Wën een neneche uf ti welt khomt, tas is een wunerlich speryens fer tas pheyerche, awer is aach fiil aanxtrengung tepay. Yets woo teyer eltere sayt, khent teyer aych fiilaycht ferwunere raus fine tas teyer praycht ti meyerst tsayt un kraft penutse fer tas neneche uf phase. Etliche nachte oone kuut xloofe un naye emotsyoone khene aych tswaay stresiirt lose. Tes weeche, mus yeete eene fon aych ënerunge mache fer ayer khint un aach ayer hayrat uf phase. Wii khene ti aanreete fon te Piipel aych helfe mit tiise situatsyoon um keen?

WAS TI PIIPEL SAAT: “Ti liip is ketultich un kuut.” Un noch, ti liip “suucht net sayn aychne interese, kept net klaych wuutich”. (1 Korinter 13:4, 5) Yets, wayls tuu een mama pist, is es natiirlich tas tuu tayn kans acht aan tayn neneche halst. Awer tayne man khan aan fange sich xpiire tas eyer uf sayt kelos kep is. Tan, ferkes net tas eyer aach tayn acht praycht. Mit ketult un kuutheet, helef tayne man mërke tas tuu tëm must hon un tas eyer aach wichtich is fer ayer neneche uf phase.

“Man, tuu wayter mit tayn fraa woone soo wii es mit te khëntnis xtimt.” (1 Pheeter 3:7) Ferxtee tas tayn fraa ti meyerst kraft praycht fer ayer khint uf phase. Wayl tii yets naye flichte hot, tas khan tii stresiirt, kans miit un soo kaar tiifsinich lose. Tii khan manich mool pees mit tich kepe, awer fersuuch in ruu plaype, wayl “weer net klaych pees wërt, is peser wii te xtarke man”. (Xpriiche 16:32) Say ferxtëntich mit tayn fraa un kep imer ti hilef woo se praycht. (Xpriiche 14:29)

WAS KHANST TUU MACHE?

• Papa: Helef tayn fraa ayer neneche uf phase, aach wën tas kans xpeet in te nacht is. Fertrayp weenicher tsayt mit anere aktiwiteete tas tuu khanst mee tsayt mit tayn fraa un tayn neneche plaype.

• Mama: Wën tayne man sich aan piit fer ayer neneche uf phase, nëm es aan. Wën eyer net soo macht wiis tich kefalt, tuu tëm net xëne. Xtats tas, tsaych in een froyntlich aat wii eyer tas mache khan.

WAS TI PIIPEL SAAT: “Ti tswaay wëre een flayx.” (Xeenesis 2:24) Ayer familye is yets kewakst, awer ferkest aych net tas teyer tswaay noch “een flayx” sayt. Macht ales was meechlich is fer ayer hayrat wayter xtark hale.

Wëns tuu ti fraa pist, say petanklich weeche ti kans hilef un unerxtitsung fon tayne man un saa tas fer tëm. Tas wërt kuut sin fer tayne man heere. (Xpriiche 12:18) Un wëns tuu te man pist, saa fer tayn fraa tas tuu tii fiil liipst un tas tii fiil weyert fer tich hot. Kep tëne imer loope weeche ales was tii fer ti familye macht. (Xpriiche 31:10, 28)

“Tas yeete eene net ploos aan sayn aychne nuts tenkt, awer aan te nuts fon te aner.” (1 Korinter 10:24) Mach imer tas pestes fer tayne man orer tayn fraa. Wii pheyerche, hoolt tsayt fer eene mim anere fertseele, loope un heere. Un was mit sëks se tuun hot, tenk net ploos aan tich selepst, awer kep acht fer ti neetichkheete fon tayne man orer tayn fraa. Ti Piipel saat: “Lost net noo eene fer te aner kepe was yeete eene fertiint, heechstens wën teyer im ferxtant sayt.” (1 Korinter 7:3-5) Soo, tuut eerlich eene mit te anere iwer tiise sache fertseele. Wën teyer ketult un empatii tsaycht, tas tuut noch mee ayer hayrat ferxtërke.

WAS KHANST TUU MACHE?

• Ferkes net: hool imer een tsayt fer ploos aych tswaay.

• Torich keweenliche tinge, tsaych tayn liip tsu tayne man orer tayn fraa, wii tsum payxpiil, een tseetelche xraype orer een kleen kexenk kepe.

WAS TI PIIPEL SAAT: “Tsayt tuu uf te welt khom pist, tuust tuu ti hayliche xrifte khëne, woo khene tich kluuch mache fer ti retung.” (2 Timoteus 3:15) Pleen was tuu mache tuust fer tayn neneche in lërne. Soo kaar eep tas neneche uf ti welt khomt, khan es xon aarich fiil lërne. Im muterlayp, khan tas neneche xon ti xtim fon te mama un te papa erkhëne un aach xpiire op se froo, traurich orer wuutich sin. Tuu khanst xon fer tayn neneche etwas leese wën tas kans kleen is. Fiilaycht khan tas noch net ferxteen was tuu leest, awer tas khan helfe tas tayn khint nochter kërn leese tuut.

Tenk net tas tayn neneche tsu yung is fer iwer Kot se lërne. Es is aarich kuut wën tas neneche tayne kepeete tsu Yeehoowa heert. (Teuteronoomyum 11:19) Wën teyer mitsamer xpiilt, is es wichtich tas tuu aach iwer tinge xprechst woo Kot kemacht hot. (Psalm 78:3, 4) Mit te tsayt, tuut tayn khint ferxteen wii fiil tuu Yeehoowa liipst. Tas tuut tëm helfe aach liip tsu Yeehoowa uf paue.

WAS KHANST TUU MACHE?

• Im kepeet, ferlang kluucheet fer tayn neneche in lërne.

• Tuu noo un noo wichtiche wërter un haupste itee xpreche tas tayn neneche xon frii lërne khan.