1, 2. (a) Warom mënst tuu tas tas kepeet een xeen kexënk is? (b) Warom mise mer wise was ti Piipel too triwer in lërnt?

FERKLAYCHT mim uniwërsum, is ti ëyert aarich kleen. Wën Yeehoowa uf ti ëyert kukt, tuun ale layt in ale natsioone wii een trop waser in een eema aus siin. (Salmo 115:15; Isaías 40:15) Opwool mer neewich tëm uniwërsum soo kleen aus siin, saat Salmo 145:18, 19: “Yeehoowa is ticht pay ale woo tee aan ruufe, pay ale, woo tee in woerheet aan ruufe. Ëyer tuut ti winxe fon tëne woo tee respëktiire, erfiile; un heert tëne sayn hilef xraay un tuut se rëte.” Was een wuner xeenes priwilëj! Yeehoowa, te Ale Mëchtiche Kriatoer, wil ticht pay uns sin un wil unsere kepeete aan heere. Yaa, peete is een priwilëj, een xeenes kexënk woo Yeehoowa fer yeete eene fon uns këpt.

² Awer Yeehoowa heert uns ploos wën mer in een aat peete woo ëyer aan nëmt. Wii khëne mer tas mache? Wole mer siin was ti Piipel iwer peete saat.

3. Warom solst tuu tsu Yeehoowa peete?

³ Yeehoowa wil tas tuu torich tas kepeet mit tëm xprëchst. Wii wise mer tas? Lees Filipenses 4:6, 7. Tënk aan tiise froyntlich inlaatung. Te Kriatoer fom uniwërsum wil tas tuu tëm saast wii tuu tich finst un was tuu mit machst.

4. Wii khan tas peete tayn froyntxaft mit Yeehoowa xtërker mache?

 ⁴ Tas kepeet hëleft uns een froyntxaft mit Yeehoowa se hon. Wën froynte imer eene mim anere xprëche iwer sayn ketanke, propleeme un wii se sich fine, wërt ti froyntxaft xtërker. Wëns tuu tsu Yeehoowa peetst is es aach soo. (Tiago 4:8) Tuu khanst tëm ales fertseele un saan wii tuu tich finst. Un in te Piipel, tuut Yeehoowa fer tich saan was ëyer tënkt un was er noch foer hot.

5. Wii tsaycht ti Piipel tas Yeehoowa nët ale kepeete aan heert?

⁵ Tuut Yeehoowa ale kepeete aan heere? Nee. In te taache fom profeet Isaiias, hot Yeehoowa fer ti israelite kesaat: “Opwool tëyer fiil kepeete macht, tuun ich  nët heere; ayer hënt sin fol pluut.” (Isaías 1:15) Tas tsaycht tas wën mer etwas mache woo Yeehoowa hast, tuut ëyer unsere kepeete nët aan heere.

6. (a) Warom is te klaape soo important? (b) Wii tsayche mer unser klaape?

⁶ Wën mer wole tas Yeehoowa unsere kepeete aan heert, mise mer aan tee klaape. (Marcos 11:24) Te aphostel Phaul leet aus: “Oone klaape is es awer unmeechlich Kot se kefale, wayl weer ticht pay Kot khomt, mus klaape tas ëyer eksistiirt un tas ëyer een pelooner wërt, fer tii woo tee ërnstlich suuche.” (Hebreus 11:6) Awer es is nët kenuuch ploos se saan tas mer aan tee klaape. Mëyer tsayche taytlich unser klaape aan Yeehoowa wën mer tee yeete taach aan heere. (Lees Tiago 2:26)

7. (a) Warom mise mer respëkt un teemuut tsayche wën mer tsu Yeehoowa peete? (b) Wii khëne mer eerliche kepeete mache?

⁷ Wën mer tsu Yeehoowa peete, mise mer tas mit respëkt un teemuut mache. Warom? Wën mer mit een presitënt xprëche, tuun mer tas mit respëkt mache. Yeehoowa is te Ale Mëchtiche Kot, soo, wën mer mit tëm xprëche, mise mer noch mee respëkt un teemuut tsayche. (Gênesis 17:1; Salmo 138:6) Mëyer sole aach eerlich sin un nët imer ti sëlwiche wërter noo un noo saan. Unser kepeet tsu Yeehoowa mus fom hërts khome. (Mateus 6:7, 8)

8. Wën mer iwer etwas peete, was mise mer noch mache?

⁸ Tsum xlus, wën mer iwer etwas peete, mise mer uns aan xtrënge tas unser leepe mim kepeet xtimt. Tsum payxpiil, wën mer tsu Yeehoowa iwer tas was fer uns neetich is, peete, thërfe mer nët faulënser sin un waarte tas Yeehoowa uns ales këpt, opwool mer  fer tas xafe khëne. Mëyer mise flaysich xafe un yeete aarwayt woo mer mache khëne, aan nëme. (Mateus 6:11; 2 Tessalonicenses 3:10) Orer wën mer tsu Yeehoowa peete un hilef ferlange fer noo lose etwas ferkheertes se mache, mise mer uns fon ale situatsioone woo uns proope khënte, wëch hale. (Colossenses 3:5) Wole mer yets ëtliche frooche iwer kepeete xtutiire.

9. (a) Tsu weem sole mer peete? (b) Warom mise mer in Yeesus sayn naame peete?

⁹ Tsu weem sole mer peete? Tsu Yeehoowa, unser himlixe Fater. Tas waar was Yeesus fer sayn tisipele in kelërnt hot. (Mateus 6:9) Tan, thërfe mer ploos tsu Yeehoowa peete. Awer unsere kepeete mise in Yeesus sayn naame kemacht wëre. Wayl Yeesus kesaat hot: “Ich sin te weech, ti woerheet un tas leepe. Nimant khomt tsum Fater wëns nët torich mich is.” (João 14:6) Wën mer wole tas Yeehoowa unsere kepeete aan nëmt, mise mer wëyert fer tas was Yeesus fer uns kemacht hot, këpe. Tee is uf ti ëyert khom fer uns fon te sint un fom toot se rëte. (João 3:16; Romanos 5:12) Mëyer mise aach ferxteen tas Yeehoowa Yeesus wii Richter raus kesuucht hot un aach wii Heechste Priister woo uns hëlef Kot sayn fertsayung se kriin. Wën mer in Yeesus sayn naame peete, tsayche mer tas mer tas ales ferxteen. (João 5:22; Hebreus 6:20)

10. Mise mer in een spetsiaal positsioon peete? Lee aus.

¹⁰ Mise mer in een spetsiaal positsioon peete? Nee. Yeehoowa ferlangt nët tas mer uns kniie, sëtse orer xteen plaype wën mer peete. Ti Piipel lërnt tas mer mit Yeehoowa xprëche khëne wën unser positsioon respëkt tsaycht. (1 Crônicas 17:16; Neemias 8:6; Daniel 6:10; Marcos 11:25) Tas haupste fer Yeehoowa is nët unser positsioon, awer was mëyer im hërts hon. Mëyer khëne unsere kepeete aus xprëche orer in ketanke mache, ekaal woo un wan. Mëyer khëne sicher sin  tas Yeehoowa uns heert, aach wën nimant aneres uns heere khan. (Neemias 2:1-6)

11. Iwer was khëne mer peete?

¹¹ Iwer was khëne mer peete? Mëyer khëne iwer ales peete, woo Kot aan nëmt. Ti Piipel saat: “Tas is een tuun was mer ferlange, ëyer heert uns wën tas mit sayn wile xtimt.” (1 João 5:14) Khëne mer iwer persoonliche sache peete? Yaa. Wën mer tsu Yeehoowa peete, is es wii wën mer mit een froynt xprëche. Mëyer khëne fer Yeehoowa ales saan was in unser ketanke orer in unser hërts is. (Salmo 62:8) Mëyer khëne hayliche kayst ferlange fer uns hëlfe tas richtiche se mache. (Lucas 11:13) Mëyer khëne aach ferlange tas Yeehoowa uns kluucheet këpt fer kuute ëntxluse se mache, un kraft fer mit xwiirichkheete um se keen. (Tiago 1:5) Mëyer mise aach fer Yeehoowa ferlange tas ëyer unsere sinte fertsayt. (Efésios 1:3, 7) Mëyer mise aach fer anere peete, wii unser familye un unser priiter in te kemaynt. (Atos 12:5; Colossenses 4:12)

12. Was sol tas haupste in unsere kepeete sin?

¹² Was sol tas haupste in unsere kepeete sin? Yeehoowa un sayn wile. Mëyer mise tee hërtslich tanke fer ales was ëyer xon fer uns kemacht hot. (1 Crônicas 29:10-13) Yeesus hot im Fater Unser Kepeet in kelërnt was tas haupste is. (Lees Mateus 6:9-13) Ëyer hot kesaat tas se ëyerst peete sole tas Kot sayn naame kehaylicht wërt. Tan hot Yeesus ketsaycht tas mer peete sole tas Kot sayn Raych khome sol un tas Kot sayn wile uf te ëyert kemacht wërt. Yeesus hot ëyerst iwer tiise importante tinge kepeet un nochter hot er kesaat tas mer iwer sache, woo neetich fer uns sin,  peete khëne. Wën mer tas mache, tuun unsere kepeete tsayche tas Yeehoowa un sayn wile tas haupste in unser leepe sin.

13. Wii lang sole unsere kepeete sin?

¹³ Wii lang sole unsere kepeete sin? Ti Piipel saat tas nët. Unsere kepeete khëne khorts orer lang sin, tas hëngt fon te situatsioon ap. Tsum payxpiil, eep mer ëse, khëne mer een khorts kepeet mache. Awer wën mer Yeehoowa tanke orer fer Tee saan iwer was mer uns ketanke mache, khan unser kepeet  lënger sin. (1 Samuel 1:12, 15) Mëyer wole nët lange kepeete mache ploos fer anere se ferwunere, soo wii ëtliche in Yeesus sayn taache tas kemacht hon. (Lucas 20:46, 47) Yeehoowa ferwunert sich nët mit soo kepeete. Was fer Yeehoowa wëyert hot, is tas unsere kepeete fom hërts khome.

14. (a) Wii oft mise mer peete? (b) Was lërnt tas uns iwer Yeehoowa?

¹⁴ Wii oft mise mer peete? Yeehoowa tuut uns in laate fer imer mit tëm se xprëche. Ti Piipel saat tas mer “wayter peete” sole. (Mateus 26:41; Romanos 12:12; 1 Tessalonicenses 5:17) Yeehoowa is imer wilich fer uns se heere. Mëyer khëne tëm yeete taach fer sayn liipe tanke un fer ales was er uns këpt. Mëyer khëne aach sayn orientiirung, kraft un  troost ferlange. Wën mer wërklich wëyert fer tas priwilëj këpe, tuun mer ale oportuniteete penutse fer mit Yeehoowa se xprëche.

15. Warom mise mer “amen” am xlus fom kepeet saan?

¹⁵ Warom mise mer “amen” am ën fom kepeet saan? Tas wort “amen” petayt “kewis” orer “soo sol es sin”. Wën mer “amen” am xlus fon unsere kepeete saan, tsayche mer tas mer eerlich in unsere wërter sin. (Salmo 41:13) Ti Piipel tsaych tas wën mer mit tëm kepeet fon yemant xtime, tuun mer “amen” in hart xtim orer in ketanke saan. (1 Crônicas 16:36; 1 Coríntios 14:16)

16. Tuut Yeehoowa wërklich unsere kepeete antworte? Lee aus.

¹⁶ Tuut Yeehoowa wërklich unsere kepeete antworte? Yaa. Ti Piipel nënt Yeehoowa “Heerer fom kepeet”. (Salmo 65:2) Yeehoowa tuut ti eerliche kepeete fon milioone mënxe heere un in unerxiitliche aate antworte.

17. Wii tuut Yeehoowa ëngele un sayn tiiner uf te ëyert penutse fer unsere kepeete antworte?

¹⁷ Yeehoowa tuut ëngele un sayn tiiner uf te ëyert penutse fer unsere kepeete antworte. (Hebreus 1:13, 14) Es këpt fiile payxpiile fon layt woo kepeet hon fer ti Piipel se ferxteen un klaych tëm noo sin se fon Yeehoowa sayn Tsayer, pesuucht këp. Ti Piipel tsaycht tas ti ëngele mit xafe fer ti “kuute oter” in te kans ëyert se preetiche. (Lees Apocalipse 14:6) Fiile fon uns hon xon hilef fon een pruuter kriit noo tëm mëyer tsu Yeehoowa iwer een propleem orer etwas, woo mëyer prauchte, kepeet hon. (Provérbios 12:25; Tiago 2:16)

18. (a) Wii penutst Yeehoowa sayn hayliche kayst fer unsere kepeete antworte? (b) Un wii penutst ëyer ti Piipel?

 ¹⁸ Yeehoowa penutst sayn hayliche kayst fer unsere kepeete antworte. Wën mer hilef fer Kot ferlange fer mit een propleem um se keen, khan er sayn hayliche kayst penutse fer uns orientiirung un kraft këpe. (2 Coríntios 4:7) Yeehoowa tuut unsere kepeete aach torich ti Piipel antworte. Wën mer ti Piipel leese, khëne mer tëkste fine woo uns hëlfe kluuche ëntxluse se mache. Neewich tëm, khan aach een komentaar fon yemant in te fersamlung orer een Piipel tëkst woo een ëlteste in te kemaynt mit uns teelt, ti antwort fer unsere kepeete sin. (Gálatas 6:1)

19. Warom khëne mer fiilaycht tënke tas Yeehoowa nët unsere kepeete keantwort hot?

¹⁹ Awer, im xtant khëne mer uns frooe: ‘Warom hot Yeehoowa mayn kepeete noch nët keantwort?’ Mëyer thërfe nët ferkëse tas Yeehoowa wees was mer hon mise. Un tee wees wan un wii tuut er unsere kepeete antworte. Soo, mise mer wayter peete fer se tsayche tas was mer ferlange ufrichtich is un tas mer wërklich aan Kot klaape. (Lucas 11:5-10) Manich mool tuut Yeehoowa unsere kepeete in een aat antworte, woo mer nët waarte tuun. Tsum payxpiil, wën mer iwer een xlime situatsioon peete, khan es sin tas Kot unser propleem nët wëch xaft, awer, uns kraft këpt fer tas aus se hale. (Lees Filipenses 4:13)

20. Was pasiirt wën mer tsu Yeehoowa peete?

²⁰ Was een wuner xeen kexënk is tas peete! Mëyer khëne sicher sin tas Yeehoowa unsere kepeete aan heert. (Salmo 145:18) Soo fiil mee wii mer tsu Yeehoowa fon unser kanse hërts peete, soo fiil xtërker këpt unser froyntxaft mit tëm.