1. Weer khan uns saan wii mer Kot richtich aan peete sole?

TI MËYESTE relichioone saan tas se ti woerheet iwer Kot in lërne. Awer ti relichioone tuun unerxiitliche tinge in lërne iwer weer Kot is un wii mer te aan peete sole. Tës weeche, khëne nët al richtich sin. Wii khëne mer wise wii mer Kot richtich aan peete sole? Ploos Yeehoowa khan uns ti antwort këpe.

2. Wii khanst tuu ti richtich aat lërne fer Kot aan se peete?

² Yeehoowa hot uns ti Piipel këp tas mer lërne khëne wii mer tee richtich aan peete sole. Ëyer khimert sich aarich mit teer. Tës weeche, xtutiir ti Piipel un Yeehoowa tuut tich hëlfe sayn inlërnunge kuut se penutse. (Isaías 48:17)

3. Was mise mer mache fer Kot richtich aan peete?

³ Ëtliche mënxe saan tas Kot ale relichioone aan nëmt. Awer tas is nët was Yeesus uns in kelërnt hot. Tee hot kesaat: “Nët al woo tsu meer saan: ‘Hër, Hër’, khome in tas Raych fon te himele, awer ploos weer mayn Fater sayn wile macht.” Tës weeche, mise mer iwer Kot sayn wile lërne un tas tan in unser leepe mache. Tas is was ërnstes, wayl Yeesus hot mënxe, woo Kot nët aan heere mit pantite ferklaycht, woo ‘mache was keeche tas kesëts is’. (Mateus 7:21-23)

4. Was hot Yeesus kesaat iwer Kot sayn wile mache?

⁴ Yeesus hot uns kesaat tas es nët imer laycht is Kot sayn  wile se mache. Tee hot kesaat: “Keet rin torich tas ënge toer, wayl prayt is tas toer un fiil plats is uf tëm weech woo tsu te fernichtung fiirt, un fiile tuun uf tëm too rin keen; awer xmaal is tas toer un ëng is te weech woo tsum leepe fiirt, un weeniche fine tee.” (Mateus 7:13, 14) Te xmaale weech, orer ti richtiche aat fer Kot aan se peete, fiirt tsum eewich leepe. Te prayte weech, orer ti ferkheerte aat fer Kot aan se peete, fiirt tsum toot. Awer Yeehoowa wil nët tas yemant xtërept. Tee këpt fer al ti oportuniteet fer iwer tëm se lërne. (2 Pedro 3:9)

5. Wii khanst tuu wise weer Kot richtich aan peete tuut?

⁵ Yeesus hot kesaat tas mer wise khëne weer Kot richtich aan peete tuut. Mëyer khëne tii itentifitsiire torich was se klaape un mache. Ëyer hot kesaat: “Aan tëne sayn friichte tuut tëyer se khëne.” Tan hot er noch kesaat: ‘Yeete kuute paam këpt kuute frucht.’ (Mateus 7:16, 17) Tas petayt nët tas tii woo Kot aan peete perfëkt sin. Awer Kot sayn tiiner xtrënge sich aan fer se mache was richtich is. Yets wole mer ëtliche tinge lërne woo ti woere kriste mache tuun.

6, 7. (a) Warom halt sich ti woere aanpeetung aan ti Piipel? (b) Was fer payxpiil hot Yeesus këp un was tsaycht tas?

⁶ Tëne sayn aanpeetung halt sich aan ti Piipel. Ti Piipel saat: “Ti kans Xrift is fon Kot inxpiriirt un kuut fer se in lërne, fer se xteere, fer tings richtich se xtële, fer in rëchtichkheet se tsiie, tas Kot sayn mënx kans kompetënt say, mit ales was ëyer prauch fer yeete kuut aarwayt.” (2 Timóteo 3:16, 17)  Te aphostel Phaul hot fer ti kriste kexrip: “Wii tëyer Kot sayn wort kriit hot, woo tëyer fon uns keheert hot, hot tëyer es aan kenom nët wii wërter fon mënxe awer wii es wërklich is, Kot sayn wort.” (1 Tessalonicenses 2:13) Ti woere aanpeetung halt sich noore aan Kot sayn Wort, ti Piipel. Tii halt sich nët aan mënxliche itee orer kewoonheete.

⁷ Ales was Yeesus in kelërnt hot, hot sich aan Kot sayn Wort kehal. (Lees João 17:17) Tee hot oft ti Xrifte tsitiirt. (Mateus 4:4, 7, 10) Yeesus sayn payxpiil tsaycht tas ales was ti woere kriste in lërne, mus sich aan ti Piipel hale.

8. Was hot Yeesus in kelërnt iwer Yeehoowa aan se peete?

⁸ Tii tuun ploos Yeehoowa aan peete. Salmo 83:18 saat: “Tuu, woo Yeehoowa heest, ploos tuu pist te Ale Heechste iwer ti kans ëyert.” Yeesus wolt tas ti layt wuste weer te woere Kot is, un ëyer hot Kot sayn naame fer ti layt in kelërnt. (Lees João 17:6) Yeesus hot kesaat: “Yeehoowa tayn Kot must tuu aan peete un ploos fer tee solst tuu hayliche tiinst mache.” (Mateus 4:10) Tës weeche, tuun Kot sayn tiiner Yeesus noo mache. Tii tuun ploos Yeehoowa aan peete un tëm sayn naame penutse. Tii woo Kot richtich aan peete tuun anere iwer Kot sayn naame un was ëyer fer uns macht, in lërne.

9, 10. Wii tsayche ti woere kriste tas se ti layt liipe?

⁹ Tii tuun ti layt wërklich liipe. Yeesus hot sayn tisipele in kelërnt eene te anere se liipe. (Lees João 13:35) Een tuun fon woo tii khome, was tëne sayn khultur is, orer op se raych orer aarm sin. Ti woere kriste tuun eene te anere liipe un sin wii een familye. (Colossenses 3:14) Tës weeche, tuun se nët in kriiche keen un  anere um pringe. Ti Piipel saat: “Too traan wise mëyer weer Kot sayn khiner sin un weer tëm Taywel sayn khiner sin: yeeter woo tas kerëchte nët macht, khomt nët fon Kot, aach nët tee woo nët sayn pruuter liipt.” Un tii saat noch: “Mëyer mise eene te anere liipe, nët soo wii Kayn, woo fom Xlëchte khom is un sayn pruuter um keprung hot.” (1 João 3:10-12; 4:20, 21)

¹⁰ Tii penutse sayn tsayt, kraft un ales was se hon fer eene te anere se hëlfe un aan muute. (Hebreus 10:24, 25) Tii ‘mache fer al was kuut is’. (Gálatas 6:10)

11. Warom mise mer Yeesus aan heere fer kerët se këpe?

¹¹ Tii klaape tas ti rëtung torich Yeesus khomt. Ti Piipel saat: ‘Es këpt khee rëtung in nimant aneres, wayl es këpt khee anere naame uner tëm himel, woo fer ti mënxe këp is, torich tee mer kerët këpe sole.’ (Atos 4:12) Im kapitel 5 fon tiise puuch hon mer kelërnt, tas Yeehoowa Yeesus kexikt hot fer sayn leepe se opfere un soo, mënxe se rëte, woo Kot aan heere. (Mateus 20:28) Yeehoowa hot Yeesus raus kesuucht fer Kheenich in Kot sayn Raych se sin. Tës weeche, saat ti Piipel tas mer Yeesus aan heere mise wën mer fer imer leepe wole. (Lees João 3:36)

12. Warom tuun ti woere kriste sich nët in te politik rin mexe?

¹² Tii tuun sich nët in te politik rin mexe. Yeesus hot sich nët in te politik rin kemext. Wii ëyer foer te romaanixe kowernant Pilatos kextan hot, hot er kesaat: “Mayn Raych is khee teel fon tiise wëlt.” (Lees João 18:36) Soo wii Yeesus, sin ti woere kriste leaal tsu Kot sayn himlixe Raych. Tës weeche, ekaal woo se woone, tuun se sich nët in te politik rin mexe. Awer, ti Piipel saat tas se ti “mëchtiche autoriteete”, orer ti  kowernante, aan heere mise. (Romanos 13:1) Tii respëktiire ti kesëtse fom lant woo se woone. Awer, wën een kesëts nët mit Kot sayn kesëtse xtimt, tuun se ti aphostele noo mache, woo kesaat hon: “Mer mise Kot als kowernant aan heere xtats ti mënxe.” (Atos 5:29; Marcos 12:17)

13. Was tuun ti woere kriste iwer Kot sayn Raych preetiche?

¹³ Tii preetiche tas ploos Kot sayn Raych ti propleeme fon te wëlt wëch xafe khan. Yeesus hot kesaat tas ti “kuute oter fom Raych” uf te kans wëlt kepreeticht këpe teete. (Lees Mateus 24:14) Khee mënxliche rechiirung khan mache was Kot sayn Raych fer uns mache tuut. (Salmo 146:3) Yeesus hot ti layt in kelërnt se peete: “Tayn Raych sol khome. Tayn wile sol kemacht këpe, wii im himel, soo aach uf ti ëyert.” (Mateus 6:10) Ti Piipel saat uns tas Kot sayn Raych ale mënxliche rechiirunge fernichte tuut un tas ‘noore Kot sayn Raych fer imer playpt.’ (Daniel 2:44)

14. Weer mënst tuu tas Kot richtich aan peete tuut?

¹⁴ Yets woos tuu tiise phunkte xtutiirt host, froo tich: ‘Weer tuut sayn inlërnunge aan ti Piipel hale? Weer tuut fer ti anere iwer Kot sayn naame xprëche? Weer tsaycht woere liipe eene tsum anere un klaapt tas Kot Yeesus kexikt hot fer uns se rëte? Weer tuut sich nët in politik rin mexe? Weer preeticht tas ploos Kot sayn Raych ti propleeme wëch xafe khan?’ Ploos Yeehoowa sayn Tsayer mache tas. (Isaías 43:10-12)

15. Was mise mer mache tas Kot unser aanpeetung aan nëmt?

¹⁵ Ploos klaape tas Kot eksistiirt is nët kenuuch. Soo kaar ti taywele klaape tas Kot eksistiirt, awer tii tuun tee nët aan heere. (Tiago 2:19) Wën mer wole tas Kot unser aanpeetung aan nëmt,  mise mer aach mache was ëyer saat.

16. Warom mise mer uns fon te falxe relichioon wëch hale?

¹⁶ Kot tuut unser aanpeetung aan nëme, wën mer niks mit te falx relichioon se tuun hon. Te profeet Isaiias hot kexrip: “Keet fon tee raus, halt aych rayn.” (Isaías 52:11; 2 Coríntios 6:17) Tës weeche mise mer uns fon ales woo mit te falxe aanpeetung se tuun hot, wëch hale.

17, 18. (a) Was is “Papiloon ti Kroos”? (b) Warom is es important sich fon tee wëch se hale?

¹⁷ Wii wise mer op een relichioon falx is? Mëyer wise tas se falx is wën se in lërnt Kot in een aat aan se peete woo keeche sayn Wort keet. Ti Piipel nënt ale falxe relichioone “Papiloon ti Kroos”. (Apocalipse 17:5) Fon woo khomt tiise naame? Fon te friirix xtat Papiloon. Fon tat sin fiil falxe relichieese inlërnunge khom. Tsum payxpiil, tii hon aan triniteete, orer tray kote in eene, keklaapt. Tii hon aach keklaapt tas ti toote leepëntich in een aner plats plaype teete un tas se in te fayer hël kextrooft këpe khënte. Hayt këpts aach fiile relichioone woo soo eenliche tinge in lërne. Tii lërne tas Kot een Triniteet is, awer ti Piipel saat taytlich tas es ploos een eensich woere Kot këpt. Un tas Yeesus tëm sayn Soon is. (João 17:3) Ti relichioone tuun aach in lërne tas ti seel un te kayst nët xtërpe un tas se in te fayer hël kextrooft wëre. Awer tas is nët woer un xtimt nët mit te Piipel. (Kuk ti Noote 14, 17 un 18)

¹⁸ Kot hot foer heer kesaat tas ale falxe relichioon in khorts tsayt fernicht wëre. (Apocalipse 18:8) Ferxteest tuu warom es soo important is aus te falx relichioon raus se keen? Yeehoowa wil tas tuu tas machst eep es tsu xpeet is. (Apocalipse 18:4)

19. Wii tuut Yeehoowa uf phase tii woo ëntxlise tee aan se peete?

 ¹⁹ Wëns tuu tich ëntxlist aus te falx relichioon raus se keen un Yeehoowa se tiine, tuun es fiilaycht ëtliche fon tayn froynte orer parente nët ferxteen un tayn leepe xwëyer mache. Awer Yeehoowa lost tich nët im xtich. Tuu wërst mitkliit fon een muntiaal familye fon milioone layt woo wërklich eene te anere liipe un kriist ti hofnung fer imer in Kot sayn naye wëlt se leepe. (Marcos 10:28-30) Fiilaycht tuun maniche woo sich keeche tich kextëlt hon, xpeeter ti Piipel xtutiire.

²⁰In khorts tsayt, tuut Kot ti kans xlëchtichkheet fernichte un sayn Raych tuut iwer ti ëyert rechiire. (2 Pedro 3:9, 13) Es wërt een wuner xeen tsayt sin! Tan, tuun ale Yeehoowa soo aan peete wii ëyer es wil. Tës weeche, is es important tas tuu yets ëntxlise tuust Kot richtich aan se peete.