Mit te hayrat, fangt een nay familye aan. Es is woer tas tuu wayter tayn eltere liipe un respektiire tuust, awer yets te wichtichste persoon in tayn leepe is tayne man orer tayn fraa. Tas khan xweyer sin fer etliche fon tayn parente tiise ënerung aan nëme. Awer ti piiplixe aanreete khene tich helfe. Tuu khanst in friit mit tayn parente leepe in te selwich tsayt woos tuu tayn nay familye uf paust.

WAS TI PIIPEL SAAT: “Eer tayne fater un tayn muter.” (Ëfeser 6:2) Ekaal wii alt tuu pist, must tuu imer tayn eltere respektiire un eere. In te selwich tsayt, ferkes net tas tayne man orer tayn fraa mus aach acht fer tëne sayn eltere kepe. “Ti liip is net ayfersichtich”, tes weeche, prauchst tuu tich net ayere wën tayne man orer tayn fraa mit sayn eltere tsayt aus kept. (1 Korinter 13:4; Kalater 5:26)

WAS KHANST TUU MACHE?

• Tuu net soo sorte wërter saan, wii: “Tayn familye tuut mich imer runer mache”, orer: “Tayn mama tuut sich nii kefale mit was ich mache”.

• Fersuuch ti tinge siin in te selwich aat wii tayne man orer tayn fraa siit.

WAS TI PIIPEL SAAT: “Tes weeche, tuut te man sayn fater un sayn muter lose un tuut sich fest tsu sayn fraa hale, un ti tswaay wëre een flayx.” (Xeenesis 2:24) Noo tayn hayrat, khene tayn eltere fiilaycht tenke tas se tich wayter uf phase mise, un tes weeche, tuun se sich in tayn hayrat rin mexe mee wii se thërfte.

Tan, wii pheyerche, mist teyer mitsamer krënse fer tas pextime. Nochter, saat tas mit liip fer ayre eltere. Teyer khent eerlich sin oone krope wërter penutse. (Xpriiche 15:1) “Teemuut, tsaamheet un ketult” tuun aych helfe in friit mit ayre parente leepe un “wayter eene te anere in liip aus hale”. (Ëfeser 4:2)

WAS KHANST TUU MACHE?

• Wëns tuu tich ketanke machst iwer wii ti parente sich in ayer leepe rin mexe tuun, xprech iwer tas mit tayne man orer tayn fraa in een tsayt woo ales kuut is.

• Sayt im ferxtant iwer wii tuut teyer mit tiise sache um keen.