1-3. Was tuun sich ti layt iwer te toot frooe, un was tuun ëtliche relichioone antworte?

TI PIIPEL ferxprëcht uns tas es een taach “kheen toot mee” këpt. (Apocalipse 21:4) Im kapitel 5 hon mer kelërnt tas mer torich tas fray khaaf opfer tas eewich leepe kriin khëne. Awer ti mënxe tuun imer noch xtërpe. (Eclesiastes 9:5) Tës weeche, tuun mer uns frooe: Was pasiirt mit uns wën mëyer xtërpe?

² Haupstsëchlich wën yemant woo mer liipe xtërept wole mer ti antwort wise. Fiilaycht tuun mer uns noch frooe: ‘Woo khomt ëyer hin? Khan tee uns siin? Khan tee uns hëlfe? Meechte mer tee een taach noch mool siin khëne?’

³ Relichioone tuun unerxiitliche antworte fer tiise frooche këpe. Ëtliche tuun in lërne tas, wëns tuu kuut pist keest tuu tsum himel un wëns tuu xlëcht pist prënst tuu in te fayer hël. Ëtliche saan tas wëns tuu xtërepst, wërst tuu een kayst un tuust mit tayn parente, woo xon kextorep sin, leepe. Un anere saan tas ti layt xtërpe un wiiter kepoer këpe orer noch mool in een anere khërper ins leepe khome, fiilaycht soo kaar wii een xtik fii.

4. Was tuun ti relichioone iwich te toot in lërne?

⁴ Wiis aus siit, tuun ti relichioone unerxiitliche tinge in lërne. Awer ti mëyeste tuun ti sëlwich itee in lërne. Tii lërne in, tas wën een mënx xtërpe tuut, playpt een teel fon tëm wayter am leepe. Is tas woer?

5, 6. Was pasiirt mit uns wën mer xtërpe?

⁵ Yeehoowa wees was mit uns im toot pasiirt, un saat uns tas wën een mënx xtërept, keet sayn leepe tsum ën. Te toot is tas keeche teel fom leepe. Tës weeche, wën yemant xtërept, tuun sayn ketanke nët wayter am leepe plaype un tee khan aach niks mee xpiire. * Wën mer xtërpe, khëne mer niks mee siin, heere un tënke.

⁶ Te Kheenich Salomon hot kexrip tas ‘ti toote niks wise tuun’. Tii khëne nët liipe orer wuut hon un “es këpt khee aarwayt, pleen, khëntnis un kluucheet im kraap”. (Lees Eclesiastes 9:5, 6, 10) In Salmo 146:4 xteet kexrip tas wën yemant xtërept, ‘tuun sayn ketanke ferkeen’.

7. Mit was hot Yeesus te toot ferklaycht?

⁷ Wii een liipe froynt fon Yeesus kextorep is, hot Yeesus fer sayn tisipele kesaat: “Lasaro, unser froynt, is in kexloof”. Awer Yeesus wolt nët saan tas Lasaro sich aus ruue teet. Yeesus hot aus keleet: “Lasaro is kextorep.” (João 11:11-14) Yeesus hot te toot mim xloof ferklaycht. Ëyer hot nët kesaat tas Lasaro im himel orer mit sayn ferxtorpene parente waar. Tee hot aach nët kesaat tas Lasaro in een fayer hël layte teet orer in een aner khërper wiiter kepoer këpe teet. Tas waar wii wën Lasaro fest xloofe teet. Anere Piipel tëkste tuun te toot mim xloofe ferklayche. Ti Piipel saat tas wii Steewan um keprung këp is, “is er im toot in kexloof”. (Atos 7:60) Te aphostel Phaul  hot aach kexrip tas ëtliche kriste “im toot in kexloof sin”. (1 Coríntios 15:6)

8. Wii wise mer tas Kot ti mënxe nët kemacht hot fer se xtërpe?

⁸ Hot Kot Aatam un Ewa soo kemacht tas se een taach xtërpe solte? Nee! Yeehoowa hot se kemacht fer kliiklich mit perfëkt kesuntheet fer imer se leepe. Wii Yeehoowa ti mënxe kemacht hot, hot er tëne te wunx këp fer eewich se leepe. (Eclesiastes 3:11) Ti ëltere wole nët siin wii sayn khiner alt wëre un xtërpe, un Yeehoowa wil tas aach nët. Awer wën Kot uns kemacht hot fer eewich se leepe, warom tuun mer xtërpe?

9. Warom wëyer es nët xwëyer keween fer Aatam un Ewa Yeehoowa aan se heere?

⁹ Im Eetem kaate, hat Yeehoowa taytlich fer Aatam kesaat: “Fon yeete paam im kaate khanst tuu ëse soo fiil wiis tuu wilst. Awer, was te paam fon te khëntnis fom kuute un fom xlëchte petrëft, fon tëm thërfst tuu nët ëse, wayl aan tëm taach, woos tuu tefun ëst, tuust tuu sicher xtërpe.” (Gênesis 2:9, 16, 17) Yeehoowa hat tas rëcht tëm Aatam un te Ewa se saan was kuut un was xlëcht is un es waar nët xwëyer fer aan se heere. Wën se Yeehoowa aan keheert hëte, hëte se tëm ketsaycht tas se sayn autoriteet respëktiire un petanklich waare fer ales was Kot tëne këp hat.

10, 11. (a) Wii hot te Taywel, Aatam un Ewa hiner kang? (b) Warom këpts khee entxultichung fer tas was Aatam un Ewa kemacht hon?

¹⁰ Wii xaat tas Aatam un Ewa raus kesuucht hon Yeehoowa nët aan se heere. Te Taywel hot fer Ewa kesaat: “Hot Kot wërklich kesaat tas tëyer nët fon ale oopst peem fom kaate ëse thërft?” Ewa hot keantwort: “Mëyer khëne fon te oopst peem woo im kaate sin, ëse. Awer, iwer ti frucht fom paam, woo in te mite fom kaate is, too hot Kot kesaat: ‘Tuut nët fon tëm ëse, nee, un tuut aach nët aan tëm traan krayfe, tas tëyer nët xtërpe tuut.’” (Gênesis 3:1-3)

¹¹ Too hot te Taywel kesaat: “Es is sicher tas tëyer nët xtërpe tuut. Wayl Kot wees tas, am sëlwiche taach woo tëyer fon tëm ëst, tuun ayre aue uf keen un tëyer wërt wii Kot, un tëyer tuut tan wise was kuut un was xlëcht is.” (Gênesis 3:4-6) Te Taywel wolt hon tas Ewa tënke teet tas tii fer sich sëlepst raus suuche khont was richtich un was ferkheert is. Tee hot keloo  iwer was pasiire teet wën se Kot nët aan heere teete. Te Taywel hot fer Ewa kesaat tas se nët xtërpe teet. Soo, hot Ewa fon te frucht kës un too tefun fer sayn man këp. Tii wuste tas Yeehoowa tëne kesaat hot tas se nët fon te frucht ëse solte. Awer tii hon toch raus kesuucht, nët aan se heere. Wii se fon te frucht kës hon, hon se ketsaycht tas se khee respëkt tsu sayn liipe himlixe Fater hate. Es hot khee entxultichung këp fer tas was se kemacht hon!

12. Warom is es soo traurich tas Aatam un Ewa Kot nët aan keheert hon?

¹² Wii traurich tas unser ëyerste ëltere nët respëkt tsu tëne sayn Kriatoer ketsaycht hon! Xtël teer foer tas tuu tich aarich aan xtrëngst fer tayn khiner kroos se tsiie, un tas se sich tan keeche tich xtële un mache tas keeche teel fon tëm woos tuu tii in kelërnt host. Wii teest tuu tich fine? Teest tuu nët traurich këpe?

13. Was wolt Yeehoowa mit te wërter saan ‘tsum xtaap keest tuu tsurik’?

¹³ Wayl Aatam un Ewa Kot nët aan keheert hon, hon se ti keleechenheet fer eewich se leepe, ferloer. Yeehoowa hat fer Aatam kesaat: ‘Tuu pist xtaap un tsum xtaap keest tuu tsurik’. (Lees Gênesis 3:19) Tas hot petayt tas Aatam tsurik tsum xtaap keen teet, wii wën Kot tee nii kemacht hët. (Gênesis 2:7) Noo tëm Aatam kesint hot, is er kextorep un hot nët mee eksistiirt.

14. Warom tuun mer xtërpe?

 ¹⁴ Wën Aatam un Ewa Kot aan keheert hëte, teete se hayt noch leepe. Awer wayl se Kot nët aan keheert hon, hon se kesint un sin xpeeter kextorep. Ti sint is wii een xlim krankheet woo mer fon unser ëyerste ëltere keërpt hon. Tës weeche tuun mer xtërpe. (Romanos 5:12) Awer Kot wolt nii hon tas ti mënxe xtërpe solte. Ti Piipel saat tas te toot een “faynt” is. (1 Coríntios 15:26)

15. Warom is es kuut ti woerheet iwer te toot se wise?

¹⁵ Fiil relichioone tuun in lërne tas ti toote uf een aner plats am leepe sin un tas mer tii hëlfe khëne. Manich mool tuut een parent een farer orer phaater petsaale tas tee fer te toote peete tuut. Awer ti Piipel saat tas mer nët mit te toote xprëche khëne un tas mer tii nët hëlfe khëne. Tii xpiire khee phayn orer traurichkheet. Tii khëne nët mit uns xprëche orer uns xaate mache. Tës weeche prauche mer khee pang fon tëne hon. Es is aarich kuut ti woerheet iwer ti toote se wise. Soo këpe mer nët torich liie hiner kang un plaype fray fon ferkheerte itee.

16. Was fer liie tuun ëtliche relichioone iwer te toot in lërne

¹⁶ Te Taywel tuut ti falx relichioon penutse fer uns se hiner keen un uns tënke mache tas ti toote noch leepe tuun. Tsum payxpiil, ëtliche relichioone tuun in lërne tas wën mer xtërpe, etwas fon uns uf een anere plats leepëntich playpt. Tuut tayn relichioon teer tas in lërne orer lërnt se was ti Piipel iwer te toot saat? Te Taywel tuut liie penutse fer ti mënxe fon Yeehoowa ap se lënke.

17. Warom tuut ti itee fon mënxe in te fayer hël prëne, Yeehoowa pelaytiche?

 ¹⁷ Was fiil relichioone in lërne këpt aarich pang. Ëtliche tuun tsum payxpiil in lërne tas ti xlëchte fer imer in te hël ferprëne tuun. Tiise lii tuut Yeehoowa pelaytiche. Ëyer teet nii lose tas ti mënxe soo layte teete! (Lees 1 João 4:8) Was teest tuu fon yemant tënke woo ti hant fon een khint im fayer ferprënt, fer tas khint se xtroofe? Tuu teest tënke tas tee aarich xlëcht is un teest tee kaar nët khëne wole. Un tas is kenau was te Taywel wil tas mer fon Yeehoowa tënke!

18. Warom prauche mer khee pang fon te toote hon?

¹⁸ Ëtliche relichioone saan tas ti mënxe kayster wëre wën se xtërpe. Anere tuun in lërne tas mer respëkt un pang fon tiise kayste hon mise, wayl se mëchtiche froynte orer xrooe faynte këpe khëne. Fiil layt tuun aan tiise liie klaape. Tii hon pang fon te toote, soo tuun se tii aan peete, xtats Yeehoowa. Ferkës nët tas ti toote niks xpiire orer mërke khëne, soo prauche mer khee pang fon tëne se hon. Yeehoowa hot uns kemacht. Ëyer is te woere Kot un mer sole ploos tee aan peete. (Apocalipse 4:11)

19. Wii khan es uns hëlfe ti woerheet iwer te toot se wise?

¹⁹ Wën mer ti woerheet iwer te toot wise, wëre mer fray fon relichieese liie. Un tiise woerheet tuut uns hëlfe Yeehoowa sayn ferxprëche iwer unser leepe un tsukhunft se ferxteen.

20. Was tuun mer im neekste kapitel lërne?

²⁰ Een lang tsayt tsurik, hot een tiiner fon Kot, woo Yoop keheest hot, kefroot: “Wën een man xtërept, khan tee noch mool leepe?” (Jó 14:14) Is es wërklich meechlich tas een mënx woo toot is noch mool leepe tuut? Ti antwort woo Kot uns in te Piipel këpt, is wuner xeen. Tas tuun mer im neekste kapitel lërne.