1. Was tuun ëtliche sich frooe noo tëm se tas puuch xtutiire?

IN TIISE puuch host tuu fiile woerheete fon te Piipel kelërnt, wii tsum payxpiil, Kot sayn ferxprëche fom eewich leepe, was mit te toote pasiirt un ti hofnung fom uf xtaye fom toot. (Eclesiastes 9:5; Lucas 23:43; João 5:28, 29; Apocalipse 21:3, 4) Fiilaycht host tuu aan kefang in ti fersamlunge fon Yeehoowa sayn Tsayer se khome un host kemërekt tas tii mache was Kot wil. (João 13:35) Im xtant tuust tuu tich tichter pay Kot fine un host pexlos tas tuu tee tiine  wilst. Fiilaycht froost tuu tich: ‘Was mus ich noch mache fer Kot se tiine?’

2. Warom hot een man fer Felipe kefroot op er sich taafe lose khënt?

² Ti Piipel xprëcht fon een man woo tas wise wolt. Es waar een tsayt noo tëm Yeesus fom toot uf kextii is. Felipe, een tisipel fon Yeesus, hot fer te man kepreeticht un aus keleet tas Yeesus te Mesias waar. Te man is soo froo këp, wii er tas kelërnt hot, tas er klaych kesaat hot: “Kuk! Too is waser! Was hinert mich ketaaft se këpe?” (Atos 8:26-36)

3. (a) Was hot Yeesus kesaat tas sayn tisipele mache sole? (b) Wii wërt ti kristlich taaf kemacht?

³ Ti Piipel tuut taytlich in lërne tas wëns tuu Yeehoowa tiine wilst, must tuu tich taafe lose. Yeesus hot fer sayn tisipele kesaat: ‘Macht tisipele fon mënxe fon ale natsioone un taaft se’. (Mateus 28:19) Yeesus hot aach tas payxpiil këp un hot sich taafe kelos. Tee is kans in waser uner ketaucht këp, un hot nët ploos waser uf sayn khop kexpritst kriit. (Mateus 3:16) Hayt wën een krist sich taafe lost, mus ëyer aach kans im waser uner ketaucht këpe.

4. Was tuut tayn taaf fer ti anere tsayche?

⁴ Wëns tuu tich taafe lost, tsaycht tas fer ti anere tas tuu wërklich Kot sayn froynt pist un tee tiine wilst. (Salmo 40:7, 8) Im xtant tuust tich frooe: ‘Was mus ich mache fer mich taafe lose?’ Kuk yets seks xrite woo mëyer foer te taaf mache mise.

5. (a) Was must tuu ëyerst mache eeps tuu tich taafe lost? (b) Warom sin ti kristliche fersamlunge wichtich?

⁵ Te ëyerste xrit fer sich taafe lose, is Yeehoowa un Yeesus se khëne. In tëm Piipel xtuutium  host tuu aan kefang tas se mache. (Lees João 17:3) Awer tas is nët kenuuch. Ti Piipel saat tas tuu fol “mit te kenau khëntnis” fon Yeehoowa këpe must. (Colossenses 1:9) Ti fersamlunge fon Yeehoowa sayn Tsayer tuun tëyer hëlfe tiise khëntnis se kriin un een ënge froyntxaft mit Yeehoowa se hon. Tas is een wichtich uersach fer imer in tiise fersamlunge se khome. (Hebreus 10:24, 25)

6. Wii fiil must tuu fon te Piipel khëne fer tich taafe se lose?

⁶ Natiirlich tuut Yeehoowa nët waarte tas tuu ales fon te Piipel khënst eep tuu tich taafe lost. Te man, woo fon Felipe ti woerheet kelërnt hot, must nët ales wise fer sich taafe lose. (Atos 8:30, 31) Un mëyer tuun fer imer wayter iwer Kot lërne. (Eclesiastes 3:11) Awer, fer sich taafe lose must tuu weenichstens ti haupste inlërnunge fon te Piipel khëne un aan nëme. (Hebreus 5:12)

7. (a) Was is te tsweete xrit woos tuu foer te taaf mache must? (b) Tayn Piipel xtuutium hëleft tich aan was se klaape?

⁷ Ti Piipel saat: “Oone klaape is es awer unmeechlich Kot se kefale.” (Hebreus 11:6) Soo, is te tsweete xrit klaape se hon. In te Piipel xteet tas ëtliche layt in te friirix xtat Korint, Yeesus sayn tisipele aan keheert hon, un fiile “hon aan kefang se klaape un sin ketaaft këp”. (Atos 18:8) Kraat soo, tuut tayn Piipel xtuutium tich hëlfe aan Kot sayn Wort se klaape un aan Yeesus sayn opfer fer uns fon sint un toot fray se mache. (Josué 23:14; Atos 4:12; 2 Timóteo 3:16, 17)

8. Was hëleft tich mit anere iwer ti Piipel se xprëche?

⁸ Soo fiil mee woos tuu fon te Piipel lërnst un siist wii se tich in tayn leepe  hëleft, këpt tayn klaape xtërker. Tan tuust tuu winxe te trite xrit se mache: Xprëche fer anere iwer was tuu am lërne pist. (Jeremias 20:9; 2 Coríntios 4:13) Awer mit weem khënst tuu xprëche?

9, 10. (a) Mit weem khanst tuu aan fange se xprëche iwer was tuu kelërnt host? (b) Was must tuu mache wëns tuu mit te kemaynt preetiche wilst?

⁹ Tuu khanst mit tayn familye, froynte, nochpere orer koleke xprëche iwer tas was tuu am lërne pist. Es is kuut tas se mache, awer mach tas in een froyntlich un liipe aat. Wëns tuu mënst tas tuu fërtich pist fer mit te kemaynt se preetiche, khanst tuu tas fer tee, woo mit teer ti Piipel xtutiirt, saan. Wën tayn leerer mënt tas tuu fërtich pist, tan tuut tëyer mitsamer mit tswaay ëlteste fon te kemaynt xprëche. Fer mit te kemaynt preetiche khëne, thërfst tuu nët tinge mache woo tuu kelërnt host tas se ferkheert sin.

¹⁰ Iwer was tuun ti ëlteste mit aych xprëche? Tii tuun tich frooe ops tuu ti haupste inlërnunge fon te Piipel ferxteest un aan nëmst. Tii tuun tich aach frooe ops tuu soo leepst wii ti Piipel in lërnt un ops tuu wërklich Yeehoowa sayn Tsayer wëre wilst. Awer, tuu prauchst khee pang fon te ëlteste hon. Tii tuun ale in te kemaynt, too pay tuu, mit liipe uf phase. (Atos 20:28; 1 Pedro 5:2, 3) Noo tëm kexpreech, tuun ti ëlteste teer saan ops tuu mit te kemaynt preetiche khanst.

11. Warom is es soo wichtich ënerunge se mache eeps tuu mit te kemaynt preetiche khanst?

¹¹ Fiilaycht tuun ti ëlteste aus lëye tas tuu mee ënerunge mache must eeps tuu  mit te kemaynt preetiche khanst. Warom is es soo wichtich tiise ënerunge se mache? Wayl wën mer preetiche tuun mer Yeehoowa representiire. Tës weeche mus ti aat woo mer unser leepe nëme, respëkt tsu Yeehoowa tsayche. (1 Coríntios 6:9, 10; Gálatas 5:19-21)

12. Warom mise ale layt sich peroye?

¹² Es këpt noch een fierte xrit woos tuu mache must eeps tuu tich taafe lost. Te aphostel Pheeter hot kesaat: “Peroyt also un këpt een halpe wolte, tas ayer sinte fertsayt wëre.” (Atos 3:19) Was petayt sich peroye? Tas petayt aarich traurich mit sich këpe wayl ma was ferkheertes kemacht hon. Tsum payxpiil, wëns tuu seksuël imoraaliteet in tayn leepe praktisiirt host, tan must tuu tich peroye. Un soo kaar wëns tuu tich in tayn leepe aan kextrëngt host fer tas richtiche se mache, must tuu tich imer noch peroye, wayl mëyer al tuun sinte mache un mise fer Kot ferlange tas er uns fertsayt. (Romanos 3:23; 5:1)

13. Was petayt ‘een halpe wolte këpe’?

¹³ Is es kenuuch sich ploos se peroye fer was mer kemacht hon? Nee, mer mise te finfte xrit mache. Pheeter hot kesaat tas es aach neetich is ‘een halpe wolte se këpe’. Tas petayt tas tuu ales lose must, woos tuu foer hëyer ferkheert kemacht host un aan fange must se mache was richtich is. Tas khëne mer ferklayche wii wën mer tas ëyerste mool uf een plats hiin reese teete. Noo een tsayt, tuust tuu raus fine tas tuu in ti ferkheert richtung keest. Was teest tuu mache? Sicher teest tuu prëmse, xtiil hale un rom treye fer tan in ti richtich richtung se faare. In te sëlwiche aat, wëns tuu ti Piipel xtutiirst, tuust tuu fiilaycht raus fine tas tuu ëtliche kewoonheete ënere must. Say wilich fer ‘een halpe wolte se këpe’, tas petayt, aan fange se mache was richtich is.

14. Was petayt fer Kot ferxprëche tas tuu fer tee leepe wilst?

¹⁴ Te sekste xrit woos tuu mache must, eeps tuu tich taafe lost, is ferxprëche fer Yeehoowa se leepe. Tuu machst tas torich een kepeet un saast fer Kot tas tuu ploos tee aan peete tuust un tas tëm sayn wile tas haupste in tayn leepe wërt. (Deuteronômio 6:15)

15, 16. Was tuut yemant aan muute fer Kot se leepe?

¹⁵ Ferxprëche ploos fer Yeehoowa se leepe, is wii ferxprëche te rëst fon tayn leepe neewich yemant woos tuu liipst, se plaype. Xtël teer mool een phëyerche foer woo sich khëne lërnt. Wii te man ti fraa pëser khënt, fangt ëyer aan tii se liipe un winxt mit tee se hayrate. Opwool tas een ërnst ëntxlus is, is te man wilich tas se mache wayl ëyer tii liipt.

¹⁶ Wiis tuu mee iwer Yeehoowa lërnst, fangst tuu aan tee se liipe un winxt tayn pëstes fer tee se mache. Tiise liipe tuut tich aan muute fer een kepeet se mache woos tuu ferxprëchst tëm se tiine. Ti Piipel saat tas weer Yeesus noo keen wil, mus “sich sëlepst ap saan.” (Marcos 8:34) Was petayt tas? Tas petayt tas Yeehoowa sayn wile wichticher is wii tayn aychne winxe un tswëke. Soo, is tas haupste in tayn leepe Yeehoowa aan se heere. (Lees 1 Pedro 4:2)

17. Warom tuun ëtliche layt nët ferxprëche fer Yeehoowa se leepe?

¹⁷ Ëtliche layt tuun nët ferxprëche fer Yeehoowa se leepe un tëm se tiine. Tii hon pang tas se tas ferxprëche nët hale khëne. Se wole  Yeehoowa nët traurich lose, orer, fiilaycht mëne se, tas Yeehoowa niks fon tëne ferlange tuut was se nët ferxproch hon.

18. Wëns tuu pang host Yeehoowa traurich se lose, was khan tich hëlfe?

¹⁸ Wëns tuu pang host Yeehoowa traurich se lose, tuut tayn liipe tsu Tëm tich hëlfe ti pang se phake. Wayl tuu tee liipst, tuust tuu ales mache fer tayn ferxprëche se hale. (Eclesiastes 5:4; Colossenses 1:10) Tuu tuust es nët soo xwëyer fine Yeehoowa sayn wile se mache. Te aphostel Yohanes hot kexrip: “Tas petayt Kot se liipe: tas mëyer sayn kepoote aan heere; un sayn kepoote sin nët xwëyer.” (1 João 5:3)

19. Warom prauchst tuu khee pang hon se ferxprëche fer Yeehoowa se leepe?

¹⁹ Tuu prauchst nët perfëkt sin fer Yeehoowa se tiine. Tee tuut nii waarte tas mer mee mache wii mer khëne. (Salmo 103:14) Tee tuut tich hëlfe se mache was richtich is. (Isaías 41:10) Tuu aan Yeehoowa traue mit tayn kanse hërts un “tee tuut tayne trilye richt mache”. (Provérbios 3:5, 6)

20. Noo tëm tuu fer Kot ferxprëchst fer tee se leepe, was is te neekste xrit?

²⁰ Mënst tuu tas tuu fërtich pist fer tas ferxprëche se mache? Noo tëm tuu fer Yeehoowa ferxprëchst tas tuu fer tee leepe wilst, pist tuu fërtich fer te neekste xrit. Tuu khanst ketaaft këpe.

21, 22. Wii khanst tuu een “puuplix auslëyung” fon tayn klaape mache?

²¹ Tuu fer te kortenatoor fon te ëlteste fon tayn kemaynt saan tas tuu xon fer Yeehoowa ferxproch host tas tuu fer tee leepe wilst un tas tuu tich taafe lose wilst. Tan  tuun tee un anere ëlteste mit teer ti haupste piiplixe inlërnunge noo kuke. Wën se eenich sin tas tuu fërtich pist, tuun se fer tich saan tas tuu tich im neekste konkrës fon Yeehoowa sayn Tsayer taafe lose khanst. In tëm konkrës, këpts een reet woo aus leet was ti taaf petayt. Te reetner, woo ti reet halt, tuut tan fer tii woo sich taafe lose,  tswaay aynfache frooche mache. Wëns tuu tiise frooche antwortst, tuust tuu een “puuplix auslëyung” fon tayn klaape mache. (Romanos 10:10)

²² Tan tuust tuu tich taafe lose. Tuu wërst kans im waser ketaucht. Ti taaf tuut fer  ale tsayche tas tuu fer Yeehoowa leepst un tas tuu yets een fon Yeehoowa sayn Tsayer pist.

23. Was petayt es “im naame fom Fater un fom Soon un fom hayliche kayst” ketaaft se këpe?

²³ Yeesus hot kesaat tas sayn tisipele “im naame fom Fater un fom Soon un fom hayliche kayst” ketaaft këpe teete. (Lees Mateus 28:19) Was petayt tas? Im naame fom Fater petayt tas tuu klaapst tas Yeehoowa te Ale Mëchtiche Kot is. Im naame fom Soon petayt se ferxteen un respëktiire te wëyert woo Yeesus in Kot sayn plaan hot. Un in naame fom hayliche kayst petayt tas tuu ferxteest tas Kot sayn hayliche kayst penutst fer sayn wile se mache. (Salmo 83:18; Mateus 28:18; Gálatas 5:22, 23; 2 Pedro 1:21)

24, 25. (a) Was tuut ti taaf petayte? (b) Was tuun mer im lëtste kapitel lërne?

²⁴ Ti taaf petayt etwas ëkstra xeenes. Wëns tuu in tas waser ketaucht këpst, is es wii wën tuu tayn friirixe leepe, hiner kelos host. Wëns tuu fom waser raus khomst, is es wii wën tuu een nay leepe aan fange teest, fërtich fer Kot sayn wile se mache. Tas tsaycht tas tuu fon too aan Yeehoowa tiinst. Eriner tich tas tuu fer Yeehoowa leepst, nët fer een mënx, een orkanisatsioon orer een aarwayt.

²⁵ Tayn ferxprëche un tayn taaf hëlfe tich tayn froyntxaft mit Yeehoowa se xtërke. (Salmo 25:14) Awer, ti taaf petayt nët tas tuu kerët pist. Te aphostel Phaul hot ketsaycht tas ti kriste sich wayter aan xtrënge mise fer Yeehoowa froo se lose un soo ti rëtung kriin. (Filipenses 2:12) Ti taaf is ploos te aanfang. Awer wii khanst tuu tich ticht pay Yeehoowa hale? Tas lëtste kapitel fon tiise puuch tuut tas antworte.