TEEL 2
Sayt leaal eene tsu te anere
“Was Kot unich te selwiche yoch ketuun hot, sol te mënx net aus naner mache.” (Markus 10:9)
Yeehoowa ferlangt tas sayn tiiner leaal sole sin. (Mikeyas 6:8) Hauptseechlich in te hayrat is tiise kwaliteet aarich wichtich, wayl wën eene net leaal is, tuut te anere net aan tëm traue. Awer, te man un ti fraa mise eene aan te anere traue tas ti liip in te hayrat imer xtërker wërt.
Hayt se taach is es net laycht leaal in te hayrat sin. Tes weeche, fer tayn hayrat xitse, must tuu pextimt sin fer tswaay tinge mache.
1 XTEL TI HAYRAT IM EYERSTE PLATS
WAS TI PIIPEL SAAT: ‘Sayt aych sicher iwer was fer tinge wichticher sin.’ (Filiper 1:10) Tayn hayrat is eene fon te wichtichste tinge in tayn leepe. Weeche tas, must tuu tayn hayrat im eyerste plats xtele.
Yeehoowa wil tas tuu tsayt fer tayne man orer tayn fraa xenkst, un tas teyer tswaay mitsamer tas leepe kuut penutst. (Eklesyastes 9:9) Kot wil nii tas tuu tayne man orer tayn fraa uf sayt lost, awer tas teyer tswaay raus fint wii eene te anere froo mache. (1 Korinter 10:24) Tsaych tas tuu tayne man orer tayn fraa prauchst un tas tee fiil weyert fer tich hot.
WAS KHANST TUU MACHE?
-
Hool imer tsayt fer mit tayne man orer tayn fraa plaype un halt ayre kans acht eene tsu te anere.
-
Tenk wii een pheyerche. Xtats imer “ich” saan, saa “meyer”.
2 PHAS TAYN HËRTS UF
WAS TI PIIPEL SAAT: “Yeete eene woo wayter noo een fraa kukt un lust tsu tëne xpiirt, hot xon im hërts atultëryo mit tëne kemacht.” (Matheus 5:28) Wën yemant iwer imoraalixe tinge am tenke is, is tee xon in een aat untroy in sayn hayrat.
Yeehoowa saat tas tuu ‘tayn hërts uf phase’ must. (Xpriiche 4:23; Yeeremias 17:9) Fer tas mache, must tuu uf phase was tuu kukst. (Matheus 5:29, 30) Mach tas kuut payxpiil fom ferhayrat man Yoop noo. Eyer hot ‘een pakt mit sayn aue kemacht’ fer nii tsu een aner fraa mit ferkheerte wunx kuke. (Yoop 31:1) Say pextimt fer nii pornokrafii kuke un romantixe xpiirunge ëntwikele tsu yemant woo net tayne man orer tayn fraa is.
WAS KHANST TUU MACHE?
-
Los fer ti anere taytlich tas tuu ferhayrat pist un tas tuu ploos tsu tayne man orer tayn fraa keheerst.
-
Khimer tich mit te xpiirunge fon tayne man orer tayn fraa. Wën een froyntxaft woos tuu host ti xpiirunge fon tayne man orer tayn fraa wee macht, pring tiise froyntxaft klaych tsum ën.
