Es waar Yeehoowa * woo ti eyerst hayrat in kesetst hot. Ti Piipel saat tas eyer ti eyerst fraa kemacht hot un hot “tii tsum man kenom”. Aatam is soo froo kep tas eyer kesaat hot: “Tas is ëntlich knoche fon mayn knoche un flayx fon mayn flayx.” (Xeenesis 2:22, 23) Yeehoowa wil imer noch hon tas ti pheyerche froo sole sin.

Wiis tuu tich kehayrat host, host tuu woerxaynlich ketenkt tas ales perfekt wëre teet. Awer, soo kaar ti pheyerche woo sich fiil liipe, tuun propleeme mit mache. (1 Korinter 7:28) In tas piichelche, tuust tuu piiplixe aanreete fine woo tich helfe khene een froo hayrat un familye hon. (Psalm 19:8-11)

WAS TI PIIPEL SAAT: Te man is te familye xëf. (Ëfeser 5:23)

Wëns tuu eene ferhayrat man pist, tan, wil Yeehoowa tas tuu tayn fraa mit liip uf phast. (1 Pheeter 3:7) Yeehoowa hot ti fraa kemacht fer tich mit helfe un wil tas tuu tayn fraa mit respekt un liip pehantelst. (Xeenesis 2:18) Tuu must tayn fraa soo fiil liipe tas tuu wilich pist fer tëne sayne interese foer tayne xtele. (Ëfeser 5:25-29)

Wëns tuu een ferhayrat fraa pist, tan, wil Yeehoowa tas tuu tiife respekt tsu tayne man tsaychst un tëm helefst sayn flicht wii familye xëf in hale. (1 Korinter 11:3; Ëfeser 5:33) Tuu ti rausuuchunge fon tayne man pay xteen un mit kanse hërts tëm mit helfe. (Koloser 3:18) Wëns tuu tas machst, wërst tuu fer tayne man un fer Yeehoowa noch xeener sin. (1 Pheeter 3:1-6)

WAS KHANST TUU MACHE?

• Froo fer tayne man orer tayn fraa: “Wii khan ich een peser persoon sin?” Tan, heer mit acht un mach ales was tuu khanst fer tas aan wëne.

• Say ketultich. Es praycht tsayt tas teyer tswaay raus fint was eene te anere froo lost.

WAS TI PIIPEL SAAT: Tuu must acht kepe fer was tayne man orer tayn fraa praycht. (Filiper 2:3, 4) Pehantel tayne man orer tayn fraa wii yemant woo fiil weyert hot. Eriner tich tas Yeehoowa wil hon tas sayne tiiner sole “froyntlich mit al sin”. (2 Timoteus 2:24) Ti Piipel saat: “Xpreche oone se tenke is wii ti xtiche fon een xwaart, awer ti tsung fom kluucher tuut heele.” Tes weeche, tuu tayn wërter kuut raus suuche. (Xpriiche 12:18) Yeehoowa sayn hayliche kayst heleft tich tas tuu froyntlich un liiplich mit te anere xpreche khanst. (Kalater 5:22, 23; Koloser 4:6)

WAS KHANST TUU MACHE?

• Eeps tuu iwer etwas wichtiches mit tayne man orer tayn fraa xprechst, peet tsu Kot fer tich helfe ketultich plaype, tas tuu mit acht heere un te aner ferxteen khanst.

• Phas kuut uf was tuu saast un wiis tuu saast.

WAS TI PIIPEL SAAT: Wiis tuu tich kehayrat host, pist tuu mit tayne man orer tayn fraa “een flayx” kep. (Matheus 19:5) Awer toch, hot yeete eene een aner personaliteet un es is meechlich tas teyer anerst eene wii te aner tenkt. Tes weeche, praycht teyer lërne eenich sin in was teyer tenkt un xpiirt. (Filiper 2:2) Eenichkheet is noch wichticher wën een pheyerche etwas raus suuche mus. Ti Piipel saat: “Wën ma fertseelt, tuun ti pleen kuut hin khome.” (Xpriiche 20:18) Lost tas ti aanreete fon te Piipel aych lënke wën teyer wichtiche rausuuchunge mache mist. (Xpriiche 8:32, 33)

WAS KHANST TUU MACHE?

• Wën teyer am xpreche sayt, xprecht iwer ayre xpiirunge un net ploos iwer ayre mënunge orer was am pasiire is.

• Xprech mit tayne man orer tayn fraa eeps tuu etwas machst.