KAPITEL TRAY
Was hot Kot fer ti mënxe foer?
1. Was is Kot sayn wile fer ti mënxe?
WAS Kot fer ti mënxe wil is wuner xeen. Ëyer hot te ëyerste man un fraa, Aatam un Ewa, kemacht fer in een xeen plats se leepe. Kot sayn wile waar tas tii khiner hëte, tas tii fon te kans ëyert een paratiis mache un tas se tas fii uf phase solte. (Gênesis 1:28; 2:8, 9, 15; kuk ti Noote 6)
2. (a) Wii wise mer tas Kot mache tuut was er sich foer kenom hot? (b) Was saat ti Piipel iwer fer imer se leepe?
2 Mënst tuu tas mer een taach in een paratiis leepe khëne? Yeehoowa saat: “Ich hon es meer foer kenom un ich tuun es erfiile.” (Isaías 46:9-11; 55:11) Yaa, tee macht was ëyer sich foer kenom hot un niks tuut tee um hale fer se mache was er wil. Yeehoowa hot kesaat tas er ti ëyert “nët umsonst kemacht hot”. Ëyer hot tii fer een propoos kemacht. (Isaías 45:18) Ëyer wil tas mënxe uf te ëyert woone. Awer was fer mënxe, un fer wii lang? Ti Piipel saat: “Ti kerëchte [orer, tii woo Kot aan heere], tuun ti ëyert kriin, un tuun fer imer too truf woone.” (Salmo 37:29; Apocalipse 21:3, 4)
3. Was fer frooche khan ploos ti Piipel antworte?
3 Awer hayt wëre ti mënxe krank un xtërpe. In fiil plëtse, tuun ti layt tsënke un eene te aner um pringe. Kewis tas is nët was Kot wolt. Was is also pasiirt un was waar tas motiiw? Ploos ti Piipel khan tas aus lëye.
EEN FAYNT FON KOT
4, 5. (a) Wëyer hot mit Ewa, torich een xlang, im Eetem kaate kexproch? (b) Wii khan yemant, woo eerlich is, een xpits puup wëre?
4 Ti Piipel saat tas Kot een faynt hot “woo Taywel un Satanaas kenënt is”. Satanaas hot een xlang penutst fer mit Ewa im Eetem kaate se xprëche. (Apocalipse 12:9; Gênesis 3:1) Tee hot tas soo kemacht tas es aus kesiin hot tas ti xlang kexproch hot. (Kuk ti Noote 7)
5 Wil tas saan tas Kot te Taywel kemacht hot? Nee! Wii Kot ti ëyert fer Aatam un Ewa kemacht hot, waar tee een ëngel im himel. Tan, hot er sich ferënert un is te Taywel këp. (Jó 38:4, 7) Wii waar tas meechlich? Tënk mool: is es meechlich tas yemant, woo eerlich is, een xpits puup wërt? Tee is nët wii een xpits puup uf ti wëlt khom. Awer tee wil, orer winxt, etwas woo tëm nët keheert. Tee tënkt ti kans tsayt too traan un sayne ferkheerte wunx këpt xtërker. Tan, wën tee een xans kriit, tuut er es xteele. Tee is aleen een xpits puup këp. (Lees Tiago 1:13-15; kuk ti Noote 8)
6. Wii is een ëngel Kot sayn faynt këp?
6 Kenau tas is mim ëngel pasiirt. Noo tëm Yeehoowa Aatam un Ewa kemacht hot, hot er kesaat se solte khiner hon un ti ëyert fol mache. (Gênesis 1:27, 28) Te ëngel hot fiilaycht ketënkt: ‘Ale mënxe khënte mich xtats Yeehoowa aan peete!’ Woo mee ëyer iwer tas ketënkt hot, soo mee hot er tas kewinxt was Yeehoowa keheert. Tës weeche, hot er Ewa aan keloo un hot se hiner kang. (Lees Gênesis 3:1-5) Wii ëyer tas kemacht hot, is er Satanaas, te Taywel, een faynt fon Kot, këp.
7. (a) Warom sin Aatam un Ewa kextorep? (b) Warom wëre mer alt un xtërpe?
7 Aatam un Ewa hon Kot nët aan keheert un hon ti frucht kës. (Gênesis 2:17; 3:6) Tii hon keeche Yeehoowa kesint. Tës weeche, sin se kextorep, kraat soo wii Yeehoowa es kesaat hat. (Gênesis 3:17-19) Aatam un Ewa sayn khiner waare sinter, tës weeche sin se kextorep. (Lees Romanos 5:12) Fer se ferxteen warom ti khiner fon Aatam un Ewa aach sinter waare, tënke mer aan een payxpiil. Wën ma proot in een plëch pakt woo inketrikt is, khomt tas proot soo inketrikt raus wii tas plëch. Wii Aatam Kot nët aan keheert hot, is er een sinter këp. Wayl mer fon Aatam ap xtame, khan ma saan tas mer ti sëlwiche sint in uns “inketrikt” hon, wii tee. Un wayl mer sinter sin, wëre mer alt un xtërpe. (Romanos 3:23; kuk ti Noote 9)
8, 9. (a) Aan was wolt te Taywel hon tas Aatam un Ewa klaape solte? (b) Warom hot Yeehoowa nët klaych tii woo sich keeche tee kextëlt hon, fernicht?
8 Te Taywel hot een repelioon keeche Yeehoowa aan kefang wii ëyer Aatam un Ewa influëntsiirt hot Kot nët aan se heere. Tee wolt tas Aatam un Ewa klaape teete tas Yeehoowa een liichner wëyer, een xlëchte Hër woo nët tas pëste fer tii wolt. Te Taywel hot tëne inkereet tas ti mënxe nët prauchte tas Kot tëne saat was se mache sole. Ëyer hot tëne kesaat tas tii sëlepst raus suuche solte was richtich un was ferkheert is. Was hot Yeehoowa kemacht? Tee khënt ti xlëchte fernichte un ti repelioon tsum ën nëme. Awer teet tas pewayse tas Satanaas een liichner is? Nee.
9 Tës weeche hot Yeehoowa nët klaych tii woo sich keeche tee kextëlt hon, fernicht. Xtats tas, hot er ti mënxe tsayt këp fer sich sëlepst rechiire. Tas teet taytlich tsayche tas te Taywel een liichner is un tas Yeehoowa wees was pëser fer ti mënxe is. Im kapitel 11 tuun mer mee too triwer lërne. Awer was mënst tuu fon tëm was Aatam un Ewa kemacht hon? Waar es richtich aan te Taywel se klaape un Kot nët aan se heere? Yeehoowa hot tëne ales këp was se prauchte. Tii hate een xeen leepe, woon plats un aarwayt. Te Taywel hat tëne nii was kuutes kemacht. Wëns tuu tat wëyerst, was hëtst tuu kemacht?
10. Was mus yeete eene fon uns raus suuche?
10 Eenlich wii tii, mus hayt yeete eene fon uns raus suuche ween mëyer aan heere wole, un unser leepe hëngt too tefun ap. Mer khëne Yeehoowa, als unser Hër, aan heere un tsayche tas te Taywel een liichner is. Orer mer khëne te Taywel als kheenich raus suuche. (Salmo 73:28; lees Provérbios 27:11) Ti mëyeste layt tuun Kot nët aan heere. Un es is nët Kot woo tiise wëlt xikt. Weer tuut se tan xike?
WEER TUUT TI WËLT XIKE?
Wën ale rechiirunge fon te wëlt nët Satanaas keheere teete, khënt ëyer tii fer Yeesus aan piite?
11, 12. (a) Was khëne mer lërne fon tas was te Taywel fer Yeesus aan kepoot hot? (b) Was fer tëkste tsayche tas te Taywel ti wëlt xikt?
11 Yeesus wust weer tiise wëlt wërklich xikt. In een keleechenheet, hot te Taywel “tëm ale rayche fon te wëlt un tëne sayn hërlichkheet ketsaycht”. Too, hot te Taywel fer Yeesus ferxproch: “Tas ales wil ich teer këpe wëns tuu tich niter xmayst [orer, piikst] un mich een mool aan peete tuust.” (Mateus 4:8, 9; Lucas 4:5, 6) Was mënst tuu: ‘Khont te Taywel tiise rayche aan piite wën se nët sayne wëre?’ Nee. Ale rayche keheere tëm Taywel.
12 Im xtant froost tuu tich: ‘Wii khan te Taywel te hër fon tiise wëlt sin? Is nët Yeehoowa te Ale Mëchtiche Kot, woo tas uniwërsum kemacht hot?’ (Apocalipse 4:11) Yaa, is ëyer. Awer Yeesus hot te Taywel “kheenich fon tiise wëlt” kenënt. (João 12:31; 14:30; 16:11) Te aphostel Phaul hot Satanaas, te Taywel, “kot fon tiise wëlt” kenënt. (2 Coríntios 4:3, 4) Un te aphostel Yohanes hot kexrip tas “ti kans wëlt layt in te macht fon tëm woo xlëcht is”. (1 João 5:19)
WII WËRT TËM TAYWEL SAYN WËLT FERNICHT?
13. Warom mise mer een naye wëlt hon?
13 Tiise wëlt wërt yeete taach kefeerlicher. Iweraal siin mer kriiche, koruptsioon, falxheet un wiolënts. Ti mënxe khëne fon tiise propleeme nët loos këpe, een tuun wii aarich tii sich aan xtrënge. Awer, in khorts tsayt, tuut Kot tiise xlëcht wëlt im kriich fon Armaxeton fernichte un tii mit een rëchte naye wëlt ersëtse. (Apocalipse 16:14-16; kuk ti Noote 10)
14. Ween hot Kot raus kesuucht fer Kheenich fon sayn rechiirung se sin? Was hot ti Piipel iwer Yeesus foer hëyer kesaat?
14 Yeehoowa hot Yeesus Kristus raus kesuucht fer Kheenich fon sayn himlixe Raych se sin. Foer tausente yoere hot ti Piipel ferxproch tas Yeesus wii “Prints fom Friite” rechiire teet un tas sayn raych nii een ën kriit. (Isaías 9:6, 7) Yeesus hot tii woo tëm noo keen, inkelërnt tiise rechiirung se ferlange. Ëyer hot kesaat: “Tayn Raych sol khome. Tayn wile sol kemacht këpe, wii im himel, soo aach uf te ëyert.” (Mateus 6:10) Im kapitel 8 lërne mer wii Kot sayn Raych ti rechiirunge fernicht un uf tëne sayn plats playpt. (Lees Daniel 2:44) Tan, tuut Kot sayn Raych fon te ëyert een paratiis mache. (Kuk ti Noote 11)
EEN NAY WËLT IS TICHT!
15. Was is ti “nay ëyert”?
15 Ti Piipel ferxprëcht: “Toch këpts naye himele un een nay ëyert woo mëyer waarte”, un “in tëne tuut ti kerëchtichkheet woone”. (2 Pedro 3:13; Isaías 65:17) Manich mool wën ti Piipel tas wort “ëyert” penutst, tuut se iwer ti mënxe uf te ëyert xprëche. (Gênesis 11:1) Wën ti Piipel iwer ti kerëcht “nay ëyert” xprëcht, mënt se ale mënxe woo Kot aan heere un fon tëm keseechent wëre.
16. (a) Was fer een xeenes kexënk tuut Kot fer tii woo in te nay wëlt leepe, këpe? (b) Was mise mëyer mache fer tas kexënk se kriin?
16 Yeesus hot ferxproch tas tii woo in Kot sayn nay wëlt leepe tuun, “eewiches leepe” kriin. (Marcos 10:30) Was mise mer mache fer tas kexënk se kriin? Fer tas se wise, lees João 3:16 un 17:3. Yets wole mer siin wii ti Piipel tas leepe im paratiis uf te ëyert pexraypt.
17, 18. Was saat ti Piipel iwer friite un sicherheet im paratiis?
17 Xlëchtichkheet, kriich, kriminaliteet un wiolënts këpst tan nëme. Es këpt tan khee eensich xlëcht persoon uf te ëyert. (Salmo 37:10, 11) Kot tuut ti “kriiche in te kans ëyert tsum ën pringe.” (Salmo 46:9; Isaías 2:4) Ti ëyert wërt fol mit layt woo Kot liipe un tee aan heere. Tan këpt es friite fer imer. (Salmo 72:7)
18 Yeehoowa sayn folek tuut sich sicher fine. In piiplixe tsayte, wii ti israelite Kot aan keheert hon, hon se sich sicher kefun wayl Kot se uf kephast hot. (Levítico 25:18, 19) Im paratiis, tuun mer khee pang fon niks un nimant hon. Mer tuun uns tan imer sicher fine! (Lees Isaías 32:18; Miqueias 4:4)
19. Wii wise mer tas es fiil ësmitel fer al im paratiis këpe tuut?
19 Es wërt fiil ësmitel këpe. “Es tuut tan aarich fiil sereaal uf te ëyert këpe, un uf te përich xpitse wërt es iwer fiil këpe.” (Salmo 72:16) Yeehoowa, “unser Kot tuut uns tan seechne” un “ti ëyert këpt tan sayn ërnt”. (Salmo 67:6)
20. Wii wise mer tas ti ëyert een paratiis wërt?
20 Ti kans ëyert wërt een paratiis. Ti mënxe tuun tan xeene hayser un kaate hon. (Lees Isaías 65:21-24; Apocalipse 11:18) Ti kans ëyert wërt xeen sin soo wii te Eetem kaate waar. Yeehoowa tuut uns imer ales këpe was mer prauche. Ti Piipel saat iwer tëm: “Tuu machst tayn hant uf un erfiilst te wunx fon ales was leepëntich is.” (Salmo 145:16)
21. Wii wise mer tas es friite tswixich mënxe un tiere këpt?
21 Es këpt tan friite tswixich mënxe un tiere. Ti tiere tuun fer ti mënxe niks xlimes mee mache. Soo kaar kleene khiner tuun khee pang hon wën se ticht pay tiere sin, woo hayt kefeerlich sin. (Lees Isaías 11:6-9; 65:25)
22. Was tuut Yeesus fer ti kranke mache?
22 Nimant wërt mee krank. Wii Yeesus uf te ëyert waar, hot er fiil layt keheelt. (Mateus 9:35; Marcos 1:40-42; João 5:5-9) Un wii Kheenich fon Kot sayn Raych tuut Yeesus ale layt heele. Nimant tuut tan mee saan: “Ich sin krank.” (Isaías 33:24; 35:5, 6)
23. Was tuut Kot fer tii, woo kextorep sin, mache?
23 Ti toote tuun noch mool leepe. Kot ferxprëcht tas er milioone layt woo kextorep sin, tsurik ins leepe pringt. Es këpt een ‘ufxtaye fom toot fon te kerëchte soo wii fon te unkerëchte’. (Lees João 5:28, 29; Atos 24:15)
24. Was mënst tuu fon Kot sayn ferxprëche iwer tas Paratiis?
24 Mëyer al khëne raus suuche mee iwer Yeehoowa se lërne un tee se tiine. Orer, mer khëne aynfach mache was mer wole. Wën mer raus suuche Yeehoowa se tiine, khëne mer een aarich xeene tsukhunft hon. Een man hot khorts foer sayn toot fer Yeesus ferlangt tas er sich aan tëm erinere solt, un Yeesus hot fer tëm ferxproch: “Tuu wërst mit meer im Paratiis sin.” (Lucas 23:43) Wole mer mee iwer Yeesus Kristus lërne un wii ëyer tas xeene ferxprëche fon Kot erfiile tuut.
