Noo ti hoochtsayt, khene fiile propleeme tsum foer xayn khome. Tas khan pasiire wayl teyer tswaay in unerxiitliche aate tenkt, xpiirt un anerste kroos ketsoo kep sayt. Ti propleeme khene aach fon traus khome orer fon etwas woo teyer net waart, wii tsum payxpiil: een natuer unklik orer yemant fon te familye khan krank wëre.

Fiile mëne tas fon te propleeme aus rayse, weyer een kuut ausweech. Awer, ti Piipel muut uns aan fer ti propleeme resolwiire. (Matheus 5:23, 24) Un ti pest aat fer tas mache, is wën mer ti piiplixe aanreete aan wëne.

WAS TI PIIPEL SAAT: ‘Es kept een tsayt fer se xpreche.’ (Eklesyastes 3:1, 7) Wëns een propleem kept, hool tsayt fer iwer tas fertseele. Say eerlich un los tayne man orer tayn fraa wise was tuu iwer tas tenkst un wiis tuu tich xpiirst. ‘Xprecht imer ti woerheet eene mim anere.’ (Ëfeser 4:25) Aach wëns tuu wuutich, traurich orer stresiirt pist orer anere xtarke emotsyoone xpiirst, hal tich uner kontrol un xtreng tich aan fer net aan fange se tsënke. Wëns tuu tsaam antwortst, tas heleft tas tas kexpreech net een kriich kept. (Xpriiche 15:4; 26:20)

Aach wëns tuu net mit etwas xtimst, xprech mit ketult, tsaych liip un respekt tsu tayne man orer tayn fraa. (Koloser 4:6) Fersuucht soo xnel wii meechlich tas propleem resolwiire un lost net noo eene mim anere fertseele. (Ëfeser 4:26)

WAS KHANST TUU MACHE?

• Tuut een kuut xtun ap mache fer iwer tas propleem xpreche.

• Wën tayne man orer tayn fraa am xpreche is, xtreng tich aan fer tee orer tii net xteere. Tuu kriist aach een tsayt fer se xpreche.

WAS TI PIIPEL SAAT: “Mit priiterlich liip, tuut hërtsliche xpiirunge eene tsu te aner hon. Tuut te eyerste xrit kepe fer ti anere eere.” (Romaaner 12:10) Ti aat wiis tuu heerst, is aarich wichtich. Fersuuch se ferxteen was tayne man orer tayn fraa iwer etwas tenkt. Mach tas mit “liiplich mitlayt un teemuut”. (1 Pheeter 3:8; Tyako 1:19) Tas petayt wërklich heere. Imer wëns meechlich is, los ales noo was tuu am mache pist un kep tayn kans acht fer tayne man orer tayn fraa. Wëns net meechlich is, froo op teyer iwer tas xpeeter xpreche khent. Wën tas pheyerche sich naner wii froynte un net wii faynte pehantelt, tuut nimant sich ‘pelayticht xpiire’. (Eklesyastes 7:9)

WAS KHANST TUU MACHE?

• Heer un fersuuch ferxteen was tayne man orer tayn fraa fertseelt, aach wëns tich net kefalt was tee orer tii saat.

• Fersuuch net ploos ti wërter fon tayne man orer tayn fraa heere. Kep acht aan sayn kesicht, te thoon fon sayn xtim un wii eyer sich weekelt.

WAS TI PIIPEL SAAT: “Yeete xweyer aarwayt pringt nuts, awer ploos fertseele nëmt tsu ti aarmheet.” (Xpriiche 14:23) Ploos fertseele is net kenuuch. Tuu must pextimt sin fer ales mache was teyer tswaay ap kemacht hot. Yaa, tas khan een xweyer aarwayt sin un fiil aanxtrengung ferlange, awer es is te weyert. (Xpriiche 10:4) Wën teyer tswaay mitsamer xaft, ‘kriit teyer een kuute loon fon ayer xweyer aarwayt’. (Eklesyastes 4:9)

WAS KHANST TUU MACHE?

• Tuut ap xpreche was yeete eene mache khan fer tas propleem resolwiire.

• Kukt imer wiiter noo was fer xrite teyer xon hin kriit hot.