KAPITEL EENS
Weer is Kot?
1, 2. Was tuun sich ti mënxe oft mools frooe?
KHINER tuun fiile frooche mache. Wën mëyer fersuuche tëne was aus se lëye, tuun mer neekst imer heere: ‘Fer was?’ Un wën mëyer noch een antwort këpe, tuun tii fiilaycht noch mool frooe: ‘Awer, fer was?’
2 Es is een tuun op mer yung orer alt sin, mëyer al tuun frooche mache. Im xtant frooe mer uns was mer ëse, aan tsiie orer khaafe wole. Orer, mer khëne importante frooche hon, iwer unser leepe orer ti tsukhunft. Toch, wën mëyer khee kexayte antworte fine, khan es sin tas mëyer noo lose ti antworte se suuche.
3. Was mëne ëtliche layt iwer ti antworte in te Piipel se suuche?
3 Hot ti Piipel ti antworte fer ti importante frooche woo mëyer hon? Ëtliche layt tënke yaa, awer tii mëne tas ti Piipel xwëyer is se ferxteen. Fiilaycht mëne se tas ploos phaater, farer un relichieese leerer ti antworte hon. Anere xeeme sich se saan tas se nët ti antworte wise. Un tuu? Was mënst tuu?
4, 5. Was fer importante frooche host tuu? Fer was wëyer es kuut wayter ti antworte se suuche?
4 Fiilaycht host tuu xon iwer tiise frooche ketënkt: Warom sin mëyer too? Was pasiirt mit uns wën mer xtërpe? Wii is Kot? Yeesus, te kroose Leerer, hot kesaat: “Tuut wayter ferlange un es wërt fer aych këp; tuut wayter suuche, un tëyer tuut es fine; tuut wayter klope, un es wërt fer aych uf kemacht.” (Mateus 7:7) Also, këp nët uf pis tuu ti richtiche antworte finst.
5 Tuu khanst sicher sin tas wëns ‘tuu wayter suuchst’, tuust tuu ti antworte in te Piipel fine. (Provérbios 2:1-5) Tiise antworte sin nët soo xwëyer fer se ferxteen. Tii tuun tich hayt xon hëlfe frooer se sin un këpe een wuner xeen hofnung fer ti tsukhunft. Yets xprëche mer iwer een frooch woo xon fiil layt konfus kelos hot.
MEECHT KOT SICH MIT UNS KHIMERE?
6. Warom tuun ëtliche layt mëne tas Kot sich nët mit tëne sayn traurichkheet khimert?
6 Fiile layt mëne tas Kot sich nët mit uns khimert. Tii mëne tas wën Kot sich wërklich khimere teet, wëyer ti wëlt kans anerste. Iweraal siin mer kriiche, wuut un aarmheet. Mënxe këpe krank, hon phayn un xtërpe. Fiil frooe sich: ‘Wën Kot sich wërklich mit uns khimert, warom pringt ëyer ti traurichkheet nët tsum ën?’
7. (a) Was saan ti relichieese xëfe, woo macht tas ti layt tënke tas Kot xlëcht is? (b) Wii wise mer tas Kot nët ti xult fer ti xlëchte tinge hot?
7 Wën was xlëchtes pasiirt, tuun fiile phaater, farer un anere relichieese xëfe saan: “Kot wil es soo hon.” Tës weeche mëne ti layt tas Kot too tefoer ti xult hot un xlëcht is. Awer tas xlëchte khomt nii fon Kot. Wii wise mer tas? Ti Piipel saat in Tiago 1:13 tas Kot nimant mit xlëchte tinge proopt. Te tëkst saat: “Nimant sol saan wën ëyer keproopt këpt: ‘Ich këpe fon Kot keproopt.’ Wayl, Kot mit xlime tings nët keproopt këpe khan un Tee tuut aach sëlepst nimant proope.” Foerlaywich tuut Kot xlëchte tinge nët um hale. Awer es is nii tee woo ti xlëchte tinge macht. (Lees Jó 34:10-12) Wole mer uns een situatsioon foer xtële fer tas pëser se ferxteen.
8, 9. Wii tsaycht ti kexicht fom puup, woo fon tehëm fat keet, tas es nët richtich is Kot ti xult fer unsere propleeme se këpe?
8 Xtël teer mool een puup foer woo mit sayn ëltere woont. Sayne fater tuut tee aarich liipe un hot tee in kelërnt kluuche ëntxluse se mache. Awer, tan wolt te puup nët mee sayn fater aan heere un is fon tehëm fat kang. Ëyer hot ferkheerte tinge kemacht un propleeme kriit. Tënkst tuu tas te fater ti xult fer ti propleeme hot, ploos wayl ëyer nët sayn soon fom fat keen um kehalt hot? Nee! (Lucas 15:11-13) Soo wii tiise fater, hot Kot ti mënxe nët um kehal wii se een xlëcht weech raus kesuucht hon. Wën tës weeche was xlimes pasiirt, is es nët Kot woo tas macht. Es wëyer nët richtich tëm ti xult se këpe.
9 Es këpt een kuut motiiw tas Kot noch nët ti xlëchte tinge, woo am pasiire sin, tsum ën keprung hot. Im kapitel 11, tuust tuu lërne was ti Piipel too triwer saat. Awer, tuu khanst teer sicher sin tas Kot uns liipt un tas ëyer nii fer unsere propleeme ti xult hot. In wërklichkheet, is Er te eensiche woo unsere propleeme wëch xafe khan. (Isaías 33:2)
10. Wii wise mer tas Kot te kanse xaate woo ti xlëchte layt mache, repariirt?
10 Kot is haylich. (Isaías 6:3) Ales was ëyer macht is rayn, sauwer un kuut. Soo khëne mer uf tëm traue. Ti mënxe sin nët soo. Manich mool tuun se ferkheerte tinge mache. Soo kaar te eerlichste kowernant hot nët ti macht fer te kanse xaate woo ti xlëchte mache, se repariire. Nimant hot tiise macht, ploos Kot. Tee khan un tuut te kanse xaate woo ti xlëchte layt mache, repariire. Tee tuut ti kans xlëchtichkheet fer imer tsum ën pringe. (Lees Salmo 37:9-11)
WAS MËNT KOT WËN MËNXE LAYTE?
11. Wii keet es Kot wën ëyer siit was tuu mit mache must?
11 Wii keet es Kot wën ëyer siit was in te wëlt pasiirt un was tuu mit mache must? Ti Piipel saat tas Kot ‘ti kerëchtichkheet liipt’. (Salmo 37:28) Soo, tuut ëyer sich aarich khimere mit was richtich un was ferkheert is. Tee hot es nët kërn wën yemant layte tuut. Ti Piipel saat tas ‘sayn hërts traurich këp is’, wii ëyer kesiin hot wii ti wëlt friier fol xlëchtichkheet waar. (Gênesis 6:5, 6) Un Kot hot sich nët keënert. (Malaquias 3:6) Ti Piipel saat tas Kot sich wërklich mit tich khimert. (Lees 1 Pedro 5:7)
Ti Piipel saat tas Yeehoowa te liipe Kriatoer fom uniwërsum is
12, 13. (a) Wii keet es uns wën mer tas eelent fon anere layt siin? Warom fine mer uns soo? (b) Fer was khëne mer uns sicher sin tas Kot tas kans eelent un ti unkerëchtichkheet tsum ën pringt?
12 Ti Piipel saat aach tas Kot uns noo tëm sayn pilt kemacht hot. (Gênesis 1:26) Tas petayt tas Kot uns mit te sëlwiche kuute kwaliteete, woo ëyer hot, kemacht hot. Soo, wëns tuu traurich këpst wiis tuu unxultiche mënxe layte siist, khanst tuu teer sicher sin tas Kot noch trauricher këpt.
13 Ti Piipel tuut uns in lërne tas “Kot liipe is”. (1 João 4:8) Ales was Kot macht, is fon liipe motiwiirt. Tës weeche, liipe mer wayl Kot liipt. Tënk mool noo: Wëns tuu ti macht hëst, teest tuu nët tas kans eelent un ti unkerëchtichkheet tsum ën pringe? Kewis, wayl tuu ti layt liipst! Un was tënkt Kot too triwer? Tee hot ti macht un wayl ëyer uns liipt, tuut ëyer tas kans eelent un ti unkerëchtichkheet tsum ën pringe. Tuu khanst teer sicher sin tas yeetes ferxprëche fon Kot, woo am aanfang fon tiise puuch ketsaycht këp sin, sich erfiile tuut! Awer fer aan tiise ferxprëche se klaape, must tuu Kot pëser khëne.
KOT WIL TAS TUU TEE KHËNST
Wëns tuu yemant sayn froynt wëre wilst, tuust tuu tëm tayn naame saan. In te Piipel, tuut Kot uns sayn naame saan
14. Wii is Kot sayn naame? Wii wise mer tas mer tee penutse solte?
14 Wëns tuu yemant sayn froynt sin wilst, was is tas ëyerste woos tuu tëm saast? Tayn naame. Meecht Kot een naame hon? Fiile relichioone saan tas tëm sayn naame Kot orer Hër is, awer tas sin khee naame. Tas sin ploos thitele, soo wii kheenich orer presitënt. In te Piipel, saat Kot tas sayn naame Yeehoowa is. Salmo 83:18 saat: “Tas ti layt wise tas tuu, woo Yeehoowa heest, ploos tuu pist te Ale Heechste iwer ti kans ëyert.” Piipel xrayper hon Kot sayn naame mee wii 7 tausent mool penutst. Yeehoowa wil hon tas tuu tëm sayn naame weest un penutst. Tee tuut sayn naame fer tich saan tas tuu tëm sayn froynt wëre khanst.
15. Was petayt te naame Yeehoowa?
15 Kot sayn naame, Yeehoowa, hot een kroose petaytung. Tee petayt tas Kot sayn kanse ferxprëche un ales was ëyer foer hot, erfiile khan. Niks tuut tee um hale. Ploos Yeehoowa khan tiise naame hon. *
16, 17. Was petayt: (a) “Ale Mëchtiche”? (b) “Kheenich fon te eewichkheet”? (c) “Kriatoer”?
16 Wii mer xon kelees hon, saat Salmo 83:18 iwer Yeehoowa: “Ploos tuu pist te Ale Heechste.” Apocalipse 15:3 saat noch: “Kroos un wunerlich sin tayn aarwayte, Yeehoowa Kot, te Ale Mëchtiche. Kerëcht un woer sin tayn weeche, Kheenich fon te eewichkheet.” Was petayt “Ale Mëchtiche”? Es petayt tas Yeehoowa mee macht hot wii yeete anere im uniwërsum. Un “Kheenich fon te eewichkheet” petayt tas Yeehoowa imer eksistiirt hot. Salmo 90:2 leet aus tas ëyer fon eewichkheet tsu eewichkheet Kot is. Tas is was wunerliches, kël!
17 Ploos Yeehoowa is te Kriatoer. Apocalipse 4:11 saat: “Tuu host ti tikniteet Yeehoowa, unser Kot, fer ti hërlichkheet, ti eere un ti macht se kriin, wayl tuu ale tinge kemacht host, un weeche tayn wile tuun se eksistiire un sin se kemacht këp.” Tënk mool noo: ti ëngele, ti xtërne, ti friichte fon te peem un ti fixe im meer, ales was tuu teer foer xtële khanst, hot Yeehoowa kemacht!
KHANST TUU YEEHOOWA SAYN FROYNT SIN?
18.(a) Warom tënke ëtliche layt tas es unmeechlich wëyer Kot sayn froynt se wëre? (b) Was saat ti Piipel too triwer?
18 Fiile hon pang wën se iwich ti wunerliche kwaliteete fon Yeehoowa leese. Tii tënke: ‘Kot is soo mëchtich un important! Tee is soo wayt wëch fon uns! Fer was teet er sich mit uns khimere?’ Awer Kot wil nët hon tas mer soo tënke. Yeehoowa wil ticht pay uns sin. Ti Piipel saat tas Kot “nët wayt fon yeete eene fon uns is”. (Atos 17:27) Kot wil hon tas tuu ticht pay tee khomst un ferxprëcht tas er ‘ticht tsu teer khomt’. (Tiago 4:8)
19. (a) Wii khanst tuu Yeehoowa sayn froynt wëre? (b) Was fer kwaliteete fon Yeehoowa tuun teer am pëste kefale?
19 Wii khanst tuu Kot sayn froynt wëre? Yeesus hot kesaat: “Tas petayt tas eewiche leepe: tas se tich khëne tuun, tee eensiche woere Kot, un tee woos tuu kexikt host, Yeesus Kristus.” (João 17:3) Fer Yeehoowa un Yeesus se khëne tuu wayter xtutiire, tan khanst tuu tas eewiche leepe kriin. Mëyer hon tsum payxpiil xon kelërnt tas ‘Kot liipe is’. (1 João 4:16) Awer tee hot noch fiil anere xeene kwaliteete. Ti Piipel saat tas Yeehoowa “parmhërtslich un mitlaytich is, ketultich un fol leaale liipe un woerheet”. (Êxodo 34:6; 2 Pedro 3:9) Yeehoowa is kuut un “imer fërtich fer se fertsaye”. (Salmo 86:5) Kot is leaal. (Apocalipse 15:4) Tuu tuust fiil mee iwer tëm sayne xeene kwaliteete lërne wëns tuu wayter iwer tëm in te Piipel leest.
20, 21. Wii khanst tuu tich tichter pay Kot hale wëns tuu tee nët siin khanst?
20 Wii khanst tuu tich tichter pay Kot hale, wëns tuu tee nët siin khanst? (João 1:18; 4:24; 1 Timóteo 1:17) Wëns tuu iwer Yeehoowa in te Piipel leest, fangst tuu aan tee wii een reaal Persoon se khëne. (Salmo 27:4; Romanos 1:20) Tëm noo wiis tuu Yeehoowa pëser khënst, tuust tuu tee mee liipe un tich tichter pay tëm fine.
Een fater tuut sayn khiner liipe, awer unser himlixe Fater liipt uns noch mee
21 Tuu tuust ferxteen tas Yeehoowa unser Fater is. (Mateus 6:9) Tee hot uns tas leepe këp un wil aach tas mer tas pëste leepe hon. Tas is was een liipe fater fer sayn khiner winxt! (Salmo 36:9) Ti Piipel lërnt tas tuu Yeehoowa sayn froynt sin khanst. (Tiago 2:23) Xtël teer mool foer: Yeehoowa, te Kriatoer fom uniwërsum, wil hon tas tuu tëm sayn froynt pist!
22. Was solst tuu mache wën anere nët hon wole tas tuu ti Piipel xtutiirst?
22 Khan sin tas ëtliche layt es nët kërn hon tas tuu ti Piipel xtutiirst un ferlange tas tuu noo lost. Fiilaycht hon se pang tas tuu tsu een aner relichioon keest. Awer los nimant tich um hale Yeehoowa sayn froynt se wëre. Tee is te pëste Froynt woos tuu hon khanst.
23, 24. (a) Warom is es kuut wayter frooche se mache? (b) Was tuun mer im neekste kapitel lërne?
23 Wëns tuu ti Piipel xtutiirst, khan es sin tas tuu nët ales am aanfang ferxteest. Tuu prauchst tich nët xeeme fer frooche se mache orer fer hilef se ferlange. Yeesus hot kesaat tas mer teemuutich wii khiner sin mise. (Mateus 18:2-4) Un khiner mache fiil frooche. Kot wil hon tas tuu ti antworte finst. Tës weeche, tuu ti Piipel mit acht xtutiire fer sicher se sin, tas tas woos tuu lërnst, ti woerheet is. (Lees Atos 17:11)
24 Ti pëst aat fer iwer Yeehoowa se lërne is ti Piipel se xtutiire. Im neekste kapitel, tuun mer raus fine wii ti Piipel anerst wii ale anere piicher is.
^ apsats 15 Wën te naame Yeehoowa nët in tayn Piipel trin xteet, orer wëns tuu mee iwer te petaytung wise wilst un wii te naame aus kexprooch wërt, kuk ti Noote 1.
Fiilaycht tuust tuu aach kërn hon
WICHTICHE PIIPLIXE INLËRNUNGE
Hot Kot een naame?
Kot hot fiil thitele soo wii Ale Mëchtiche, Kriatoer un Hër. Awer, Kot sayn aychne naame is mee wii 7.000 mool in ti Piipel kexrip.
WEER SIN MEYER
Warom is es wëyert ti Piipel se xtutiire?
Milioone layt in te kans wëlt hon, in te Piipel, ti antworte fer ti frooche fom leepe kefun. Teest tuu kërn eene fon tëne sin?
