Wii Yeehoowa ti familye kemacht hot, hot eyer fer ti eltere ti flicht kep ti khiner tsiie. (Koloser 3:20) Tan, wii mama orer papa, solst tuu ti liip tsu Yeehoowa in tas hërts fon tayn khint planse un tëm helfe een kluuch persoon wëre. (2 Timoteus 1:5; 3:15) Tuu solst aach wise was im hërts fon tayne soon orer tayn tochter is. Sicher tayn payxpiil is aarich wichtich. Ploos wën Kot sayn Wort tiif in tayn aychne hërts is, khanst tuu tas aach fer tayn khiner kuut in lërne. (Psalm 40:8)

WAS TI PIIPEL SAAT: “Sayt al xnel fer se heere, awer lamsam fer se xpreche.” (Tyako 1:19) Natiirlich, wilst tuu tas tayn khiner sich fray xpiire tas se khene imer mit tich fertseele. Fer tas, mise tayn khiner wise tas tuu fërtich pist fer tii heere imer wën se mit tich fertseele wole. Wën ayer hëm een friitlich plats is, wërts laychter fer tayn khiner sayn hërts uf mache. (Tyako 3:18) Awer wën se mërke tas tuu krop orer kritix wërst, fiilaycht tuun se net mee iwer sayn xpiirunge xpreche. Tan, say ketultich mit tayn khiner un los imer klaar tas tuu tëne liipst. (Matheus 3:17; 1 Korinter 8:1)

WAS KHANST TUU MACHE?

• Wën tayn khint mit tich fertseele mus, kep tëm tayn kans acht.

• Fertseel imer mit tayn khint, net ploos wën propleeme foer khome.

WAS TI PIIPEL SAAT: “Weer ferxtëntnis in een sache tsaycht, tëm keets kuut.” (Xpriiche 16:20) Als mool, tas tuu khanst wërklich ti xpiirunge fon tayn khint ferxteen, must tuu siin was hinich tëm sayn wërter is. Es is natiirlich tas ti yunge fiil mools tinge xpreche oone se tenke orer woo se in woerheet net soo kemënt hon. “Wën yemant een antwort kept eep tee ti sache heert, is tas een tumheet.” (Xpriiche 18:13) Tan, tuu net xnel wuutich kepe. (Xpriiche 19:11)

WAS KHANST TUU MACHE?

• Een tuun was tayn khint saat, say pextimt fer tëm net xteere un fer net klaych ti nerwe ferliire.

• Fersuuch traan tenke wiis tuu tich kexpiirt host un was wichtich fer tich waar wiis tuu tas selwich elter wii tayn khiner hast.

WAS TI PIIPEL SAAT: “Heer, mayne soon, ti tisipliin fon tayne papa un los net ti inlërnung fon tayn mama im xtich.” (Xpriiche 1:8) Yeehoowa hot fer ti eltere ti autoriteet iwer ti khiner kep. Tes weeche, solt teyer ayre khiner in lërne aych respektiire un aan heere. (Ëfeser 6:1-3) Ayre khiner khene mërke wën teyer net ‘eenich sayt in te aat fer se tenke’. (1 Korinter 1:10) Wën teyer net ti selwich mënung iwer een sache hot, saat tas net foer ayre khiner, wën net, khene se lamsam noo lose aych wii eltere respektiire.

WAS KHANST TUU MACHE?

• Fertseel mit tayne man orer tayn fraa un sayt eenich iwer wii teyer ayre khiner tisipliniirt un iipt.

• Wën teyer net ti selwich mënung hot iwer wii ti khiner in lërne, fersuuch ferxteen wii tayne man orer tayn fraa tas siit.

WAS TI PIIPEL SAAT: “Tuut tas khint in lërne in tëm weech woos keen sol.” (Xpriiche 22:6) Wëns tuut tayn khiner kuut kroos tsiie wilst, solst tuu net uf sayt lose ti aat wiis tuu tas machst. Tuu must een plaan mache un is aach tepay tii tisipliniire wëns neetich is. (Psalm 127:4; Xpriiche 29:17) Tisipliin is net ploos een xtroof kepe, awer is aach ti khiner helfe ferxteen warom tuu reekele fer tëne machst. (Xpriiche 28:7) Un aach, tuu tayn khiner in lërne ti Piipel liipe un Kot sayn aanreete ferxteen. (Psalm 1:2) Soo, khene tayn khiner aan fange een kuut kewise hale. (Hepreeyer 5:14)

WAS KHANST TUU MACHE?

• Tuu tayn khiner in lërne Kot se siin wii een froynt aan weem se traue khene.

• Helef se wise was fer sayn moraal kefeerlich is un wii se fon tas aus wayche khene, wii tinge im internet un in te sotsyaale weepe. Lee tëne aus wii se sich khene xitse fon layt woo sëksuaale xaate keeche tëne mache wole.