1, 2. Weer waare ëtliche fon Yeehoowa sayn froynte?

WEEN teest tuu wii tayn froynt raus suuche? Yemant woos tuu kërn host un mit weem tuu tich kuut ferxteest. Yemant woo kuute kwaliteete hot, woos tuu xeen finst.

² Yeehoowa suucht ëtliche mënxe raus fer sayn froynte se sin. Tsum payxpiil, Aapraham waar een froynt fon Yeehoowa. (Isaías 41:8; Tiago 2:23) Yeehoowa hat Tawi aach kërn. (Atos 13:22) Un te profeet Taniël hat “fiil wëyert” fer Yeehoowa. (Daniel 9:23)

3. Warom waare Aapraham, Tawi un Taniël Yeehoowa sayn froynte?

³ Wii sin Aapraham, Tawi un Taniël Yeehoowa sayn froynte këp? Tii waare teemuutich un hon Kot aan keheert. Tas sin ti sort mënxe woo Yeehoowa wii froynte wil. Kot hot fer Aapraham kesaat: ‘Tuu host mayn xtim aan keheert’. (Gênesis 22:18) Yeehoowa hot fer ti israelite aus keleet wii se tëm sayn froynt sin khënte: “Heert mayn xtim aan, un ich wëre ayer Kot, un tëyer wërt mayn folek.” (Jeremias 7:23) Soo, wëns tuu Yeehoowa sayn froynt wëre wilst, must tuu tee aan heere.

4, 5. Wii tuut Yeehoowa sayn froynte hëlfe?

⁴ Ti Piipel saat tas Yeehoowa tëne, woo  kans aan Tee klaape, hëlfe wil. (2 Crônicas 16:9) In Salmo 32:8 tuut Yeehoowa fer sayn froynte ferxprëche: “Ich tuun teer ferxtëntnis këpe un tich in lërne im weech woos tuu keen solst. Ich tuun tich mit mayn aue fest uf tich kericht, aan reete.”

⁵ Warom prauche mer tiise hilef? Wayl es këpt een mëchtiche faynt woo nët hon wil tas yemant Kot sayn froynt wërt. Awer Yeehoowa hëleft tii woo tee mim kanse hërts tiine un troy sin. (Lees Salmo 55:22) Soo kaar wën se xwëyeres mit mache, khëne se tas sëlwiche fertraue hon wii te salmist, woo iwer Yeehoowa kexrip hot: “Ich wëre nii kewakelt, wayl ëyer imer uf mayn rëchte sayt is.”(Salmo 16:8; 63:8) Awer, wii fersuucht te Taywel uns tefun um se hale Kot sayn froynte se sin?

6. Was hot te Taywel iwer ti mënxe kesaat?

⁶ Im kapitel 11 hon mer kelërnt tas te Taywel Yeehoowa in frooch kextëlt hot. Tee hot kesaat tas Yeehoowa unkerëcht un een liichner is wayl Ëyer nët erlaupt hat tas Aatam un Ewa sëlepst raus suuche khonte was richtich un was ferkheert waar. In te Piipel, im puuch fon Jó, lërne mer tas te Taywel aach keeche ti mënxe, woo Kot sayn froynte sin wole, xprëche tuut. Te Taywel saat tas tii Kot ploos tiine wayl se was fon Tëm kriin khëne, nët wayl se Tee liipe. Te Taywel saat soo kaar tas er ale mënxe keeche Kot xtële khan. Wole mer yets siin was mer fon Yoop lërne khëne un wii Yeehoowa tee uf kephast hot.

7, 8. (a) Weer waar Yoop? (b) Was hot te Taywel iwer Yoop kesaat?

⁷ Weer waar Yoop? Tee waar een kuute man woo foer 3.600 yoere keleept hot. Yeehoowa hot kesaat tas in tëm sayn tsayt khee aner man wii Yoop uf te ëyert waar. Yoop hot Kot aarich respëktiirt un hat wuut iwer  tas xlëchte. (Jó 1:8) Yaa, Yoop waar wërklich Kot sayn froynt.

⁸ Te Taywel hot kesaat tas Yoop, Kot ploos tiine teet fer sayn aychne nutse. Tee hot fer Yeehoowa kesaat: “Host tuu nët een tsaum um tee, sayn haus un ales was ëyer hot, ketuun? Tuu host ales was ëyer kemacht hot, keseechent, un sayn kans fii tuut sich iwer ti kans ëyert aus prayte. Awer yets, xtrëk tayn hant aus un trëf ales was ëyer hot, un es is sicher tas ëyer tich in tayn aychne kesicht ferfluucht.” (Jó 1:10, 11)

9. Was hot Yeehoowa tëm Taywel erlaupt se mache?

⁹ Te Taywel hot kesaat tas Yoop Yeehoowa ploos tiine teet wayl ëyer was fon Kot kriin khënt. Te Taywel hot aach kesaat tas er mache khënt tas Yoop noo lose teet Yeehoowa se tiine. Yeehoowa wust tas es nët woer waar, awer hot tëm erlaupt Yoop se proope. Tas teet taytlich tsayche op Yoop wërklich Yeehoowa sayn froynt waar wayl tee Kot keliipt hot.

10. (a) Wii hot te Taywel Yoop atakiirt? (b) Was hot Yoop kemacht?

¹⁰ Tsu ëyerst hot te Taywel Yoop sayn kanse fii kextool orer fernicht. Tan hot er ti mëyeste tiiner fon Yoop um keprung. Yoop hot ales ferloer. Tsu lëtst, hot te Taywel ale khiner fon Yoop in een xtorëm um keprung. Awer Yoop is leaal tsu Kot keplip. “In tas ales hot Yoop khee sint kemacht orer Kot ti xult fer was ferkheertes këp.” (Jó 1:12-19, 22)

11. (a) Was hot te Taywel noch mit Yoop kemacht? (b) Was hot Yoop kemacht?

¹¹ Te Taywel hot nët uf këp. Tee hot fer Kot kesaat: ‘Tuu sayn knoche un flayx aan krayfe, un sicher tuut er tich in tayn kesicht ferfluuche’. Soo hot te Taywel Yoop mit een xlim krankheet ketrof. (Jó 2:5, 7) Awer Yoop is wayter  leaal tsu Kot keplip. Tee hot kesaat: “Pis ich xtërpe, tuun ich mayn intekriteet nii uf këpe!” (Jó 27:5)

12. Wii hot Yoop ketsaycht tas te Taywel een liichner is?

¹² Yoop wust nët was te Taywel iwer tee kesaat hat un warom tee soo fiil mit mache must. Tee hot ketënkt tas Yeehoowa ti propleeme iwer tee keprung hat. (Jó 6:4; 16:11-14) Un noch, is Yoop troy uf Yeehoowa sayn sayt keplip. Es is taytlich këp tas Yoop nët ploos aan sich ketënkt hot. Tee waar Kot sayn froynt wayl ëyer Tee keliipt hot. Ales was te Taywel kesaat hat waar keloo!

13. Was waar tas resultaat wayl Yoop leaal keplip is?

¹³ Yoop wust nët was im himel am pasiire waar, awer is wayter leaal tsu Kot keplip un hot pewayst tas te Taywel xlëcht un een liichner is. Yeehoowa hot Yoop peloont wayl er een leaal froynt waar. (Jó 42:12-17)

14, 15. Was hot te Taywel iwer ale mënxe kesaat?

¹⁴ Was mit Yoop pasiirt is khan tich was importantes in lërne. Hayt, saat te Taywel tas mer Yeehoowa ploos tiine wayl mer was fon Tëm kriin khëne. In Jó 2:4 hot te Taywel kesaat: “Een mënx tuut ales këpe fer sayn leepe se rëte.” Soo, saat te Taywel tas ale mënxe, nët ploos Yoop, ekoystix sin. Hunerte yoere noo Yoop sayn toot, hot te Taywel Kot wayter pelayticht un xlëcht fon sayn tiiner kexproch. Tsum payxpiil, in Provérbios 27:11 leese mer: “Say xlau, mayn soon, un tuu mayn hërts froo mache, tas ich fer tee, woo mich pelaytiche tuut, een antwort këpe khan.”

¹⁵ Fer se tsayche tas te Taywel een liichner is, must tuu raus suuche Kot aan se heere un sayn leaal froynt se sin. Aach wëns tuu fiiles in tayn leepe ënere must, fer Kot sayn froynt se wëre, es is tas pëste woos tuu raus suuche khënst!  Te Taywel saat tas tuu nët leaal tsu Kot playpst wëns tuu propleeme mit machst. Awer wii fersuucht ëyer uns fon Kot ap se lënke?

16. (a) Was fer aate tuut te Taywel penutse fer unser froyntxaft mit Yeehoowa se fersaue? (b) Was tënkst tuu? Was khan te Taywel mache fer tich fon Yeehoowa ap lënke?

¹⁶ Te Taywel penuts unerxiitliche aate fer unser froyntxaft mit Kot se fersaue. Ëyerstens, khan er uns atakiire “wii een leep woo krumt, un suucht yemant fer se frëse”. (1 Pedro 5:8) Tuu tich nët ferwunere wën tayn froynte, parente un anere nët wole tas tuu ti Piipel xtutiirst un machst was richtich is. * (João 15:19, 20) Tsweetens, tuut er sich ferxtële “wii een licht ëngel”. Tee macht tas ferkheerte tinge richtich aus siin fer uns se hiner keen. (2 Coríntios 11:14) Tritens, tuut te Taywel fersuuche uns traurich se lose mit te itee tas mer nët Kot sayn froynte sin khëne wayl mer fiil sinte mache. (Provérbios 24:10)

17. Warom tuun mer Yeehoowa aan heere?

¹⁷ Wën mer Yeehoowa aan heere, tuun mer tsayche tas te Taywel een liichner is. Was khan uns hëlfe Kot aan se heere? Ti Piipel saat: “Liip Yeehoowa, tayn Kot, mit tayn kans hërts, mit tayn kans seel un mit tayn kans kraft.” (Deuteronômio 6:5) Soo fiil mee woo mer Yeehoowa liipe, soo fiil mee wole mer tëm sayn  wile mache. Te aphostel Yohanes hot kexrip: “Tas petayt Kot se liipe: tas mëyer sayn kepoote aan heere; un sayn kepoote sin nët xwëyer.” (1 João 5:3)

18, 19. (a) Was fer tinge wil Kot nët hon tas mer mache? (b) Wii wise mer tas es meechlich is ti ënerunge se mache woo Yeehoowa uns ferlangt?

¹⁸ Was fer tinge wil Yeehoowa nët hon tas mer mache? Phaar fon tiise tinge sin in tëm khaste “ Has was Yeehoowa hast”. Im xtant tënkst tuu ëyerst tas ëtliche fon tiise tinge nët soo ferkheert sin. Awer wëns tuu ti Piipel wersikele leest un kuut triwer noo tënkst, tuust tuu siin wii kluuch es is Yeehoowa sayn kesëtse aan se heere. Fiilaycht mërkst tuu tas tuu ëtliche ënerunge in tayn leepe mache must. Opwool tas oft nët laycht is, wëns tuu ti ënerunge machst,  tuust tuu te friite un ti frooheet fine woo Yeehoowa sayn froynte hon. (Isaías 48:17, 18) Wii wise mer tas es meechlich is tiise ënerunge se mache?

¹⁹ Yeehoowa tuut nii was fon uns ferlange woo mer nët mache khëne. (Deuteronômio 30:11-14) Tee is unser froynt un khënt uns pëser wii mëyer sëlepst. Tee khënt unsere xtarëke un xwache phunkte. (Salmo 103:14) Te aphostel Phaul tuut uns aan muute: “Kot is troy, tee tuut nët lose tas tëyer mee fersuucht wërt wii tëyer aus hale khënt. Awer, wën ti fersuuchnung khomt, tuut ëyer aach een ausweech tsayche tas tëyer es aus hale khënt.” (1 Coríntios 10:13) Mëyer khëne uns sicher sin tas Yeehoowa uns imer kraft këpt fer se mache was richtich is. Tee tuut uns “ti kraft iwer tas normale” këpe, fer uns se hëlfe xwiirichkheete aus se hale. (2 Coríntios 4:7) Noo tëm  te aphostel Phaul Yeehoowa sayn hilef kriit hot, khont er saan: “Fer ales sin ich xtarëk torich tee woo meer kraft këpt.” (Filipenses 4:13)

20. Was fer kwaliteete soltest tuu noo mache, un warom?

²⁰ Wën mer Kot sayn froynte sin wole, mise mer noo lose se mache was ferkheert is. Mëyer mise noch was aneres mache. (Romanos 12:9) Kot sayn froynte liipe was ëyer liipt un mache tëm sayn kwaliteete noo. Kot sayn froynte tsayche ‘liipe, frooheet, friite, ketult, kuutheet, froyntlichkheet, klaape, tsaamheet, un sëlepst kontrol’. (Gálatas 5:22, 23) Fer se wise wii Kot sayn froynte sin, lees te Salmo 15:1-5.

21. Was khan tich hëlfe Kot sayn kwaliteete noo se mache?

²¹ Wii khanst tuu lërne tiise xeene kwaliteete se tsayche? Tuu must yeete taach ti Piipel leese un xtutiire fer se lërne was Yeehoowa liipt. (Isaías 30:20, 21) Wëns tuu tas machst wërt tayn liipe tsu Yeehoowa xtërker, un tëm noo wii tayn liipe tsu tëm xtërker wërt, wilst tuu tee aan heere.

22. Was tuut pasiire wëns tuu Yeehoowa aan heere tuust?

²² Tiise ënerunge im leepe se mache is soo wii wën mer alt tsaych aus tsiie un nayes aan tuun. Ti Piipel saat tas tuu “ti alt personaliteet” aus tuun must un tich mit te “nay personaliteet” aan tsiie. (Colossenses 3:9, 10) Opwool es nët laycht is ti ënerunge se mache un Kot aan heere, tuut er uns ferxprëche tas ëyer uns een “kroos peloonung” këpt. (Salmo 19:11) Yaa, suuch raus Yeehoowa aan se heere un tsaych tas te Taywel een liichner is. Tiin Yeehoowa nët weeche tëm was tuu in tsukhunft kriin khanst, awer wayl tuu tee liipst. Soo khanst tuu een woere froynt fon Kot wëre!