kriminaliteet un krankheet.

17. Weer wërt fom toot uf keruuft?

¹⁷ Weer wërt fom toot uf keruuft? Yeesus saat tas “ale woo in te ketëchnis kreeper sin, tuun tëm sayn xtim heere un tuun raus khome.” (João 5:28, 29) Un Apocalipse 20:13 saat uns: “Un tas meer hot ti toote, woo tat trin waare, raus këp un te toot un tas Kraap hon ti toote, woo tat trin waare, raus këp.” Yaa, pilioone layt tuun noch mool leepe. Te aphostel Phaul hot aach kesaat tas ‘kerëchte soo wii unkerëchte’ fom toot uf keruuft wëre. (Lees Atos 24:15) Was petayt tas?

18. Weer sin ‘ti kerëchte’ woo fom toot uf keruuft wëre?

¹⁸ Unich ‘ti kerëchte’ sin Yeehoowa sayn troye tiiner woo foer Yeesus uf te ëyert keleept hon. Mënxe wii Noee, Aapraham un Sara, Mooses, Ruuth un Estër wëre fom toot uf keruuft fer hiir uf te ëyert se leepe.  Tuu khanst mee iwer ëtliche fon tiise tiiner fon Kot in Hebreus kapitel 11 leese. Un Yeehoowa sayn tiiner woo in unser tsayt xtërpe? Tas sin aach “kerëchte”, tës weeche wëre se aach fom toot uf keruuft.

19. (a) Weer sin ‘ti unkerëchte’? (b) Was fer xans tuut Yeehoowa tëne këpe?

 ¹⁹ ‘Ti unkerëchte’ sin pilioone layt woo khee xans hate fer Yeehoowa se khëne. Opwool se toot sin, tuut Yeehoowa tii nët ferkëse. Tee tuut se fom toot uf ruufe un tëne ti keleechenheet këpe fer fon tëm se lërne un tee se tiine.

20. Wëyer wërt nët fom toot uf keruuft?

²⁰ Tuut tas petayte tas ale woo toot sin uf keruuft wëre? Nee. Yeesus hot kesaat tas ëtliche layt teete nët tsurik ins leepe keprung wëre. (Lucas 12:5) Tas sin ti layt woo xlëcht waare un nët aan nëme teete sich se ënere. Weer suucht raus op yemant fom toot uf keruuft wërt orer nët? Yeehoowa is te Richter woos lëtste wort hot, awer tee hot aach fer Yeesus ti autoriteet këp “fer te richter fon te leepëntiche un te toote se sin”. (Atos 10:42; kuk ti Noote 19)

21, 22. (a) Was petayt es uf keruuft se këpe fer im himel se leepe? (b) Weer waar te ëyerste woo fom toot uf keruuft këp is fer im himel se leepe?

²¹ Ti Piipel saat uns aach tas ëtliche in te himel khome un tat woone tuun. Wën yemant fom toot uf keruuft këpt fer im himel se leepe, wërt ëyer nëme wii een mënx mit een mënxliche khërper, awer wii een kaystlich persoon tsurik ins leepe keprung.

²² Yeesus waar te ëyerste woo fom toot uf keruuft këp is fer im himel se leepe. (João 3:13) Tray taache noo tëm Yeesus um keprung këp is, hot Yeehoowa tee uf keruuft. (Salmo 16:10; Atos 13:34, 35) Yeesus is nët mit een mënxliche khërper uf keruuft këpt. Te aphostel Pheeter leet aus tas Yeesus ‘im flayx um keprung këp is, awer im kayst wiiter leepëntich kemacht këp is’.  (1 Pedro 3:18) Yeesus is wii een mëchtiche kaystlich persoon wiiter ins leepe keprung këp! (1 Coríntios 15:3-6) Awer ti Piipel saat tas ëyer nët tee eensiche wëyer.

23, 24. Wii fiil keheere tsu te “kleen trop” woo wërt uf keruuft fer im himel se leepe?

²³ Eep Yeesus kextorep is, hot er fer sayn tisipele kesaat: “Ich keen hiin fer een plats fer aych foer perayte.” (João 14:2) Tas petayt tas ëtliche fon sayn tisipele fom toot uf xtaye teete fer mit tëm im himel se leepe. Wii fiil? Yeesus hot kesaat tas es weeniche wëre, een “kleen trop”. (Lucas 12:32) Te aphostel Yohanes hot Yeesus “uf tëm [himlixe] Përich Sioon xteen kesiin, un mit tëm waare 144.000”. (Apocalipse 14:1) Soo wise mer ti kenau numer fon tëne.

²⁴ Wan wëre ti 144.000 kriste fom toot uf keruuft? Ti Piipel saat uns tas tas pasiire teet noo tëm Yeesus aan fangt im himel se rechiire. (1 Coríntios 15:23) Mëyer tuun yets in tiise tsayt leepe, un ti mëyeste fon te 144.000 sin xon uf keruuft këp fer im himel se rechiire. Tii woo noch uf te ëyert sin un in unsere taache xtërpe tuun, wëre klaych fom toot uf keruuft fer im himel se leepe. Awer ti mëyeste layt wëre in tsukhunft uf keruuft fer im Paratiis hiir uf te ëyert se leepe.

25. Was tuun mer im neekste kapitel lërne?

²⁵ In khorts tsayt tuut Yeehoowa ale mënxe woo im toot inkexpërt sin, fray mache. Te toot tuut tan nii mee eksistiire! (Lees Isaías 25:8) Awer was tuun tii woo tsum himel keen tat mache? Ti Piipel leet aus tas se mit Yeesus in Kot sayn Raych rechiire tuun. Im neekste kapitel tuun mer mee iwer tiise rechiirung lërne.