Sicher, wilst tuu tas tayn hayrat un tayn familye imer froo sin, awer plëtslich khene tinge pasiire woo tuun ayer frooheet wech hoole. (Eklesyastes 9:11) Awer unser Kot tuut uns helfe mit yeete xwiirichkheet um keen. Ti piiplixe aanreete in tiise lisyoon khene tich un tayn familye helfe soo kaar ti xlimste situatsyoone aus hale.

WAS TI PIIPEL SAAT: ‘Wëreft ayre kanse soriche uf Kot, wayl Eyer aych uf phast.’ (1 Pheeter 5:7) Eriner tich tas Kot net te xult hot iwer ti xlime tinge woo mit tich pasiire tuun. (Tyako 1:13) Wëns tuu tich tichter pay Yeehoowa xafst, tuut eyer wayter tich helfe in te pest aat wiis meechlich is. (Isaiias 41:10) “Xiit tayn hërts foer tëm aus.” (Psalm 62:8)

Tuu khanst aach troost fine wëns tuu yeete taach ti Piipel leest un xtutiirst. Tas khan tich helfe se xpiire wii Yeehoowa tich ‘in ale tayn proope treest’. (2 Korinter 1:3, 4; Romaaner 15:4) Kot ferxprecht tich tëm “sayn friit” kepe, “woo keet iwer ales woo ti mënxe ferxteen khene”. (Filiper 4:6, 7, 13)

WAS KHANST TUU MACHE?

• Peet tsu Yeehoowa tas eyer tich heleft in ruu plaype un klaar tenke.

• Nochter, tenk traan aan ti kanse optsyoone woos kept un suuch raus was tas pestes fer tich is.

WAS TI PIIPEL SAAT: “Tas hërts fom ferxtëntiche mënx kriit khëntnis, un tas oer fon te kluuche mënxe suucht ti khëntnis.” (Xpriiche 18:15) Fersuuch ti kanse informatsyoone woos meechlich sin samele fer peser mit te situatsyoon um keen. Xprech mit yeete eene fon tayn familye fer se wise was yeete eene praycht un heert se mit acht. (Xpriiche 20:5)

Un wën yemant woos tuu liipst xtërept? Tuu prauchst tich net xeeme fer tayn xpiirunge tsayche. Eriner tich tas soo kaar “Yeesus hot aan kefang se prile”. (Yoohan 11:35; Eklesyastes 3:4) Es is aach wichtich kenuuch ruue un xloofe. (Eklesyastes 4:6) Tas heleft tich peser mit xlime situatsyoone um keen.

WAS KHANST TUU MACHE?

• Tuu ti kewoonheet hon fer imer mit te familye xpreche. Fang xon yets aan tas mache, tan, wërts laychter mitsamer fertseele wën propleeme foer khome.

• Xprech mit anere woo ti selwich situatsyoon xon mit kemacht hon.

WAS TI PIIPEL SAAT: “Te woere froynt tsaycht imer liip, un wërt een pruuter in unruyche tsayte.” (Xpriiche 17:17) Sicher tayn froynte wole tich helfe, awer fiilaycht wise se net wii tas mache. Tan, khanst tuu fer tëne saan was tuu wërklich prauchst. (Xpriiche 12:25) Un noch, suuch ti hilef fon layt woo ti Piipel kuut ferxteen. Tii khene Kot sayn oryentiirunge in te Piipel tsayche woo wëre aarich nutslich fer tich. (Tyako 5:14)

Tuu tuust unerxtitsung fine wëns tuu reeklich tsayt fertraypst mit layt woo aan Kot klaape un uf tëm sayn ferxpreche traue. Un noch, wëns tuu hilef kepst fer tii woo oone muut sin, tas tuut tich selepst uf muute. Tan, xprech mit tiise layt iwer tayn klaape aan Yeehoowa un iwer tëm sayn ferxpreche. Penuts tayn tsayt fer hilef kepe fer tii woos prayche un hal tich net wech fon tii woo tich wërklich liipe un sich mit tich khimere. (Xpriiche 18:1; 1 Korinter 15:58)

WAS KHANST TUU MACHE?

• Fertseel mit een froynt aan weem tuu traust un los tas eyer tich heleft.

• Say eerlich un saa was tuu wërklich prauchst.